49. परमेश्वरा रौ नौंवौ वाइदौ

एकी स्वर्गदुतै एक ज़्वान छ़ोटूड़ मरियमा लै बोलौ की सै परमेश्वरा रै छ़ोहरु लै ज़ौन्म दिया। सै ईबी कुआरी थी, पर पवित्र आत्मा तिंया काऐ आशौ और सै गौरक्ड़ी हुई। तिंऐ एक छ़ोहरु लै ज़ौन्म दैऔ ज़ासरौ नांऊ तिंऐ यीशु छ़ाड़ौ, यीशु परमेश्वर और आदमी दुइया सा।

यीशुऐ भौरी च़मत्कार किऐ ज़ेथ कौरी पौतौ लागा सा कि सेऊ परमेश्वर आ। सेऊ पाणी माथै हाण्डौ और भौरी भागुर शान्त किऐ। तिणिऐ भौरी सारै बिमार लोग च़ांगै किऐ और भौरी सारै लोगु कु बुरी आत्मा गाड़ी। तिणिऐ मौरै औन्दै लोग ज़िउंदै कौरी गौऐ, और तिणिऐ पांज़ रोटी और दुई माच्छ़ी पांज़ हज़ार लोगु लै खिलाई।

यीशु एक महान गुरू भी थौ। ज़ो कुछ़ भी तिणिऐ शिखाऔ, सेऊ आच़्छ़ा कौरी शिखाऔ आ। ज़ो सेउ लोगु लै कौरणा लै बौला सा सेउ तिउंऐ कौरणौ च़ांई, कैलैकी सेउ परमेश्वरा रौ छ़ोहरु सा। तिणिऐ शिखाऔ की तुमुऐ ओरी लोगु आइलै तिणी ई प्यार कौरणौ च़ांई ज़िणौ तुमै आपु आइलै प्यार कौराई।

तिणिऐ इणौ भी शिखाऔ की तुमू सारी च़िज़ा कु ज़ादौ और आपणी धन-ज़यदादा कु भी ज़ादौ परमेश्वरा आइलै प्यार कौरणौ च़ांई।

यीशुऐ बोलौ की संसारा दी केज़ी भी च़िज़ पाइणै कु भौरी आच्छ़ौ सा परमेश्वरा रै राज़्य दी हुणौ। तैसरै राज़्य दी तुमारौ डैउणौ ज़ुरुरी सा की परमेश्वर तुमू तुमारै पापा कु बौच़ावा।

यीशुऐ बोलौ की कुछ़ लोग तेस मानाई। परमेश्वर तिउं लोगु बौच़ावा। पर दुजै लोग तेस नाईं मानदै। तिणिऐ इणौ भी बोलौ की कुछ़ लोग इएं धौतरी रै ज़िणै ई, कैलैकी सै यीशु रै बारै दी आच्छ़ी खौबर नाईं मानदै, और परमेश्वर तिऊं बौच़ावा सा। पर कुछ़ लोग बाटा री काठै माटै बाशिऐ ई। परमेश्वरा रौ वचन बीज़ा रै ज़िणौ बाटा दी पौड़ा सा, पर तिऐ कुछ़ नाइ ज़ौमदौ। इऐ लोग यीशु रै बारै दी खुश-खौबरी नाईं मानदै। सै तेसरै राज़्य दी डेउणा लै इनकार कौराई।

यीशुऐ शिखाऔ की परमेश्वर पापिऊ कु भौरी प्यार कौरा सा। सेउ तिउं माफ कौरणौ च़ाहा सा और तिऊं आपणी औलाद चाणनी च़ाहा सा।

यीशुऐ इणौ भी बोलौ की परमेश्वर पापा कु नफरत कौरा सा। कैलैकी आदम और हव्वे पाप कियौ, एथीले तिउंरै सारै वंशजै पाप कियौ। एस संसारा दी रौइणै वाल़ौ हर एक आदमी पाप कौरा सा और परमेश्वरा कु दुर आ। हर एक आदमी परमेश्वरा रौ दुशमण आ।

पर परमेश्वरै एस संसारा दी रौइणै वाल़ै हर एक आदमी कु इणौ प्यार कियौ: तिणिऐ आपणौ एकलौतौ छ़ौहरु देई गौ ताकी परमेश्वर तिउंलै सौज़ा ना दिया ज़ो तेस माथै विश्वास कौराई। एथरी बज़ाऐ, सै तेस आइलै सौदा लै रौआई।

तुमै मौरणा रै लायक ई, कैलैकी तुमूऐ पाप कियौ आ। तुमु कु परमेश्वरा रौ नाराज़ हुणौ ठीक ही सा, एथारौ मतलब, सेउ यीशु माथै रोशिया। तिणिऐ यीशु लै क्रुसा री मौत देइऔ सौज़ा देई।

