12. निर्गमन

इस्राएली लोग मिस्र तै लिकड़कै घणे खुश थे। वे इब दास न्ही थे, अर वे वादे के देश म्ह जा रहे थे! जो किमे भी इस्राएलियां नै माँग्या, मिस्रियां नै उन ताहीं वा सब किमे दिया, उरै ताहीं के सोन्ना अर चाँदी अर दुसरी किमती चीज्जां। दूसरे देशां के कुछ लोगां नै परमेसवर पै बिशवास करया अर जिब इस्राएली लोग मिस्र तै लिकड़े तो वे भी उनके गैल हो लिए।

दिन के दौरान बाद्दळ का एक विशाल खम्भा उसकै आग्गै-आग्गै चाल्या। अर रात के बखत यो आग का खम्भा बण ग्या। परमेसवर जो के उस बाद्दळ के खम्भे म्ह अर आग के खम्भे म्ह था, सदा उनके गैल था अर उसने सफर करदे बखत उनकी अगुवाई करी। उन ताहीं सिर्फ इतना करणा था के उसके पाच्छै चाल्लै।

थोड़े बखत के बाद, फिरौन अर उसके लोगां नै अपणे मन ताहीं बदल दिया। वे इस्राएलियां ताहीं फेर तै अपणा दास बणाणा चाहवै थे। ज्यातैं उननै इस्राएलिय का पीच्छा करया। यो परमेसवर ए था जिसनै उनके मनां ताहीं बदल दिया था। उसनै इसा इस करकै करया क्यूकें वो चाहवै था के हर कोए यो जाण ले के फिरौन तै अर मिस्रियां के सारे देवत्यां तै वो, यहोवा, घणा शक्तिशाली सै।

जिब इस्राएलियां नै मिस्र की सेना ताहीं आन्दे देख्या तो उन ताहीं पता लग्या के वे फिरौन की सेना अर लाल समुद्र के बीच म्ह फँसगे। वे भोत डरगे अर रोण लाग्गे, "मान्नै मिस्र ताहीं क्यों छोडया? हम मरण आळे सां!"

मूसा नै इस्राएलियां तै कह्या, "डरणा बंद करो! परमेसवर आज थारै खात्तर लड़ैगा अर थामनै बचावैगा।" फेर परमेसवर नै मूसा तै कह्या, "इन लोगां तै लाल समुद्र की ओर आग्गै बढ़ण के खात्तर कह।"

फेर परमेसवर नै उस बाद्दळ के खम्भे ताहीं लेकै इस्राएलियां अर मिस्रियां के बिचाळै म्ह रख दिया ताके मिस्री लोग इस्राएलियां ताहीं देख ना पावै।

परमेसवर नै मूसा तै समुद्र पै अपणा हाथ बढ़ाण के खात्तर कह्या। फेर परमेसवर नै हवा तै समुद्र के पाणी ताहीं बाईं अर दाईं ओर करवा दिया, जिसतै के समुद्र तै होकै एक राह बण ग्या।

इस्राएली लोग अपणे दोन्नु तरफ पाणी की दीवारां के गैल सूक्खी धरती पै समुद्र तै होकै बढ़ चाल्ले।

फेर परमेसवर नै उस रास्ते तै बाद्दळ ताहीं ठा लिया ताके मिस्री लोग इस्राएलियां ताहीं बचकै जान्दे होये देक्खे। मिस्रियां ने उन ताहीं पकड़ण के खात्तर उनका पीच्छा करण का फैसला लिया।

आखर उननै समुद्र के जरिये तै उस राह पै इस्राएलियां का पिच्छा करया, पर परमेसवर नै मिस्रियां ताहीं घबरा दिया अर उनके रत्थां ताहिं अटका दिया। वे चिल्लाण लाग्गे, "भाग्गो! इस्राएलियां की ओर तै परमेसवर लड़ रह्या सै!"

सारे इस्राएली समुद्र की दूसरी तरफ पोहचगे। फेर परमेसवर नै मूसा तै कह्या के वो फेर तै पाणी पै हाथ बढ़ावै। जिब मूसा नै इसा करया, तो पाणी मिस्री सेना पै आ पड़या अर अपणी सामान्य स्थिति म्ह हो ग्या। सारी मिस्री सेना डूबगी।

जिब इस्राएलियां नै देख्या के मिस्री मरगे थे तो उननै परमेसवर पै बिशवास करया। उननै बिशवास करया के मूसा परमेसवर की ओर तै भविष्यद्वक्ता था।

इस्राएली लोग इस करकै भी भोत खुश थे क्यूकें परमेसवर नै उन ताहीं मरण तै अर दास होण तै बचा लिया था। इब वे परमेसवर की आराधना करण अर उसकी आज्ञा का पाळण करण के खात्तर आजाद थे। इस्राएलियां नै अपणी आजादी का उत्सव मनाण के खात्तर अर परमेसवर के प्रशंसा करण के खात्तर कई गीतां ताहीं गाया क्यूकें उसनै उन ताहीं मिस्रियां की सेना तै बचाया था।

परमेसवर नै इस्राएलियां ताहीं हर साल एक त्यौहार मनाण का हुकम दिया यो याद करण के खात्तर के किस तरियां परमेसवर नै मिस्रियां ताहीं हरा दिया अर उन ताहीं दास होण तै आजाद करया। यो फसह का त्यौहार कहलाया था। इस म्ह उन ताहीं इसका उत्सव मनाण के खात्तर एक स्वस्थ मेमने ताहीं बलि करणा था, उस ताहीं भूनणा था, अर उस ताहीं बिना खमीर आळी रोट्टी के गैल खाणा था।