44. पतरस और यूहन्ना एक भिखारी च़ागौं कौराई

एकी दिनै, पतरस और यूहन्ना मंदिरा दी डै। तिऐ एक लौंगड़ौ आदमी भिखा मांगणा लै खौल़ै दी थौ बौशौ औन्दौ।

पतरसै तेस लौंगड़ै आदमी भिलै देखौ और बोलौ, “मुके ताउंकै दैणा लै पैसै ता नाईं आसतै। पर ज़ो मुकै आसती सा तेस हाउं ताउंकै दिआऊ। यीशु रै नावां कु उठ और आंडदै लाग!"

तेभी ई परमेश्वरै सेउ लौंगड़ौ आदमी च़ांगौ कौरी गौ। तिणीऐ ओरु-पोरु हाडंणौ और उछ़ुलणौ, और परमेश्वरा री स्तुति शुरू कौरी गौई। मंदिरा रै खौल़ा दी सारै लोग हैरान थै।

फेटी ही लोगु री एक भीड़ तेस आदमी देखणा लै आशी ज़ो ठीक हुई गौ थौ। पतरसे तिउंलै बोलौ, “एउ आदमी ठीक आ, पर एज़ी बुशा माथै हैरान ना हुऔ। आमुऐ एउ आपणी शौक्ती कौरी ठीक नाईं कियौ, या एथलै नाईं की आमै परमेश्वरा रौ आदर कौरी सी। बल्की सेउ यीशु सा ज़ुणिऐ एउ आदमी आपणी शौक्ती कौरी ठीक कियौ आ, कैलैकी आमै यीशु माथै भरौसौ कौरी ई।"

सै तुमै ई ज़ुणिऐ तेस रोमी राज्यपाला कै यीशु ज़ांगणा लै बोलौ थौ। तुमूऐ सेउ झ़ांगौ ज़ुण सारेउ कै ज़िदंगी दिया सा। पर परमेश्वरै सेउ ज़िउंदौ कियौ। तुमूऐ नाईं सौमझ़ौ की तुमै का ई कौरदै लागै औन्दै, पर ज़ेबी तुमै तिउं कामा कौरदै थै लागै औन्दै, ता ज़ो भविष्यद्वक्तुऐ बोलौ थौ सेऊ पुरौ हुऔ। तिउंऐ बोलौ थौ की मसीह दुख उठावा और मौरा सा। परमेश्वरै एऊ ईणै तरिकै कौरी हुणै दैऔ। एथीलै ऐबै, आपणै पाप मानौ और परमेश्वरा री भिलै फिरौ, ताकी सेउ तुमारै पाप धोइयौ माफ कौरा।

ज़ेबी मंदिरा रै अगुवेउऐ पतरस और यूहन्ना शूणै, ता सै भौरी घौबराई गौऐ। एथीलै तिउंऐ सै पाकड़ियौ ज़ेलखानै दी पाई गौऐ। पर ज़ो पतरसै बोलौ थौ तेथ माथै भौरी का लोगुऐ विश्वास कियौ। यीशु माथै विश्वास कौरणै वाल़ैउ री गिणती तकरीबन पांज़ हज़ार हुई गौई।

आगलै दिनै, तिऊं यहुदी अगुवेउवै पतरस और यूहन्ना महायाजक और दुज़ै धार्मिक अगुवेउ रै सामनै निऐ। सेउ आदमी भी आणौ ज़ो लौंगड़ौ थौ। तिउंऐ पतरस और यूहन्ना कु पुछ़ौ, “की केज़ै हौखा कौरी तुमुऐ एउ लौंगड़ौ आदमी च़ांगौ कियौ आ?"

पतरसै ज़वाब दैऔ, “एउ आदमी ज़ो तुमूरै सामणै खौड़ौ सा एउ यीशु मसीह री शौक्ती कौरी ठीक कियौ आ। ज़ो तुमूऐ यीशु क्रुसा माथै च़ौढ़ाऔ, पर परमेश्वरै सेउ तौंई ज़िउंदौ कियौ! तुमूऐ सेउ नाईं मानौ, पर यीशु री शौक्ती रै अलावा उद्धार पाइणै री कौई दुज़ी बाट नाईं आसती!”

सै अगुवे हैरान थै की पतरस और यूहन्नै भौरी हिम्मता कौरी बुशै लाई। तिउंऐ देखौ की इऐ मामुली मौरद थै ज़ो की अनपढ़ थै। पर तैबै तिउंकै याद आशौ की इऐ आदमी यीशु आइलै रौऐ थै। एथीलै इउंऐ तिउंलै बोलौ, “आमै तुमूलै भौरी बौड़ी सौज़ा देइ अगर तुमै एस आदमी यीशु रै बारै दी लोगु कै कोई औज़ौ खौबर शुणाउवाई।” इणी भौरी का बुशेऊ बोलणै रै बासिऐ, तिउंऐ पतरस और यूहन्ना डेउणै दै।