40. यीशु क्रुसा माथै च़ौड़ावाई

यीशु रौ मौज़ाक कौरणै बासिऐ, सिपाईऐ सेऊ क्रुसा माथै च़ौड़ाउणा लै नींइ ऐरौ। तिउंऐ सेउ क्रुस तेसी कु च़ुंगाऔ ज़ास माथै सेऊ लटकाउणौ थौ।

तिऊं सिपाइउऐ यीशु तिंऐ ज़ागाह दी निंयौ ज़ासलै “खोपड़ी” ज़िणी ज़ागाह बोलाई और यीशु रै हाथ और बांगणै क्रुसा दी ठोकी एरै। यीशुऐ बोलौ, ओ बाब, इऊं माफ कर, कैलैकि इऐ नाईं जाणदै कि इऐ का ई कौरदै लागै औन्दै।” तिउंऐ एक तौखती भी तेसरै मुंडा काऐ क्रुसा माथै टांगी गौई। तेथदी थौ लिखौ औन्दौ, “यहूदिऊ रौ राज़ौ।” पिलातुसै तिउंलै इणै लिखणा लै बोलौ औन्दौ थौ।

तैबै सिपाइउऐ यीशु रै जुड़केउ लै च़िट्ठी पाई। ज़ेबी तिउंऐ इणौ किऔ ता तिउंऐ सै भविष्यद्वाणी पूरी कौरी ज़ो बोला थी, “तिउंऐ मैरै जुड़कै आपु मांझै बांटी एरै, और मैरै जुड़का लै च़िट्ठी पाई।”

तिदै दूई डाकू भी थै, ज़ो सिपाइउऐ सेज़ै बौगतै क्रुसा माथै च़ौड़ाऐ थै। तिउंऐ सै यीशु री दूइया भिलै थै टांगै औन्दै। तिऊं मांझ़ा कु एकी डाकुऐ यीशु रौ मौज़ाक उड़ाऔ, पर दूजै डाकुऐ बोलौ, “का तु नाईं डौरदौ कि परमेश्वर ताउंलै डांड दैआ सा? आमै भौरी का गांदै काम कौरणा रै दोषी आ, पर एऊ आदमी ता बिण दोषा रौ आ।” तैबै तिणीऐ यीशु लै बोलौ, “ज़ैबै तु आपणै राज़्य दी आशा लौ ता छ़ौअंटी मुं आद छ़ाड़ै।” यीशुऐ ज़वाब दैऔ, “आज़ ई तु मुं आइलै सौरगा दी औआ ई।”

यहूदी अगुवे और भीड़ा रै ओरी लोगुऐ यीशु रौ मौज़ाक उड़ाऔ। तिउंऐ तेसलै बोलौ, “अगर तु परमेश्वरा रौ छ़ोहरु ई, ता क्रुसा कु तौल़ै उतुर और आपु बौच़ाऊ! तैबै आमै ताऊं माथै विश्वास कौरी ई।”

तेभी ई पूरै देशा रौ सौरग पुरौ काल़ौ हुई गौ, हाल़ांकी सेऊ दूसकौ बौगत थौ। और चिया घाण्टै झ़ाऊं इणी ई रौ।

तैबै यीशुऐ हाका देइऔ बोलौ, “पूरौ हूऔ! ओ बाब, हाऊं आपणी आत्मा तैरै हाथा दी सौंभाल़ा ऊ।” तैबै तिणीऐ आपणौ मूंड झ़ुकाऔ और आपणै प्राण छ़ाड़ी ऐरै। ज़ेबी सेऊ मौरौ ता एक भुईंच़ल़ पौड़ौ। और सेऊ मन्दिरा रौ बौड़ौ पौरदौ ज़ो परमेश्वरा री मौज़ुदगी कु लोगु अलग कौरा थौ माथा कु तौल़ा झ़ाऊं च़िरुइऔ दूई भिलै हुई गौऔ।

आपणी मौता रै ज़ौरिऐ, यीशुऐ लोगु लै परमेश्वरा काऐ आशणै री बाट खोली एरी आ। ज़ेबी यीशु री च़ोकसी कौरणै वाल़ौ एक सिपाइऐ ज़ो कुछ़ हुऔ थौ एऊ सारौ देखौ ता तिणीऐ बोलौ, पाकौ ई, एऊ आदमी बिणा दोषा रौ थौ। एऊ परमेश्वरा रौ छ़ोहरू आ।”

तैबै युसुफ और नीकुदेमुस नावां रै दूई यहूदी अगुवै आशै। सै विश्वास कौरा थै कि यीशु ही मसीह थौ। तिउंऐ पिलातुसा कु यीशु रौ मौड़ौ मांगौ। तिउंऐ यीशु रौ मोड़ौ कापड़ै दी मेटौ। तैबै सै तेस एकी डोका माझ़ै काटिऔ चाणी औन्दी कौबरा दी नींइ गौ और कौबरा भित्तै छ़ाड़ी एरौ। तैबै तिउंऐ तिऐं कौबरा रौ दार बन्द कौरना लै एक बौड़ौ पात्थर लाई ऐरौ।