48. यीशु ही वाइदौ किऔ औन्दौ मसीह आ

ज़ेबी परमेश्वरै संसार च़ाणौ ता सारौ कु्छ़ आच्छ़ौ थौ। आदम और हव्वा एकी दुज़े कु प्यार कौरा थै, और सै परमेश्वरा कु प्यार कौरा थै। तेभी कोई बीमारी और मौउत नाईं थी। परमेश्वर इणौ ई संसार च़ाहा थौ।

शैतानै सापा रै ज़ौरिऐ बौगिच़ै दी हव्वा आइलै बुशै लाई, कैलैकी सेऊ तिआंलै दोखौ दैणौ च़ाहा थौ। तैबै हव्वा और आदमै परमेश्वरा रै विरोधाई पाप कियौ। कैलैकी तिउंऐ पाप कियौ थौ एथीलै धौतरी माथै रौइणै वाल़ै सारै ज़ौणै मौराई।

कैलैकी आदम और हव्वे पाप कियौ थौ, एथीलै कुछ़ औज़ौ भी बुरौ हुऔ कि सै परमेश्वरा रै दुश्मण बौणी गौऐ। ज़ेथरौ नौतिज़ौ तेभी कु हर एकीऐ पाप कियौ सा। हर एक ज़ौणौ ज़ौन्मा कु परमेश्वरा रौ दुश्मण आ। परमेश्वरा रै और लोगु रै बिच़ाई शान्ति नाईं थी। पर परमेश्वर शान्ति छ़ाड़णौ च़ाह थौ।

परमेश्वरै वाइदौ कियौ की हव्वा रौ एक वंश शैताना रौ मूंड फैच़ा आ। तिणिऐ इणौ भी बोलौ शैतान तेसरौ फाइनौ टुका सा। मतलब, शैतान मसीह झ़ांगा आ, पर परमेश्वर तेस तौंइऐ ज़िउंदौ कौरा आ। तेथ बासिऐ, मसीह शैताना री शौक्ती हमेशा लै खातम कौरा। भौरी साला बासिऐ, परमेश्वरै परगट कियौ की सेउ मसीह यीशु सा।

परमेश्वरै तिंऐ बाढ़ा कु आपणौ टौबर बौच़ाऔ ज़ास सेउ आणनेवाल़ौ थौ। नूहा लै एक बौड़ी किश्ती च़ाण्ना लै बोलौ। इणै कौरी परमेश्वरै सै लोग बौच़ाऐ ज़ो तेस माथै विश्वास कौरा थै। इणै कौरी, सै सारै रै सारै परमेश्वरा कौरी झ़ागंणा रै काबिल थै कैलैकी तिउंऐ पाप कियौ थौ। पर परमेश्वरै तिऊं सारेऊ बौच़ाउणा लै यीशु भेज़ौ ताकी ज़ुण तेस माथै विश्वास कौरालौ सेउ बौच़ा।

सैकड़ों बौरशा झ़ाऊं, याजक परमेश्वरा लै बौल़िदान च़ौड़ाउंदै रौऐ। इणौ देखाल़णा लै कि लोगुऐ पाप कियौ, और परमेश्वरा रै ज़ौरिऐ तिउंलै सौज़ा मिलणी थी। पर सै बौल़िदान तिउंरै पाप माफ नाईं कौरी सौका थै। यीशु सारेऊ कु बौड़ौ महायाज़क आ। तिणीऐ सेउ कियौ ज़ो कोई नाईं कौरी सौका थौ। तिणिऐ एखुली आपणौ बल़िदान दैऔ ज़ो ओरीऊ रै पाप मिटाइ सौका आ। तिणिऐ मानौ की परमेश्वर लोगु रै पापा री सौज़ा तेसलै दिया सा। एज़ी तांइऐ, यीशु पाकौ महायाजक थौ।

परमेश्वरै अब्राहमा लै बोलौ, “हाऊं तैरै ज़ौरीऐ संसारा रै सारै लोगु लै आशिश दिआ ऊ।” यीशु एसी अब्राहमा रौ वंश थौ। परमेश्वर अब्राहमा रै ज़ौरिऐ सारै लोगुलै आशीष दिया सा, कैलैकी ज़ुण यीशु माथै विश्वास कौरा सा परमेश्वर तिऊं सारेऊ पापा कु बौच़ावा सा। ज़ैबै इऐ लोग यीशु माथै विश्वास कौराई, ता परमेश्वर तिऊं अब्राहमा रै वंश माना सा।

