50. यीशु वापिस आशा सा

लगभग दुई हज़ार साला कु संसारा दी सारी ज़ागाह माथै भौरी कू भौरी लोग मसीह यीशु रै बारै दी खुश-खौबरी शुणदै ई लागै औन्दै और कलिसिया तरक्की कौरदै आ लागी औन्दी। यीशुऐ वादौ कियौ कि सेउ संसारा रै आखरी दी वापिस आशा सा। अगर सेउ इबी झ़ाऊं नाईं आशौ, तेबै भी सेउ आपणौ वाइदौ पुरौ कौरा सा।

ज़ैबै की आमै यीशु रै वापिस आशणौ ज़ागी ई, परमेश्वर आमु कु इणै कौरी ज़िउणै री इच्छ़ा कौरा सा की ज़ुण पवित्र ई और ज़ुण तेसरी ईज़्ज़त कौरा ई। ज़ेबी यीशु धौतरी माथै रौआ थौ तैबै तिणिऐ बोलौ, “मैरै च़ेलै संसारा री सारी ज़ागाह रै लोगु कै परमेश्वरा रै राज़्य रै बारै दी खुश-खौबरी रौ परच़ार कौराई, और तैबै आखरी बौगत आशा।”

भौरी का ज़ातिउऐ इबी झ़ाऊं यीशु रै बारै दी नाईं शुणौ। सौरगा लै डेउणा कू पैहलै, यीशुऐ मसीह लोगु कु तिऊं लोगु कै खुश-खौबरी शुणाउणा लै बोलौ ज़ुणिऐ इए केबी नाईं शुणी। तिणिऐ बोलौ, “डैऔ और सारी ज़ातिऊ रै लोगु च़ेलै चाणौ!" और “फसल लौइणा लै डोखरै तैयार हुई गौऐ!"

यीशुऐ इणौ भी बोलौ, “कास आदमी रौ नुकुर आपणै मालिका कु बौडौ नाईं औन्दौ। एस संसारा रै खास लोगुऐ मुकु नफरत कौरी, और मेरी बज़ह कु सै तुमु भी सौतावा और झ़ांगाई। एस संसारा दी तुमै दुखी हुआई, पर विश्वासा दी पाक्कै बौणौ, कैलैकि मुंइऐ शैतान हौराई गौ सा ज़ो एस संसारा माथै राज़ कौरा सा। अगर तुमै आखरी झ़ाउं मैरै विश्वासा दी बौणी रौआ लै, ता परमेश्वर तुमू बौच़ावा सा!"

यीशुऐ आपणै च़ेलै इणै सौमझ़ाउणा लै एक काहणी शुणाई की ज़ेबी संसारा रौ अंत हुआ सा, ता लोगु आइलै का हुआ सा। तिणिए बोलौ, “केज़ै आदमिऐ आपणै डोखरा दी आच्छ़ौ बीज़ थौ बौ औन्दौ। ज़ेबी सेउ सुतौ औन्दौ थौ ता तेसरौ दुश्मण आशौ और गिऊं रै बिजा मांझ़िऐ ज़ांगली पौधै रौ बीज बौई गौऐ, और तैबै सेऊ डेई गौ।”

“ज़ेबी पौधेउ दी आंगुरै आशै ता नुकरेवै तेस आदमी कै बोलौ, ओ मालिक, तुमुऐ ता आपणै डोखरा दी आच्छ़ौ बीज बौ थौ। ता एथदी ज़ांगली पौधै कैलै लागै ई?' तिणी ज़्वाब देऔ, सिर्फ मेरै दुश्मण ही तिऊं बौइणौ च़ाहा ई। एउ मैरौ केज़ौ दुश्मण आ ज़ुणिऐ इणौ कियौ सा।'"

“तिऊं नुकरै आपणै मालिका कै ज़्वाब देऔ, का आमु ज़ांगली पौधे पोटणै च़ांई?' तिणी मालिकै बोलौ, नाईं अगर तुमै इणौ कौरालै ता तुमुकै कुछ़ गिऊं भी पौटीआई। लौइणै रै बौगता झ़ाऊं रुकौ। तैबै ज़ांगली पौधै कौठै कौरौ ताकी तुमै तिऊं ज़ाल़ी सौका। पर गिऊं आणौ मैरै कोठै दी।'"

च़ेलेउऐ इऐं काहणी रौ मतलब नाईं सौमझ़ौ, एथीलै तिउंऐ यीशु लै बोलौ, कि आमु सौमझ़ाऔ, यीशुऐ बोलौ, “आच्छ़ौ बीज बौइणै वाल़ौ आदमी मसीह देखावा सा। डोखरौ संसार देखावा सा। आछ़ौ बीज परमेश्वरा रै लोग देखावा सा।”

