45. स्तिफनुस और फिलिप्पुस

मसीह रै पैहलै अगुवे रै बिच़ाई स्तिफनुस नावां रौ एक आदमी थौ। सारै लोग तेसरौ आदर कौरा थै। पवित्र आत्मै तेसकै भौरी शौक्ती और बुध्दि थी देई ऐन्दी। स्तिफनुसे भौरी का चमत्कार किऐ थै। ज़ेबी तिणीऐ यीशु माथै भरोसौ कौरणै रै बारै दी शिक्षा देई ता भौरी का लोगुऐ तेथा माथी विश्वास कियौ।

एकी दिनै, स्तिफनुस यीशु रै बारै दी शिक्षा देन्दै थौ लागौ औन्दौ, और कुछ़ इणै यहुदी आशै ज़ुणियै यीशु माथै बिश्वास नाईं कियौ थौ और तेस आइलै बोल-च़ाल कौरणौ शुरु कौरी गौ। सै भौरी रोशुइ गौऐ, एथीलै सै धौर्मा रै अगुवेउ काऐ डेइ गौऐ और तेसरै बारे दी झ़ूठ बोलौ। तिउंऐ बोलौ, “स्तिफनुस, मुसा और परमेश्वरा रै बारै दी बुरी बुशै बौलदै शुणै ई!" एथीलै धौर्मा रै अगुवेउऐ स्तिफनुस पाकड़ी गौ और सेउ महायाजक और यहुदी रै ओरी अगुवे रै सामणै नियौ। औज़ौ भी झ़ुठै गवाह आशै और तिउंऐ स्तिफनुसा रै बारै दी झ़ूठ बोलौ।

महायाजकै स्तिफनुसा कु पुछ़ौ, “का इयै लोग तैरै बारै दी सौच़ौ ई लागै औन्दै बौलदै?" स्तिफनुसे महायाजका कै ज़वाब देणा लै भौरी का बुशैउ रौ बोलणौ शुरु कियौ। तिणीऐ बोलौ की अब्राहमा रै बौगता कू यीशु रै बौगता झ़ाऊं परमेश्वरै इस्राएला रै लोगु लै भौरी का नोखै काम किए ई। पर लोगुऐ सौदा परमेश्वरा री नाईं शुणी थी। स्तिफनुसै बोलौ, “तुमै लोग परमेश्वरा लै हठीलै और बुरौ कौरणै वाल़ै ई। तुमूऐ सौदा पवित्र आत्मा नाईं मानी, ज़िणौ की तुमारै स्याणेउऐ सौदा पवित्र आत्मा नाईं मानी थी और तेसरै भविष्यद्वक्तु रोज़ झ़ांगा थै। पर ज़ो तिउंऐ कियौ थौ तेथरी बराबरी दी तुमूऐ औज़ौ भी बुरौ कियौ सा! तुमूऐ मसीह ज़ांगौ!"

ज़ेबी तिउं धौर्मा रै अगुवेउऐ शुणौ, ता सै एती रोशुई गौऐ की तिउंऐ आपणै कौन्थु बंद कौरी गौऐ और ज़ोरै च़िराडुऐ। तिउंऐ स्तिफनुस घिशिऔ इलाकै कु बाइरै नीं गौ और तेस ज़ागंणा लै ढोल़ियाउंदै लागै।

ज़ेबी स्तिफनुस मौरदै थौ लागौ औन्दौ, सेउ ज़ोरै बोलदै लागौ, “औ यीशु, मेरी आत्मा सौम्भाल़!" तैबै सेउ आपणै घुंडै माथी धौनी पौड़ौ और तौइंऐ ज़ोरै बोलदै लागौ, “ओ प्रभु, एज़ौ पाप इउं माथै नाईं लाऐ।” तैबै सेउ मौरी गौ।

सेज़ै दिनै, यरुशलेमा दी रौइणै वाल़ै भौरी का लोगुऐ यीशु मानणै वाल़ै लोग तंग कौरणै शुरु किऐ, एथीलै विश्वासी लोग दुजी ज़ागाह लै भागी गौऐ। पर एथरै बावज़ुद भी, ज़िऐ-किऐ भी सै डैऐ तिउंऐ यीशु रै बारै दी परच़ार कियौ।