परमेश्वरै अब्राहमा लै बोलौ की सेउ आपणौ छ़ोहरु, तेसलै बल़िदान कौरा। पर तैबै परमेश्वरै इसहाका रै बौदल़ै बौल़ी कौरणा लै एक गाबड़ु रौ इंतज़ाम कियौ। आमै सारै आपणै पापा लै सौज़ा रै काबिल थै! पर परमेश्वरै आमारी ज़ागाह माथै मौरणा लै यीशु बौल़ी रै रुपा दी दैऔ। एज़ी बज़ह कु आमै यीशु लै परमेश्वरा रौ गाबड़ु बोली ई।

ज़ेबी परमश्वरै मिस्रा माथै दु:ख भेज़ै ता तिणिऐ हर एक इस्त्राएली टौबरा लै बोलौ कि सै एक गाबड़ु री बौल़ी कौरा। तेस गाबड़ु दी कोई पाप ना च़ांई हुऔ, तैबै आपणै दारा री च़ोकटी माथै और ओरी-पौरी भिलै तैसरौ खुन लाइणौ थौ। ज़ेबी परमेश्वरै सेउ खुन देखौ ता तिउंरै घौरा कु औगांऊ बौढ़ी गौ और तिउंरै पहलै छ़ोहरु नाईं झ़ांगै। ज़ेबी एऊ हुऔ ता परमेश्वरै एथलै फसह रौ साज़ौ बोलौ।

यीशु फसह रै साज़ै रै एक गाबड़ु ज़िणौ सा। तिणिऐ केभी भी पाप नाईं कियौ, एथीलै तेसदी कुछ़ भी गौलती नाईं आ। सेउ फसह रै साज़ै लै मौरौ। ज़ैबै कुण यीशु माथै विश्वास कौरा सा, तैबै यीशु रौ लोउ तेस आदमी रै पापा री किमत दिया सा। इणौ सा ज़िणौ परमेश्वर तेस आदमी कु औगाऊं बौड़ी गौ, कैलैकी सेउ तेसलै सौज़ा नाईं दैन्दौ।

परमेश्वरै इस्त्राएली लोगु आइलै एक वाइदौ कियौ, कैलैकी सै इणै लोग थै ज़ो परमेश्वरै आपणै हुणा लै छ़ांटै थै। पर आबै परमेश्वरै इणौ वाइदौ कियौ आ ज़ो की आमु सारेउ लै आ। अगर केज़ी भी ज़ाती रौ केज़ौ भी ज़ौणौ एस नौंवौ वाइदौ माना सा, ता सेउ परमेश्वरा रै लोगु आइलै मिला सा। सेउ इणौ एथलै कौरा सा कैलैकी सैउ यीशु माथै विश्वास कौरा सा।

मूसा एक भविष्यद्वक्ता थौ ज़ुणीऐ परमेश्वरा रै वच़न बौड़ी तागती कौरी परच़ार कियौ थौ। पर यीशु सारै भविष्यद्वक्ता दी सारेउ कु बौड़ौ सा। सेउ परमेश्वर आ, एथीलै ज़ो कुछ़ भी तिणीऐ कियौ और बोलौ आ सेउ परमेश्वरा रै काम और वचन थै। एथीलै पवित्र-शास्त्र यीशु लै परमेश्वरा रौ वचन बोला सा।

परमश्वरै राज़ै दाउदा कु वाइदौ कियौ थौ की राज़ा रै रुपा दी तेसरौ एक वंश परमेश्वरा रै लोगा माथै सौदा लै राज़ कौरा। यीशु परमेश्वरा रौ छ़ोहरु और मसीह सा, एथीलै सेउ राज़ै दाउदा रौ वंश आ ज़ो सौदा लै राज़ कौरी सौका सा।

दाउद ता इस्त्राएला रौ राज़ौ थौ, पर यीशु सारी दुनिया रौ राज़ौ सा! सेउ तौंइऐ आशा और सौदा लै फैसलै और शान्ती आइलै आपणै राज़्य माथै राज़ कौरा सा।