यीशुऐ केबी पाप नाईं कियौ, पर तिणिऐ परमेश्वर तेसलै सौज़ा दैणै दैऔ। तिणिऐ मौरणौ मानौ। इणै कौरी, तुमारै पाप और एस संसारा दी रौइणै वाल़ै हर एक आदमी पाप उठाउणा लै सेउ एक पाक्कौ बौल़िदाण थौ। यीशुऐ आपु परमेश्वरा लै बौल़िदान कौरी गौ, एथीलै केज़ै भी पापा लै, इदरा झ़ाऊं की बौड़ौ पाप भी माफ कौरा सा।

भलै ही तुमै भौरी का आछ़ै काम कौराई, तैबै भी एथ कौरी परमेश्वर तुमू नाइ बौच़ाउंदौ। तेसरौ गोष्टण बौणना लै इणौ कुछ़ भी नाईं आ ज़ो तुमै कौरी सौकाई। एथरौ मतलब, तुमूऐ विश्वास कौरणौ सा, और तुमारै बौदलै हाउं क्रुसा माथै मौरी गौ, और एऊ भी की परमेश्वरै सेउ तौंइऐ ज़िउंदौ कौरी गौ। अगर एथा माथै विश्वास कौरालै, ता परमेश्वर तुमारै पाप माफ कौरा सा।

परमेश्वर तेस हर एक आदमी बौच़ावा ज़ो यीशु माथै विश्वास कौरा सा और तेस आपणौ प्रभु माना सा। पर सेउ तिऊं नाईं बौच़ाउंदौ ज़ो तेस माथै विश्वास नाईं कौरदै। एऊ कोई माइनै नाइ छ़ाड़दौ की तुमै आमीर ई या गरीब, आदमी हुआ या छ़ेउड़ी हुआ, बूढ़े हुआ या ज़वान हुआ, तुमै किऐ रौआई। परमेश्वर तुमु कु प्यार कौरा सा और च़ाहा सा की तुमै यीशु माथै विश्वास कौरौ की सेउ तुमारौ गौष्टण बौणी सौका।

यीशु तुमू औटाउंदै लागौ औन्दौ कि तेस माथै विश्वास कौरौ और बपतिस्मा निंयौ। का तुमै विश्वास कौराई की परमेश्वरा रौ एकलौतौ छ़ौहरु, यीशु ही मसीह सा? का तुमै विश्वास कौराई कि तुमै एक पापी ई और इणौ की तुमै परमेश्वरा रै ज़ौरिऐ सौज़ा देणै रै लायक ई? का तुमै विश्वास कौराई की तुमारै पापा मिटाउणा लै यीशु क्रुसा माथै मौरौ?

अगर तुमै यीशु माथै और ज़ो तिणिऐ तुमूलै कियौ सा तेस माथै विश्वास कौराइ सा, ता तुमै एक मसीह ई! शैतान आपणै इनारै रै राज़्य दी आबै तुमू माथै राज़ नाइ कौरदौ। आबै परमेश्वर आपणै प्याशै रै राज़्य दी तुमु माथै राज़ कौरा सा। तिणिऐ तुमै पाप कौरणै कु रोकी गौऐ ई, ज़ो तुमै कौरा थै। तिणिऐ तुमूलै एक नौईं, आछ़ी ज़िदंगी देई सा।

अगर तुमै एक मसीह ता ज़ो यीशुऐ कियौ आ तेथरी बज़ह कू परमेश्वरै तुमारै पाप माफ कौरी गौऐ ई। आबै, परमेश्वर एक दुश्मणा ज़िणौ तुमू एक पाक्कौ दौस्त माना सा।

अगर तुमै परमेश्वरा रै गौष्टण ई और प्रभु यीशु रै सेवा कौरणै वाल़ै ई ता तुमै तिउं बुशु मानणै री इच्छ़ा कौरालै ज़ो यीशु तुमुकै शिखावा सा। भलै ई तुमै एक मसीह ई, शैतान इभी भी पाप कौरणा लै तुमू औज़मांवा। पर परमेश्वर हमेशा तेस कौरा ज़ो सेउ बोला सा की सेउ कौरा। सेउ बोला सा की अगर तुमैं आपणै पाप मानौ, ता सेउ तुमु माफ कौरा। सेउ तुमु कु पापा रै विरोधा ई लौड़नै री तागत दिया सा।

परमेश्वर तुमुलै प्राथना कौरणै और तेसरै वचन पौड़ना लै बोला सा। सेउ तुमू ओरी विश्वासीउ रै साथाई मिलियौ तेसरी आराधना कौरणा लै भी बोला सा। तुमू ओरी लोगु कै भी बोलणौ जा सा कि तिणिऐ तुमुलै का कियौ सा। अगर तुमै इउं सारै काम कौरा ई, ता तुमै तेसरै एक पाक्कै गौष्टण बौणाई।