फिलिप्पुस नावा रौ यीशु रौ एक विश्वासी थौ। ज़िणौ की ओरी भौरी का विश्वासिउऐ कियौ थौ सेउ भी यरुशलेमा कू भागी गौ। सेउ सामरिया रै इलाके दी डेई गौ। तिऐ तिणिऐ लोगु कै यीशु रै बारै दी परच़ार कियौ। भौरी का लोगुऐ यीशु माथै विश्वास कियौ और छ़ुटकारौ पाऔ। एकी दिनै, फिलिप्पुसा काऐ परमेश्वरा री तौरफा कु एक स्वर्गदूत आशौ और तेसलै ज़ांगला दी डेउणा लै, और एक बाटा दी हाण्डणा लै बोलौ। फिलिप्पुस तिऐ डेई गौ। ज़ेबी सेउ तिऐं बाटा दी हाण्डदै थौ लागौ औन्दौ, ता तिणिऐ एक आदमी आपणै रौथा दी डैउंदै देखौ। एउ आदमी कूश देशा रौ एक खास आदमी थौ। पवित्र आत्मै फिलिप्पुसा लै बोलौ की डेइयौ तैस आदमी आइलै साथा-साथाइ हांड।

एथीलै फिलिप्पुस रौथा रै नौज़दिक डैऔ। तिणिऐ शुणौ की सेउ कूशी परमेश्वरा रै वचन पौढ़दै थौ लागौ औन्दौ। ज़ो यशायाह भविष्यद्वक्ता रै थौ लिखौ औन्दौ कि, “तिउंऐ सेउ झ़ांगंणै वाल़ी भेरी ज़िणौ नीं गौ, और ज़िणौ एक गाबड़ू शांत हुआ सा, तिणी तिणिऐ भी एक बाच़ नाइ गाड़ी। तिउंऐ भी तेस आइलै बुरौ बर्ताव कियौ और तेसरी इज़्ज़त नांई की। तिउंऐ तेसरी ज़ान नीई आ।”

फिलिप्पुसे तेस कुशी आदमी कु पुछ़ौ, “ज़ो तु पौढ़दै ई लागौ औन्दौ तु तेस सौमझ़ा भी?" तिणी ज़वाब दैऔ, “नांई। ज़ेबी झ़ाऊं कोई मुकै नाईं सौमझ़ावा लौ, तेबी झ़ाऊं हाऊं नाइ सौमझ़ी सौकदौ। महरबानी कौरीऐ मुकाऐ आशियौ बोश। यशायाह एस आपणै बारै दी थौ लिखदै लागौ औन्दौ या कास ओरी रै बारै दी?"

फिलिप्पुस रौथा माथै च़ौढ़ियौ बौशी गौ। तैबै तिणिऐ तेस कुशी आदमी कै बोलौ ज़ो यशायाह भविष्यद्वक्तै यीशु रै बारै दी थौ लिखौ औन्दौ। फिलिप्पुसै परमेश्वरा रै वचना री भौरी का ओरी हिस्सै री भी बुशै-दाशै लाई। ईणै कौरी, तिणीऐ तेस आदमी कै यीशु रै बारै दी खुश-खौबर शुणाई।

फिलिप्पुस और सेउ कुशी आदमी हान्डदी बारै पाणी काऐ आशै। तिणी कुशिऐ बोलौ, “देख! इदै पाणी सा! का हाउं बपतिस्मा नी सौका ऊ?" और तिणीऐ रौथा रोकणा लै बोलौ।

तैबै सै पाणी दी डेई गौऐ, और फिलिप्पुसै तेस कुशी लै बपतिस्मा दैऔ। ज़ेबी सै पाणी कु बाइरै आशै, ता पवित्र आत्मै एकदम ही फिलिप्पुस उठाइयौ केज़ी दुजी ज़ागाह दी नींई गौ। तिऐ फिलिप्पुस लोगु कै यीशु रै बारै दी बोलदै थाकौ लागी।

सेउ कुशी आदमी आपणै घौरा भिलै औंगाउ बौढ़ी गौ। सेउ खुश थौ की सेउ आबै यीशु ज़ाणा थौ।