41. परमेश्वर यीशु मौरे औन्दैउ मांझ़िया कु ज़िउंदौ कौरा सा

सिपाइऊ कौरी यीशु क्रुसा माथै च़ौड़ाउणै बासिऐ, यहूदी अगुवे पिलातुसा लै बोलौ, “तिणी झ़ुठै, यीशुऐ बोलौ थौ की सेउ चिना दिना बासिऐ मौरे औन्देउ मांझ़िया कु ज़िउंदौ उठा आ। कुणिऐ एउ पाकौ कौरणै लै कौबरा री च़ोकसी जा कौरणी की तैसरै च़ैलै तैसरी लाश च़ोरिये ना निंया। अगर सै इणौ कौरालै ता तिउंऐ बोलनौ आ की सेउ मौरे औन्दैउ मांझ़िया कु ज़िउंदौ हुऔ आ।

पिलातुसै बोलौ, “कुछ सिपाई नियौ, और ज़िणौ तुमै कौरी सौका ई तिणौ कौबरा री च़ोकसी कौरौ।” एथीलै तिउंऐ तिऐं कौबरा दी डैउणा रै दारा दी एक मुहर लाइ गोई। तिउंऐ इणौ पाकौ कौरणा लै तिऐ सिपाई भी बौशाल़ी गौऐ की कोई भी तेसरी लाश च़ोरी ना बौल़ा।

यीशु रै मौरनै रै दुजै दिनै आरामा रौ दीन थौ। कोई भी आरामा रै दीने काम नाईं कौरी सौका थौ। एज़ी ताइंऐ यीशु रौ कोई भी गोशटण कौबरा माथै नाई आशौ थौ। पर आरामा रै दुजै दिनै, दोउती राची, कुछ़ छ़ेउड़ी यीशु री कौबरा माथै डैउणा लै त्यार हुई। सै तौइंऐ तेसरै मौड़ै दी मौसालौ लाइणौ च़ाहा थी।

तिउं छ़ेउडीउ रै पौउंच़णै कु पेहलै, कौबरा माथै एक बौडौ भुइंच़ल़ आशौ। सौरगा कु एक स्वर्गदुतै सेऊ पात्थर ढ़ाल़ी गौ ज़ेथ कौरी दार बौन्द थौ औन्दौ और तेथ माथी बोशी गौ। एउ स्वर्गदुत च़ौमुकदै थौ लागौ औन्दौ। कौबरा काऐ ज़ो सिपाई थै तिउंऐ सेउ देखौ। सै ऐती डौरी गौए थे की मौरै औन्दै बाशिऐ धौनी पौड़ौ गौऐ।

ज़ेबी सै छ़ेउड़ी कौबरा काऐ पौउंच़ी ता तिणी स्वर्गदुतै तिउंलै बोलौ, “नाईं डौरौ। यीशु इदै नाई सा। सेउ मौरे औन्देउ मांझ़िया कु ज़िउंदौ हुई गौ आ, ज़िणौ की तिणीऐ बौलौ थौ की सैउ ज़िउंदौ हुआ सा! कौबरा दी लोड़ौ और देखौ" तिऊं छ़ेउडिऐ कौबरा बितै और ज़िऐ यीशु री लाश छ़ाड़ी ऐन्दी थी तिए लोड़ौ और देखौ की तेसरी लाश तिऐ नाईं थी।

तेबै तिणी स्वर्गदुतै तिऊं छ़ेउड़िउ लै बोलौ, “डेइऔ तेसरै च़ेलेऊ कै बोलौ, ‘यीशु मौरै औन्दै रै मांझ़िया कु ज़िउंदौ हुइ गौ आ और सेऊ तुमु कु औगाड़ी-औगाड़िऐ गलीला लै डेवा'"

सै छ़ेउड़ी हैरान हुई और भौरी खुश हुई। सै च़ेलेऊ कै ऐज़ी खुशी री खौबर शुणाउणा लै दौड़ी।

ज़ेबी सै छ़ेउड़ी चैलेउ कै खुशी री खौबर शुणाउणा लै आपणी बाटाई थै, ता यीशु तिऊं काऐ परगट हुऔ। सै तेसरी टांगा माथी धौनी पौड़ी। तैबै यीशुऐ बोलौ, “नाईं डौरौ डेइऔ मैरै च़ेलैऊ लै गलीला लै डैउणा लै बोलौ। सै तिऐ मुं देखा लै।"