42. यीशु रौ सौरगा लै डेउणौ

ज़ेज़ै दिनै परमेश्वरै यीशु मौरै औन्देऊ मांझ़िया कु ज़िउंदौ कियौ थौ, तेसरै च़ेलै नौज़दिका रै गांवा दी थै डेउंदै लागै औन्दै। हाण्डदी भारै सै यीशु आइलै ज़ो हुऔ थौ, तेथरै बारै दी बुशै लाइन्दै थै लागै औन्दै, तिऊंकै आश थी की सेउ मसीह थौ, पर तैबै भी सेऊ झ़ांगौ आ। ऐबै सै छ़ेउड़ी बोलाई इणौ कि सेउ तौइंऐ ज़िउंदौ हुइ गौ आ। सै नाईं ज़ाणा थै की केज़ी बुशा माथी बिश्वास कौरणौ आ।

यीशुऐ तिऊं काऐ आशियौ तिऊं आइलै हान्डणौ शुरु कियौ, पर सै तेस प्राणी नाईं बौल़ै। तिणिऐ पु्छ़ौ की तुमै केज़ै बारे दी बूशै लाइंन्दै लागै औन्दै। बितै औन्दै दिनै यीशु आइलै ज़ो हुऔ थौ तेथारै बारै दी सारौ बोलौ। तिऊंऐ सुच़ौ की सै कास परदेशी आइलै ई बुशै लाइन्दै ई लागै औन्दै ज़ो नाई ज़ाणा थौ की यरुशलेमा दी का हुऔ थौ।

तैबै यीशुऐ सै सौमझ़ाऐ थै की परमेश्वरा रौ वच़न मसीह रै बारै दी का बोला सा। भौरी पहलै, भविष्यद्वक्तुऐ बोलौ थौ की बुरै लोग मसीह दुखी कौराई और झ़ांगाई। पर भविष्यद्वक्तुऐ इणौ भी बोलौ थौ की सेउ चिजै दिनै ज़िउंदौ हुआ सा।

ज़ेबी सै तेस इलाकै दी पौंउच़ै ज़िऐ सै दुई ज़ौणै रौइणौ च़ाआ थै, तेबी झ़ाउं फिलहाल ब्याल़ हुइ गौइ थी। तिऊंऐ यीशु रुकणा लै पुछ़ौ, यानिकै सेऊ तिऊं आइलै एकी घौरा दी डैऔ। आपणै ब्याल़ी री रोटी खांदै बोशी गौऐ। यीशुऐ एक रोटी निइंऔ तेथलै परमेश्वरा रौ धन्यवाद देऔ, और तैबै सै चोड़ी। तेभी तिऊंऐ ज़ाणी गौ की सेऊ यीशु थौ। पर तेभी ई सेउ तिऊंरी आखी काऐ रौ छ़ुपी गौ।

तिऊं दुई ज़ौणेउऐ एकी दुज़ै कु बोलौ, "सेउ यीशु थौ! एथीलै ज़ेबी तिणीऐ आमुकै परमेश्वरा रौ वच़न सौमझ़ाऔ थौ ता आमै भौरी उताउल़ै थै!" ता फेटी ई सै, तिदरु निकल़िऔ वापिस यरुशलेमा लै डेऐ। ज़ेबी सै पौउंच़ै ता तिउंऐ च़ेलेऊ लै बोलौ, "यीशु ज़िउंदौ सा! आमुऐ सैउ देखौ आ!"

ज़ेबी च़ेलै बुशै लाइन्दै थै लागै औन्दै, यीशु तेभी तेस कौमरै दी तिऊं काऐ परगट हुऔ। तिणीऐ बोलौ, "तुमुलै शान्ति च़ाईं मिली!" च़ेलैउऐ सुंच़ौ की एऊ कोई भूत थौ, पर यीशुऐ बोलौ, "तुमै केलै डौराई? तुमै इणौ कैलै नाईं सुंच़दै की एऊ सौच़ी ई हाऊं यीशु ऊ? मैरै हाथ और लात देखौ। भूता कै इणौ शरीर नाईं औन्दौ ज़िणौ मुकै सा।" इणौ दैखाल़णा लै की सेउ कोई भूत नाईं आ तिणीऐ खाणा लै कुछ़ मांगौ। तिऊंऐ तेसकै माच्छ़ी रौ ऐक टुकड़ौ दैऔ, और तिणिऐ सेउ खाऔ।