“ज़ांगल़ी पौधै तेस दुष्ट ज़ौणै, शैताना रै लोगु दैखावा सा। तेस आदमी रौ दुश्मण शैतान देखावा सा, ज़ुणीऐ ज़ांगल़ी पौधै बौऐ थै। कटाई ऐस संसारा रौ अंत देखावा सा, और कटाई कौरणै वाल़ै परमेश्वरा रै स्वर्गदुत देखावा सा।”

“ज़ेबी संसारा रौ अंत हुआ लौ तेबी स्वर्गदुत तिऊं सारै लोगु कौठै कौराई ज़ो शैताना रै ई। सै स्वर्गदुत तिऊं एक भौरी ताती आगी दी शौटाई। तिदलै लोग भौरी सताव दी लैराई और आपणै दांद पिशाई। पर ज़ो लोग धौर्मी ई, ज़ो यीशु पिछ़ु हांडे ई, सै तिउंरै परमेश्वर बाबा रै राज़्य दी सुरज़ा रै ज़िणै च़ौमकाई।”

यीशुऐ इणौ भी बोलौ की सेउ संसारा रौ अंत औणै कु पैहलै धौतरी माथै आशा सा। सेऊ तिणै कौरिऐ आशा सा ज़िणै कौरी सेउ डेऔ थौ। मतलब, तेसकै पैहलकै ज़िणौ शरीर हुआ, और सेउ सौरगा दी बादला माथै सवार हुइऔ आशा सा। ज़ेबी सेउ आशालौ, ता हर एक मसीह ज़ो मौरी गौऐ ई सै मौरै औन्दै मांझ़िया कु ज़िउंदै हुआई और तेसकु सौरगा दी मिलाई।

तैबै ज़ो मसीह ऐबै भी ज़िउंदै ई सै सौरगा दी ज़िउंदै उठाईया ई और तिऊं दुज़ै मसीह आइलै मिलाई ज़ो मौरै औन्दै मांझ़िया कु ज़िउंदै हुआई। सै सारै तिऐ यीशु आइलै हुआई। तैथ बासिऐ, यीशु आपणै लोगु आइलै रौआ सा। ज़ेबी सै एकी साथाइ रौआई ता तिउंकै सौदा लै पुरी शान्ति हुआ।

यीशुऐ तेथ माथै विश्वास कौरणै वाल़ै हर एक आदमी लै एक ताज देणै रौ वाइदौ कियौ औन्दौ। से सौदा लै परमेश्वरा आइलै हर एक च़िज़ा माथी राज़ कौराई। तिउंकै पुरी शान्ती हुआ।

पर परमेश्वर तिउं सारेऊ रौ फैसलौ कौरा ज़ो यीशु माथै विश्वास नाईं कौरदै। सै तिऊं नौरका दी पाआ ई। तिऐ सै लेराई और दांद पिशाई और केभी ना इशणै वाल़ी आग तिऊं रोज़ ज़ाल़दै रौआ, और किड़ै तिऊं खाणै कु केबी नाईं रुकदै।

ज़ेबी यीशु तौंइऐ आशा सा, ता सेउ आच़्छा कौरी शैतान और तेसरौ राज़ खात्म कौरा सा। सेउ शैतान नौरका दी पाआ सा। तिऐ शैतान सौदा लै ज़ौल़दै थाका लागी, तिऊं सारेऊ आइलै ज़ुणिऐ परमेश्वरा री बुशै मानणै री बज़ह शैताना पिछ़ु हाण्डणौ च़ुनौ थौ।

कैलैकी आदम और हव्वे परमेश्वरा री नाईं शुणी थी और पाप एस संसारा दी आशौ थौ, परमेश्वरै तेसलै श्राप दैऔ और तेस झ़ांगणै रौ ठाणी गौ। पर केज़ै दिनै परमेश्वर एक नौंवौ सौरग और एक नौईं धौतरी च़ाणा आ ज़ो पाक्की हुआ।

यीशु और तेसरै लोग तिऐं नौईं धौतरी दी रौआई, और सेउ सौदा लै सारी च़िज़ा माथै राज़ कौरा। लोगु री आखी कु हर एक आशु घुशा सा। आबै कोई भी बेदणौ या दुखी नाईं औन्दौ। सै लेरणै भी नाईं। सै बिमार नाईं हुआलै या मौरदै नाईं। और तिऐ कुछ़ भी बुराई नाईं हुआली। यीशु आपणै राज़्य माथै फैसलै आइलै और शान्ति आइलै राज़ कौरा सा। सेउ हमेशा लै आपणै लोगु आइलै रौआ सा।