43. कलीसिया री शुरुआत

यीशु रै सौरगा लै डैउणै बासिऐ, च़ेलै यरुशलेमा दी रुकै ज़िणौ की यीशु ऐ तिउंलै कौरणै रौ हुक्कुम दैऔ थौ। तिदलै विश्वासी लोग लगातार एकी साथाई प्राथना कौरणा लै कौठै हुआ थै।

हर साल, फसह रै साज़ै रै 50 दिनु बासिऐ, यहुदी लोग पिन्तेकुस्ता रौ साज़ै रै दिनु मौनाउणा लै यरुशलेमा दी कौठै हुआ थै। पिन्तेकुस्त मौनाउणै रौ बौगत यीशू रै सौरगा लै डैउणै रै तकरीबन एक हौपतै रै बासिऐ आशौ थौ।

ज़ेज़ै बौगतै बिश्वासी लोग एकी साथै कौठै थै, ता ज़ेज़ै घौरा दी सै थै सेउ घौर भौरी बागुरा री बाच़ा कौरी भौरुई गौ। तैबै आगी री लौपटै ज़िणौ दिशणै वाल़ौ कुछ़ सारै बिशवासिऊ माथै परगट हुऔ। सै सारै पवित्र आत्मा कौरी भौरुई गौऐ और दुज़ी बोलिऊ दी परमेश्वरा री स्तुति कौरदै लागै। इऐ सै बोली थी ज़ास बोलना लै सै पवित्र आत्मै त्यार किऐ थै।

ज़ेबी यरुशलेमा दी रौइणै वाल़ै लोगुऐ सेउ हालौ शुणौ, ता सै भौरी का तिउं देखणा लै एकी साथाई आशै की का थौ हुन्दै लागौ औन्दौ। तिउंऐ बिशवासी परमेशवरा रै ज़ौरिऐ कौरै औन्दै बौड़ै-बौड़ै कामा री घोषणा कौरदी भारै शुणै। सै हैरान थै कैलैकी सै तिऊं काम आपणी ही बोली दी थै शुणदै लागै औन्दै।

इउं मांझ़िया कु कुछ़ लोगुऐ बोलौ की इऐ च़ेलै नौशै दी ई। पर पतरस खौड़ौ हुऔ और तिउंलै बोलदै लागै, "मेरी बूश शुणौ! इयै लोग नौशै दी नाईं ई! ऐथारी बज़ाऐ, ज़ो तुमै देखाई सेऊ इणौ सा ज़िणौ योऐल भविष्यद्वक्तै बोलौ थौ कि: परमेश्‌वर इणौ बोला कि, ‘आखरी रै दीनु दी, हाऊं आपणी आत्मा दियाऊ

“ओ इस्राइली मौरदेउओ, यीशु एक इणौ आदमी थौ ज़ुणिऐ इणै दैखाउणा लै की सेउ कुण थौ भौरी नोखै काम किऐ थै। तिणिऐ परमेश्वरा री शक्ती कौरी भौरी सारै नोखै काम किऐ थै। तुमै इणौ ज़ाणाई, केलैकी तुमुऐ इऐ काम देखै ई। पर तूमुऐ सेउ क्रुसा माथै च़ौढ़ाऔ!”

यीशु मौरी गौ पर परमेश्वरे सेउ मौरे औन्दैउ मांझ़िया कु ज़िउंदौ कौरी गौ। ईणीऐ सै बूश पुरी कौरी गोइ ज़ो एकी भविष्यद्वक्तै लिखी थी: ‘तु आपणै पवित्र ज़ौणेऊ कौबरा दी शौड़नै नाईं दैन्दौ।’ आमै गवाह ई की परमेश्वरै यीशु तौंइऐ ज़िउंदौ कौरी गौ।”

परमेश्वर बाबै यीशु आबै आपणी सुल्टी भिलै बौशाल़ियौ तेसलै आदर दैऔ आ। और यीशुऐ आमुलै पवित्र आत्मा भेज़ी सा ज़िणौ की तिणिऐ वायदौ कियौ थौ कि सेऊ भेज़ा। पवित्र आत्मा ई तिऊं काम हुणै दैन्दै लागी औन्दौ ज़ास तुमै आज़ देखदै और शुणदै ई लागै औन्दै।“

तुमुऐ सेऊ यीशु क्रूसा माथै च़ौढ़ाऔ। पर पाकौ ज़ाणौ की परमेश्वरै यीशु सारी च़िज़ू माथै प्रभु और मसीह दुई चाणा सा!"

पतरसा री बुशै तिऊं लोगु रै ज़िवा दी च़ुबी गोई थी। ऐथिलै तिउंऐ पतरस और चेलेऊ कु पुछ़ौ, "ओ भाइउऔ आमुऐ का च़ांई कौरणौ?"

पतरसै तिउंलै ज़वाब दैऔ, “तुमु मांझ़िया कु हर एक ज़ौणौ आपणै पापा लै माफी मांगौ ताकी परमेश्वर तुमारै पाप माफ कौरा, और यीशु मसीह रै नावा कु बपतिस्मा निया। तैबै सेऊ वरदाना आइलै पवित्र आत्मा भी दिया सा।”

पतरसै ज़ो बोलौ तेथ माथै तकरीबन चिन हज़ार लोगुऐ विश्वास कियौ और यीशु रै च़ेलै बौणी गौऐ। तिउंऐ बपतिस्मा निंऔ और यरुशलेमा री कलिसिया रै हिस्सौ बौणी गौऐ।

ज़ेबी तिऊं खास च़ेलेउऐ तिउंकै शिक्षा देई ता विश्वासिउऐ घौड़ी-घौड़िऐ शुणौ। सै रोज़ आपु मांझ़िऐ मिला थै और कौट्ठै रोटी खा थै और तिउंऐ रोज़ एकी दुज़ा लै प्राथना कौरी। तिउंऐ मिलियौ परमेश्वरा री बौड़ाई कौरी ओर ज़ो कुछ़ भी तिउंरौ थौ तिउंऐ एकी दुज़ै आइलै बाटौं। इलाकै रै हर एक आदमी तिउंलै आच्छ़ौ विच़ार छ़ाड़ा थौ। ज़ादै कु ज़ादै लोग विशवासी बौणदै रौऐ।