38. यीशु पौकड़ावा ई

हर साल, यहुदी लोग फसह रौ साज़ौ मौनावा थै। एऊ एज़ै बारै दी साज़ौ थौ कि कई साल पैहलै परमेश्वरै सै तिउंरै बुजुर्गु मिस्रा री गुलामी कु छ़ड़ाऐ थै। लगभग चीन बौरीष बासिऐ यीशुऐ साधारण रीति कौरी प्रचार कौरणौ और शिक्षा देणौ शुरु किऔ। यीशुऐ आपणै च़ेलेऊ लै बोलौ कि सेऊ तिऊं आइलै यरुशलेमा दी फसह रौ साज़ौ मौनाउणौ च़ाह सा, और एऊ भी कि तेस तिदै झ़ांगा ई।

यीशु रै च़ेलेऊ मांझ़ै यहुदा नावां रौ एक आदमी थौ। यहूदा च़ेलेऊ रै पैसै री थैली छ़ाड़नै रौ काम थौ, पर कई बारै सेऊ तिंऐ थैली कु पैसै गाड़ा थौ। यीशु और च़ेलेउ रै यरुशलेमा दी पौउंच़णै बासिऐ यहूदा, यहूदी अगुवै काऐ डैऔ। तिणीऐ पैसै रै बौदलै यीशु तिउंरै हाथाई पौकड़वाउणा री बूश छ़ाड़ी। सेऊ ज़ाणा थौ कि यहूदी अगुवै नाईं माना थै कि यीशु ही मसीह थौ। सेऊ ज़ाणा थौ कि सै तेस झ़ागणौ च़ाह थै

महायाजका रै बोलणा माथै यहूदी अगुवेउऐ यीशु तिउं रै हाथा दी पकड़ाउणा लै यहूदा कै तीस च़ांदी रै सिक्कै दै। एऊ तिणौ हुऔ ज़िणौ कि भविष्यद्वक्तै बोलौ थौ कि इणौ औआ। तैबै यहूदा मानी ऐरौ और पैसै निंइयौ डेई गौ। सेऊ यीशु पाकुड़ना दी तिउंरी मज़द कौरना लै केज़ौ मौकौ लोड़दै थौ लागौ औन्दौ।

यरुशलेमा दी, यीशुऐ आपणै च़ेलेऊ आइलै फसह रौ साज़ौ मौनाऔ। फसह री रोटी रै दौरान, यीशुऐ रोटी निंइयौ च़ोड़ी। तिणीऐ बोलौ, “इंऐ निंयौ और खाऔ। एऊ मैरौ शरीर आ ज़ास हाऊं तुमुलै देआ ऊ। एस मेरी यादा दी कौरिऔ।” इणै कौरी, यीशुऐ बोलौ कि सेऊ तिउंलै मौरा, यानिके तिउंलै सेऊ आपणौ शरीर बौल़ी कौरा आ।

तैबै यीशुऐ एक अंगुरा रै रौसा रौ एक खोरु निंयौ और बोलौ, “एस पीयौ। एऊ नौई वाचा रौ मैरौ लोऊ आ ज़ो कि हाऊं बहावा ऊ ताकि परमेश्वर तुमारै पाप माफ कौरा। हर बार एस पींणै रै बौगत मेरी यादा दी एस कौरौ ज़िणौ हाऊं इबी कौरदै ऊ लागौ औन्दौ।”

तैबै यीशुऐ आपणै च़ेलेऊ लै बोलौ, “तुमु मांझ़ा कु एक ज़ौणौ मुं पौकड़ावा।” च़ेलै हैरान हुई गौऐ,, और पूछ़दै लागै कि इणौ काम कुण कौरा? यीशुऐ बोलौ, “मुं पौकड़ाउणै वाल़ौ आदमी सेऊ आ ज़ासकै हाऊं इंऐ रोटी रौ टुकड़ौ दैआ ऊ।” तैबै तिणीऐ सै रोटी यहूदा लै देई।

