47. फिलिप्पी दी पौलुस और सीलास

ज़ेबी शाऊल पूरै रोमी इलाकै दी घुमौ ता तिणिऐ आपणौ रोमी नाऊ “पौलुसा” रौ इस्तेमाल कौरणौ शुरु कौरी गौ। एकी दिनै, पौलुस और तेसरौ गौष्टण सीलास फलिप्पी इलाकै दी यीशु रै बारै दी आछ़ी खौबर शुणाउणा लै डै। सै इलाकै कु बाइरै नौंई रै डिका बाटिऐ एकी ज़गह दी डैवै ज़िऐ लोग प्राथना कौरणा लै कौठै थै। तिऐ सै लुदिया नांवा री एक छ़ेउड़ी कु मिलै ज़ो एक व्यापारी थी। सै परमेश्वरा कू प्यार कौरा थी और तेसरी आराधना कौरा थी।

परमेश्वरै लुदिया यीशु माथै विश्वास कौरणा लै त्यार की। पौलुस और सिलासै तिंआलै और तिआंरै टौबरा लै बपतिस्मा दैऔ। तिंआऐ पौलुस और सिलास आपणै घौरा दी रौइणा लै औटाऐ, एथीलै सै तिऐ रौई गौऐ।

पौलुस और सीलास लोगु कु कई बारै सेज़ी ज़गह दी मिला थै ज़िऐ यहुदी लोग प्राथना कौरा थै। हर दिनै ज़ेबी सै तिऐ डिआ थै ता एक नुकराणी छ़ोटुड़ ज़ो बुरी आत्मा कौरी परेशान थी तिउंरौ पिछ़ौ कौरा थी। इऐं बुरी आत्मा रै ज़ौरिऐ सै लोगु रौ भविष्य बौलणै वाल़ी रै रुपा दी आपणै मालिका लै भौरी धन कौमावा थी।

तिउंरै डैउंदी भारै सै नुकराण छ़ोटुड़ बोला कौरा थी, “इयै आदमी परम परधान परमेश्वरा री सेवा कौरणै वाल़ै ई। इऐ तुमूकै छ़ुटकारै पाइणै री बाट बोलाई!" सै रोज़-रोज़ इणौ कौरा थी ज़ेथकु पौलूस नाराज़ हुइ गौ थौ।

आखरी दी, एकी दिनै ज़ेबी तिऐं नुकराणी छ़ोटुड़िऐ बोलणौ शुरु कियौ, ता पौलुसे तिआं भिलै मुड़ियौ तिआं बितै री बुरी आत्मा लै बोलौ, “यीशु रै नांवा कु इंया कू बाइरै निकुल़।” तेभी तिंऐ बुरी आत्मै सै छ़ाड़ी गोई।

तिएं नुकराणी छ़ोटुड़ी रै मालिक भोरी रोषुई गौऐ। तिउंकै पौतौ लागी गौ थौ की बिणा तिऐं बुरी आत्मा रै सै नुकराणी छ़ोटूड़ लोगु रौ भविष्य नाईं बोली सौका थी। एथरौ मतलब थौ की लोग आबै तिआंरै मालिका कै पैसै नाईं देन्दै की सै तिउंरौ भविष्य बोला की तिउं आइलै का हुआ।

एथिलै तिऐं नुकराणी छ़ोटुड़ी रै मालिकै पौलुस और सिलास रोमी अधिकारिउ काऐ निंऐ। और तिउंऐ पौलुस और सीलास पिटै, और ज़ेला दी टाली गौऐ।

तिउंऐ पौलुस और सीलास ज़ेला री इणी ज़ागाह दी छ़ाड़ै ज़िऐ सारेउ कू ज़ादै सिपाही थै। इदरा झ़ाऊं कि तिउंऐ तिउंरै बांगणै ज़ुखड़ा रै फाटै दी ज़ौड़ी गौऐ। पर पौलुस और सीलास आधी राच़ीऐ, परमेश्वरा री स्तुती रै गेत गाइन्दै थै लागै औन्दै।

तेभी ई, एक भुइंच़ल़ पौड़ौ! और ज़ेला रै सारै दार खुली गौऐ, और सारै कैदिऊ री शांगल़ी खुलियौ छ़ुटी गोई।

तैबै सेउ पहरेदार सिपाई ऊठी गौ। तिणिऐ देखौ की ज़ेला रै दार खुली गौऐ। तिणिऐ सुच़ौं की सारै कैदी बौच़ियौ भागी गौऐ ई। सेउ भौरी डौरी गौ की तिउंरै भागणै कू रोमी अधिकारी तेस झ़ांगाई, ऐथीलै सेउ आपू झ़ांगणा लै त्यार हुई गौ थौ ! पर पौलुस तेस देखियौ औटाऊऔ, “रुक! आपुलै नुकसान नाईं पौउंच़ाउ। आमै सारै ईदै ई।”

तिणी पहरेदार सिपाईऐ कांबियौ पौलुस सीलासा काऐ आशियो पूछ़ौ, “छ़ुटकारै पाइणा लै हाऊं का कौरु लौ?" पौलुसै ज़्वाब दैऔ, “प्रभु यीशु माथै विश्वास कौर, ता तु और तैरौ सारौ खानदान उद्धार पाई सौका ई।” तैबै तिणी सिपाईऐ पौलुस और सीलास आपणै घौरै निंऐ और तिउंरै ज़खम धोए। पौलुसै तेसरै सारै घौरा रै सारै लोगू कै खुशी री खौबर शुणाई।

सिपाई और तेसरै पूरै टौबरै यीशु माथै विश्वास कियौ, एथीलै पौलुस और सीलासै तिउंलै बपतिस्मौ दैऔ। तैबै सिपाईऐ पौलुस और सीलासा कु रोटी खौआई, और तिऊं सारेउऐ खूशी मौनाई।

आगलै दिनै इलाके रै अगुवेउऐ पौलुस और सीलास ज़ेला कु छ़ाड़ी गौऐ। और फिलिप्पी कु डेउणा लै बोलौ। पौलुस और सीलास लुदिया और कुछ़ ओरी गौष्टणा कू मिलै और तेथ बासिऐ इलाकै कु निकल़ी गौऐ, और कलीसिया बौढ़दै थाकी लागी।

पौलुस और ओर मसीही अगुवे भौरी इलाकेउ दी डै। तिउंऐ लोगु कै यीशु रै बारै दी खुश खौबरी शुणाई। तिउंऐ कलीसियाउ रै विश्वासी पाक्कै कौरणा लै और शिक्षा दैणा लै काई च़िट्ठी भी लिखी। इऊं मांझ़िया कु कुछ़ च़िट्ठी बाइबला री किताबी बौणी गोई।