यीशुऐ बोलौ, मैरै बारे दी परमेश्वरा रौ वच़न ज़ो कुछ़ बोला सा सेउ घौटा सा। मुंइऐ तुमुकै बोली गौ थौ की ऐथारौ हुणौ पाकौ सा।" तैबै यीशुऐ तिऊंकै परमेश्वरा रौ वच़न आच्छ़ै कौरी सौमझ़ाऔ। तिणीऐ बोलौ, "भौरी पहलै भविष्यद्वक्तुऐ लिखौ थौ की मूइऐ, मसीहै दुख उठाउणै ज़ा ई, मौरणौ ज़ा सा और तैबै चिजै दिनै मौरै औन्देउ मांझ़िया कु ज़िउंदौ ज़ा हुणौ।"

तिऊं भविष्यद्वक्तुऐ इणौ भी लिखौ थौ की मैरै च़ेलै परमेश्वरा रै वच़ना री घोषणा कौराई। सै हर एकी लै आपणै पाप मानणा लै बोलाई। अगर सै इणौ कौराई ता परमेश्वर तिऊंरै पाप माफ कौरा। मैरै च़ेलै एज़ी खौबरा रौ परच़ार कौरणौ यरुशलेमा कू शुरु कौराई। तैबै सै सारी ज़ागाह सारी ज़ातिउ दी डिआई। तुमै लोग मेरी हर एक बुश और कामा रै गवाह ई ज़ो मुइऐ बोलौ और कियौ थौ।, और सारेउ रौ ज़ो मू आइलै हुऔ आ।

आगलै चाल़ीस दिनु रै दौरान, यीशु आपणै च़ेलैउ माथै काई बारै परगट हुऔ। एकी बारै ता सेऊ एकी ही बौक्ता ई 500 कु ज़ादै लौगु माथै परगट हुऔ! तिणीऐ आपणै च़ेलैउ माथै काई तरिकै कौरी साबित किऔ की सेउ ज़िउंदौ थौ, और तिणिऐ तिऊंकै परमेश्वरा रै राज़्य रै बारै दी शिक्षा देई।

यीशुऐ आपणै च़ेलेऊ लै बोलौ, "परमेश्वरै मुकै सौरग और धौतरी रै हर एकी माथै राज़ कौरणै रौ अधिकार आ दैऔ औन्दौं। एथीलै ऐबै हाउं तुमुलै बोलाऊ डैऔ सारी ज़ाती रै लोगु च़ैलै चाणौ। इणौ कौरणा लै, तुमुऐ बाब, छ़ौहरु, और पवित्र आत्मा रै नावा कौरी बपतिस्मा दैणौ आ। ज़ो कुछ़ भी मुइंऐ तुमुलै हुकम देऔ आ तिऊं सारी बुशेउ भी तिउंकै तुमै मानणी शिखाऔ। याद छ़ाड़ौ, हाउं तुमु आइलै सौदा रौआउ।"

यीशु रै मौरै औन्देउ मांझ़िया कु ज़िउंदै हुणै रै चाल़ीस दिना बासिऐ, तिणिऐ आपणै च़ेलेउ लै बोलौ, "ज़ेबी झ़ाऊं मैरौ बाब तुमुलै तागत नाईं दिया लौ तेबी झ़ाऊं यरुशलेमा दी रुकी रौएऊ। सेउ तुमू माथै पवित्र आत्मा छ़ाड़णै रै ज़ौरिऐ इणौ कौरा" तैबै यीशु सौरगा दी डैइ गौ, और एकी बादलै सेउ तिऊंरी नौदरी कु छ़ुपाइ गौ। सौरगा दी यीशु सारी च़िज़ू माथै राज़ कौरणा लै परमेशवरा रै सुल्टी भिलै बोशी गौ।