39. यीशु माथै मुकद्दमौ च़ाला सा

आबै एऊ आधी राची रौ बौगत थौ। तिऊं सिपाईऐ यीशु महायाज़का रै घौरा कै निंयौ, कैलैकि सेऊ यीशु कु स्वाल कौरणौ च़ाह थौ। पतरस दूरा कु तिऊं रौ पीछ़ौ कौरदै लागौ औन्दौ थौ। ज़ैबै सिपईऐ यीशु महायाज़का रै घौरै आणी गौ ता पतरस बाइरै रुकीऔ आपु आगी तापदै थौ लागौ औन्दौ।

घौरा भित्तै, यहूदी अगुवेउऐ यीशु माथै मुकद्दमौ च़ौलाऔ। सै तेसरै खिलाफ झ़ूठी बुशेऊ बोलणा लै भौरी का झ़ुठै गवाह निईयौ आशै। हालांकि, तिउंरी बुशै एकी दूजै कु नाईं मिला थी, एथीलै यहूदी अगुवै इणौ साबित नाईं कौरी सौकै कि सेऊ केज़ी बुशा रौ दोषी थौ। यीशुऐ कुछ़ नाईं बोलौ।

आखिरा दी, महायाज़कै सीधौ यीशु भिलै देखिऔ बोलौ, “आमुकै बोल कि का तु ही ज़िउंदै परमेश्वरा रौ छ़ोहरू मसिह आ?”

यीशुऐ बोलौ, हाउं ऊ, तुमै मुं परमेश्वरा काऐ बोशौ औन्दौ और सौरगा कु आशदै भी देखाई।” महायाज़कै आपणै जुड़कै च़िरै कैलैकि ज़ो यीशुऐ बोलौ सेऊ सेज़ी बुशा माथै तेसरै भौरी रोष आशै थै। सेऊ ओरी अगुवे माथै च़िखौ, “आमुकै इणौ बोलणा लै कासी ओर गवाह री ज़रूरत नाईं आ कि एज़ै आदमिऐ का किऔ आ! तुमुऐ आपु ई सेऊ इणौ बोलदै शुणौ आ कि सेऊ परमेश्वरा रौ छ़ोहरु आ। तेसरै बारा दी तुमुरौ का बिच़ार आ?”

सारै यहूदी अगुवे महायाज़का लै ज़वाब दैऔ, “सेऊ मौरना रै काबिल आ!” तैबै तिउंऐ यीशु री आखी दी पाट्टी बानी, और तेस माथै थूकौ, और सेऊ पिटौ, और तेसरौ मौज़ाक उड़ाऔ।

और पतरस, ज़ेबी सेऊ घौरा बाइरै इंतज़ार कौरदै लागौ औन्दौ थौ। ता एक दासी छ़ोटुड़िऐ सेऊ देखौ। तिंऐ तेसलै बोलौ, “तु भी यीशु आइलै थौ!” पतरसै मौना कौरी ऐरौ। बासिऐ, कासी दुजी छेउड़िऐ एज़ी बूश बोली, और पतरसै तौइंऐ मौना कौरी ऐरी। आखिरा दी, कुछ़ लोगुऐ बोलौ, “आमै ज़ाणी ई कि तु यीशु आइलै थौ कैलैकि तुमै दूई गलीला रै ई।”

तैबै पतरसै बोलौ, “अगर हाऊं एस आदमी ज़ाणाऊ ता परमेश्वरै मुलै शाप च़ाईं दैऔ!” फेटी ई पतरस इणै कौरी कौसम खाणै बासिऐ, एक कुखड़ौ बाशौ। यीशुऐ पीछ़ांऊ मुड़िऔ पतरस देखौ।

पतरस तिदरा कु डेई एरौ और डीकरी-डीकरीऔ लैरदै लागौ। सेज़ै बौगतै, यीशु पौकड़ाउणै वाल़ै यहूदै देखौ कि यहूदी अगवेउऐ यीशु लै मौता री सौज़ा देई आ। यहुदा भौरी दुखी हूई गौ और डेइऔ आपु मौरी गौ।

तेस देशा रौ राज्यपाल पिलातुस थौ। सेऊ रोम देशा लै काम कौरा थौ। यहूदी अगुवै यीशु तेस काऐ निंयौ। सै च़ाह थै कि पिलातुस तेसलै मौता री सौज़ा दिया और सै तेस झ़ांगा। तैबै पिलातुसै यीशु कु पूछ़ौ, “का तु यहुदिऊ रौ राज़ौ ई?”

यीशुऐ ज़वाब दैऔ, “ताइंऐ सौच्चौ इ बोलौ आ। पर मैरौ राज़ इऐ धौतरी रौ नाईं आ। अगर औआ थौ ता मैरै दास मेरी तांइऐ लौड़ा थै। हाउं धौतरी माथै परमेश्वरा रै बारै दी सौच़्च़ौ बोलणा लै आशौ ऊ। हर एक ज़ौणौ ज़ुण परमेश्वरा आइलै प्यार कौरा सा सेऊ मेरी शुणा सा।” पिलातुसै बोलौ, “ता सौच़ का सा?”

यीशु आइलै बुशै लाइणै बासिऐ, पिलातुसै बाइरै भीड़ा काऐ डेइऔ बोलौ, हाऊं इणी केज़ी बज़ाह नाईं पाईंदौ कि एऊ आदमी झ़ांगणा रै काबिल आ। “पर यहूदी गुरुऐ और भीड़ै च़िखिऔ बोलौ, एस क्रुसा माथै च़ौड़ाऔ।” पिलातुसै ज़वाब दैऔ, “सेऊ कुछ़ भी गलत कौरणै रौ दोषी नाईं आ।” पर सै औज़ौ भी ज़ोर-ज़ोरै च़िखदै लागै। तैबै पिलातुसै चिजी बारै बोलौ, “सेउ दोषी नाईं आ!”

पिलातुस डौरी गौ कि सै भीड़ लौड़ाई शुरु कौरा, एथीलै सेऊ आपणै सिपाइउ रै ज़ौरिऐ यीशु क्रुसा माथै च़ौड़ाउणा लै मानी गौ। रोमी सिपाइउऐ यीशु दी कोड़ै लाऐ, और तेसकै राज़ै-महाराज़ै रै जुड़कै भिड़ाऐ, और तेसरै मुंडा माथी कांडेऊ कौरी चाणौ औन्दौ ताज़ छ़ाड़ौ। और सै इणै बोलिऔ तेसरौ मौज़ाक उड़ाउंदै लागै, “देखौ, यहूदिऊ रौ राज़ौ!”