35. दया कौरणै वाल़ै बाबा री काहणी

एकी दिनै, यीशु तिऊं भौरी का लोगु लै शिक्षा दैन्दै थौ लागौ औन्दौ ज़ो तेसरी शुणना लै कौट्ठै थै हूऐ औन्दै। इऐ लोग मामलै निंणै वाल़ै और साथाई ओर लोग भी थै ज़ूणिऐ मूसा रै कानूना मानणै री कोशिश नाईं की।

कुछ़ धार्मिक गुरुऐ देखौ कि यीशु इऊं लोगु आइलै एक गोश्टणा ज़िणौ बुशै लाइन्दै लागौ औन्दौ थौ। एथीलै तिउंऐ एकी दुजै कु इणौ बोलणौ शुरु किऔ कि सेऊ गलत थौ बोलदै लागौ औन्दौ। यीशुऐ सै बूशै कौरदै शुणै, एथीलै तिणीऐ तिउंकै ऐज़ी काहणी बोली।

“एक आदमी थौ ज़ासरै दूई छ़ोहरु थै। छ़ोटै छ़ोहरुऐ आपणै बाबा लै बोलौ, ‘ओ बाब, मुक्कै इबी मैरौ हिस्सौ चाईं! एथीलै बाबै आपणै दूइयौ छ़ोहरु रै मांझ़ा दी आपणै धन-ज़यदाद बांटी ऐरौ सा।”

फेटी इ छ़ोटौ छ़ोहरु आपणौ सारौ कुछ़ कौट्ठै कौरिऔ दूर देशा लै डेई गौ और पापी ज़िन्दगी ज़िउंणा दी आपणै सारै पैसै बर्बाद की ऐरै।”

“तेथ बासिऐ, ज़िऐ छ़ोटौ छ़ौहरु थौ तेस देशा दी एक बौड़ौ काल़ पौड़ौ, और तेसकै रोटी खाणा लै पैसै खातम हुई गौऐ। एथीलै तेसकै ज़ो काम मिलौ सेऊ सुंगंरु च़ारनै रौ थौ। सेऊ एती दुखी और भूखौ थौ कि सेऊ सुंगंरु रौ चापण खाणौ च़ाह थौ।”

“आखिरकार, तिणी छ़ोटै छ़ोहरुऐ आपु कु बोलौ, हाऊं का ऊ कौरदै लागौ औन्दौ? मैरै बाबा रै नुकरु कै खाणा लै भौरी खाणौ औआ, तैबै भी हाऊं ईऐ भूखौ मौरदै लागौ औन्दौ। हाऊं आपणै बाबा काऐ वापिस डिआ ऊ और आपणै बाबा रौ एक नुकुर बौणना लै औरज़ कौराऊ।”

एथीलै तिणी छ़ोटै छोहरुऐ वापिस आपणै बाबा रै घौरा भिलै डेउणौ शुरु किऔ। ज़ैबैकि सेऊ औज़ौ दूर ही थौ, तेसरै बाबै सेऊ देखौ और तेसदी आशीयौ घीण लाई। सेऊ दूड़िऔ आपणै छ़ोहरु काऐ डेऔ और सेऊ गौल़ै लाइऔ खोबियाऔ।

“तिणी छ़ोहरुऐ बोलौ, ‘ओ बाब, मुंइऐ परमेश्वरा रै और तैरै खिलाफ पाप किऔ आ। हाऊं तैरै छ़ोहरु बोलणा लै लायक नाईं ऊ।”

“पर बाबै आपणै नुकुरा लै बोलौ, ‘फेटी डेइऔ सारेऊ कु बौड़िया जुड़कै आणौ और मैरै छ़ोहरु कै भिड़ाऔ! तेसरी औउंठी दी कांगणी और तेसरै लाता दी बूट भिड़ाऔ। तैबै सारेउ कु आच्छ़ौ च़ेल्टू झ़ांगौ ताकी आमै खाई और खुशी मौनाई लै, कैलैकि मैरौ छ़ोहरु मौरी गौ थौ, पर आबै सेऊ ज़िउंदौ आ! सेऊ औरच़ी गौ थौ, पर आमुकै सेऊ मिली गौ आ!”

“एथीलै लोगुऐ खुशी मौनाउणी शुरु कौरी। कुछ़ बौगत बितीऔ, बौड़ौ छ़ोहरु डोखरा दी काम कौरियौ घौरै आशौ। तिणीऐ गाणै और नाच़णै री बाच़ शुणी और हैरान हुऔ कि इयौ का हुन्दै लागौ औन्दौ।”

“ज़ेबी बौड़ौ छ़ोहरु कै पौतौ लागौ कि सै एथीलै खुशी मौनाउंदै लागै औन्दै, कि तेसरौ भाई घौरै आशी गौ थौ, ता सेऊ भौरी रोषुऔ और घौरा भित्तै नाईं हुऔ। तेसरै बाबै बाइरै आशीऔ तेसलै तिऊं आइलै खुशी मौनाउणा लै औरज़ की, पर तिणीऐ इनकार किऔ।”

तिणी बौड़ै छ़ोहरुऐ आपणै बाबा लै बोलौ, इऊं सारै बौरिषा दी मुंइऐ ईमानदारी कौरी काम किऔ! और केबी भी तेरी बुशै नाईं टाल़ी, पर ताइंऐ केबी मुकै एक छ़ोटी बाकरी नाईं देई ताकि हाऊं आपणै गोश्टणा आइलै दूपारी कौरी सौकू। पर तैरै एस छ़ोहरुऐ तैरै पैसै पापी कामा कौरणा दी बर्बाद कौरै ई। और आबै ज़ेबी सेऊ आशौ आ ता तेस कालै खुशी मौनाउणा लै ताइंऐ सारेऊ कु आच्छ़ौ च़ेल्टू झ़ांगौ!”

“बाबै ज़वाब दैऔ, ‘ओ मैरै छ़ोहरु, तु सौदा मुं आइलै ई, और ज़ो कुछ़ मैरौ आ सेऊ सारौ तैरौ आ। पर आमुलै खुशी मौनाउणौ ठीक आ कैलैकि तैरौ भाई मौरी गौ थौ, पर आबै सेऊ ज़िउंदौ आ। सेऊ औच़ी गौ थौ, पर आबै आमुकै सेऊ मिली गौ आ!”