तिंऐ रोटी निणै बासिऐ, यहूदा दी शैतान डेई गौ। यहूदा निकल़िऔ यीशु गिरफ्तार कौरना ले यहूदी अगुवे री मज़द कौरणा लै डेइ गौ। एऊ राची रौ बौगत थौ।

रोटी बासिऐ, यीशु और तेसरै च़ेलै जैतून डोकै दी डेई गौऐ। यीशुऐ बोलौ, “तुमै सारै आज़ राच़िऐ मुं छ़ाड़ाई। इणौ आ लिखौ औन्दौ, ‘हाऊं भेराल़डू झ़ांगाऊ और सारी भेरी वारै-पारै बागा ई।”’

पतरसै ज़वाब दैऔ, “च़ाऐ बाकी सारै ताऊं छ़ाड़ालै, पर हाऊं नाईं छ़ाड़दौ!” तैबै यीशुऐ पतरसा लै बोलौ, “शैतान तुमु सारै निणौ च़ाह सा, पर ओ पतरस, मुंइऐ ताउंलै प्राथना कौरी आ कि तु विश्वासा कु न हौटा। तैबै भी, आज़ राची, कुखड़ै बाशणा कु पैहलै तु चीया बारै इनकार कौराई कि तु मुं नाईं ज़ाणदौ।”

पतरसै तैबै यीशु लै बोलौ, “च़ाऐ हाऊं मौरू भी लौ, हाऊं केबी भी तैरौ इनकार नाईं कौरदौ!” बाकी ओरी च़ेलेउऐ भी इणी ई बोलौ।

तैबै यीशु आपणै च़ेलेऊ आइलै गतसमनी नावां री ज़ागाह दी डैऔ। यीशुऐ आपणै च़ेलेऊ लै प्राथना कौरना लै बोलौ ताकी शैतान तिउंरी परिक्षा न कौरा। तैबै यीशु आपु प्राथना कौरदै डैऔ।

यीशुऐ चीना बारै प्राथना कौरी, “ओ मैरै बाब, छ़ौंअटी अगर इणौ हूई सौका कि एस दुखा रौ खोरु पीणा लै मु्लै नाईं दै। पर अगर लोगु रै पाप माफ कौरणा लै केज़ी ओर बाट नाईं आ, ता तेरी इच्छ़ा पूरी च़ाईं हूई।” यीशु भौरी परेशान थौ और तेसरौ पसीनौ लोऊ रै टिपु ज़िणै थी। तेसकै तागती देणा लै परमेश्वरै एक स्वर्गदूत भेज़ौ।

हर बार प्राथना बासिऐ, यीशु आपणै च़ेलेऊ काऐ वापिस आशौ, पर सै सुतै औन्दै थै। ज़ैबै यीशु चीजी बारै आशौ ता यीशुऐ बोलौ, “उज़िऔ! मुं पौकड़वाउणै वाल़ौ इदै आ।”

यहुदी अगुवौ, सिपाई, और एक बौड़ी भीड़ा आइलै यहूदा आशौ। तिउंऐ तलवार और डींगै थै आणै औन्दै। यहूदै यीशु काऐ आशिऔ तेसलै बोलौ, “ओ गुरु, ढाल,” और सेऊ खोबियाऔ। तिणीऐ गिरफ्तार कौरणै वाल़ै आदमी लै यहूदी अगुवौ दी परगट कौरणा लै इणौ कीऔ आ। तैबै यीशुऐ बोलौ, “ओ यहूदा, का तू मुं एक खोबु कौरी पौकड़ावा ई?”

ज़ैबै सै सिपाई यीशु पाकुड़दै लागै औन्दै थै, तैबै पतरसै आपणी तलवार गाड़ी और महायाजका रै सेवका रौ एक कौन्थु काटौ। यीशुऐ बोलौ, “तलवार दूर कर! हाऊं आपणै बाबा कु मुं बौच़ाउणा लै स्वर्गदूतु री एक फौज़ा लै औरज़ कौरी सौका ऊ। पर मुंइऐ मैरै बाबा री बूश मानणी आ।” तैबै यीशुऐ तेस आदमी रौ कौन्थु ठीक कौरी गौ। तैबै सारै च़ेलै भागी गौऐ।