36. रूप बौदल़िणौ

एकी दिनै, यीशुऐ आपणै चीन च़ेलै, पतरस, याकूब, और यूहन्ना आपु आइलै निंऐ। (एऊ यूहन्ना च़ेलौ आ सेऊ आदमी नाईं सा ज़ुणिऐ यीशु लै बपतिस्मौ दैऔ थौ।) सै प्राथना कौरना लै एक उंच़ी धारा माथै डेवै।

ज़ेबी यीशु प्राथना कौरदै थौ लागौ औन्दौ ता तेसरौ मूंअ सुरज़ा ज़िणौ च़ौमकिलौ हुई। तेसरै जुड़कै प्याशै ज़िणै शेतै हुई गौऐ, ज़िणौ धौतरी माथै कुण धोआ तेथकु भी बौढ़ियौ शेतौ।

तैबै मूसा और एलिय्याह भविष्यद्वक्ता पौगड़ै हुऐ। ईऐ मौरद एज़ी धौतरी माथै ऐज़ै बौगता कु कई शौ बौरीष पैहलै रौआ थै। तिउंऐ यीशु रै मौरना रै बारै दी बुशै लाई, कि सेऊ शीग्री इ यरूशलेमा दी आमारै पापा री तांई पोरू मौरा आ।

ज़ैबै मूसा और एलिय्याह यीशु आइलै बुशै लाइन्दै थै लागै औन्दै तैबै पतरसै यीशु लै बोलौ, “आमारौ इदै रौइणौ भौलौ आ। आमै चीन ताम्बु चाणी, एक तुमु कालै, एक मूसा कालै, और एक एलिय्याह कालै।” पर पतरस नाईं ज़ाणा थौ कि सेऊ का सा बोलदै लागौ औन्दौ।

ज़ेबी पतरस बुशै लाइन्दै थौ लागौ औन्दौ, ता एक च़ौमकिलौ बादल़ तौल़ै आशिऔ तिऊं माथै छ़ाई गौ। तैबै तिउंऐ बादल़ा कु एक बाच़ आशदै शुणी। तिणीऐ बोलौ, “एऊ मैरौ छ़ोहरु आ ज़ासकु हाऊं भौरी प्यार कौराऊ। हाऊं एसकु खुश ऊ। एसरी शुणौ।” सै च़ीनिआ च़ेलै डौरी गौऐ और धौतरी माथै धौनी पौड़ी ऐरै।

तैबै यीशुऐ सै छ़ुऐ और बोलौ, “डौरौ नाईं! उठौ!” ज़ेबी तिउंऐ च़ारौ तौरफा दी देखौ। ता ज़ो भी तिऐ थौ सेऊ सिरफ यीशु थौ।

यीशु और सै च़ीनिआ च़ेलै तिंऐ धारा कु वापिस तौल़ै उतरी गौऐ। तैबै यीशुऐ तिउंलै बोलौ, “इबी ज़ो इदै हुऔ तेसरै बारै दी कासी कै नाईं बोलेऊ, हाऊं शीग्री मौराऊ और तैबै ज़िउंदौ हुआ ऊ। तेथ बासिऐ, तुमै लोगु कै बोली सौकाई।”