14. जंगल में भटकना

परमेसवर नै इस्राएलियां ताहीं उन नियमा ताहीं बताणा खत्म करया जिनका उन ताहीं करे गये उसके करार के कारण पाळण करणा सै। फेर उसनै सीनै पर्वत तै आग्गै उनकी अगुवाई करी। वो उन ताहीं वादे के देश म्ह ले जाणा चाहवै था। यो देश कनान भी कुह्यावै था। परमेसवर बाद्दल के खम्भे म्ह उनकै आग्गै-आग्गै चाल्या, अर वे उसके पिच्छै-पिच्छै चाल्लै।

परमेसवर नै अब्राहम, इसहाक अर याकूब तै वादा करया था के वा वादे का वा देश उनके वंशजां ताहीं देवैगा, पर इस बखत ओड़ै भोत सी जात्तां रह रही थीं। वे कनानी कुह्यावै थे। ये कनानी लोग परमेसवर की आराधना न्ही करै थे अर उसके हुकमां ताहीं न्ही मान्नै थे। वे झूठे देवत्यां की उपासना करया करै थे अर भोत से बुरे काम करै थे।

परमेसवर नै इस्राएलियां तै कह्या, "जिब थम उस करार के देश म्ह जाओ तो ओड़ै के सारे कनानियां तै छुटकारा पा लियो। उनकै गैल संधि ना करणा अर उन तै ब्याह ना करणा। थमनै उनकी सारी मूर्तियां ताहीं पूरी तरियां तै नाश कर देणा सै। जै थम मेरे हुकम ना मान्नोगे, तो थम मेरे बजाए उनके देवत्यां की उपासना करण लागोगे।"

जिब इस्राएली कनान की सीमा पै पोहचे, मूसा नै इस्राएल के हरेक गोत्र म्ह तै एक-एक करकै बारह माणसां ताहीं चुण्या। उसने उन ताहीं जाकै उस देश का भेद लेण के निर्देश दिए के देखैं के वा किसा देश सै। उन ताहीं उन कनानियां का भेद भी लेणा था के देखैं के वे बलशाली थे या निर्बल थे।

उन बारह माणसां नै पूरे कनान तै होन्दे होये चाळीस दिन का सफ़र करया अर फेर वे वापस लौट आए। उननै लोगां ताहीं बताया, "वा देश घणा उपजाऊ सै अर फसलां भोत घणी सै!" पर दस भेदियां नै कह्या, "उनके नगर भोत मजबुत सै अर वे लोग लाम्बे-चौड़े सैं! जै हम उन पै हमला करां सां, तो पक्के वे म्हारे ताहीं हरा देंगे अर म्हारे ताहीं मार डालैगे।"

जिब ए कालेब अर यहोशू अर दुसरे दो भेदियां नै कह्या, "या साच्ची सै के कनान के लोग लाम्बे अर बलशाली सैं, पर पक्के हम उन ताहीं हरा सकां सां! परमेसवर म्हारै खात्तर लड़ैगा!"

पर लोगां नै कालेब अर यहोशू की न्ही सुणी। वे मूसा अर हारून पै गुस्सा होगे अर कह्या, "थम हमनै इस भयानक जगहां पैर क्युं लेकै आए हो? हमनै मिस्र म्ह ए रहणा चाहिए था। जै हम उस देश म्ह जावां सां तो हम युद्ध म्ह मारे जावांगे, अर कनान के लोग म्हारी जनानियां अर बच्यां ताहीं दास बणा लेवैंगे।" वे लोग उन ताहीं वापस मिस्र म्ह लेकै जाण के खात्तर एक अन्य अगुवे ताहीं चुनणा चाहवै थे।

जिब उन लोगां नै इसा कह्या तो परमेसवर भोत गुस्सा हो ग्या था। वो मिलाप आळे तंबू म्ह आया अर कह्या, "थमनै मेरे खिलाफ बलवा करया सै,ज्यातै थम सारे नै इस जंगळ म्ह भटकणा पड़ैगा। हर एक जन जो बीस साल या उसतै घणी उम्र का सै ओड़ै ए मर जावैगा अर कदे भी उस देश म्ह जा न्ही पावैगा जो मैं थमनै देऊँ सूं। केवल कालेब अर यहोशू उस म्ह प्रवेश करैंगे।"

जिब लोगां नै परमेसवर ताहीं इसा कहन्दे सुण्या, तो वे दुखी होये क्यूकें उननै पाप करया था। ज्यातैं उननै कनान के लोगां पे हमला करण का फैसला करया। मूसा नै उन ताहीं न्ही जाण के खात्तर चेतावनी दी क्यूकें परमेसवर उनकै गैल न्ही जावैगा, पर उननै उसकी न्ही सुणी।

परमेसवर इस युद्ध म्ह उनकै गैल न्ही गया था, इस करकै कनानियनै ने उन ताहीं हरा दिया अर उन म्ह तै भोतां ताहीं मार गेरया। फेर इस्राएली लोग कनान तै वापस मुड़गे। आगले चाळीस साल्लां ताहीं, वे जंगळ म्ह इधर-उधर भटकैंगे।

इस्राएली लोगां जरिये जंगळ म्ह भटकण के चाळीस साल्लां के दौरान, परमेसवर नै उनकी जरुरतां ताहीं पूरा करया। उसनै उन ताहीं सुर्ग तै "मन्ना" कुहाण आळी रोट्टी देई। उसने बटेरां के झुंड भी (जो के मध्यम आकार के पंछी होवैं सैं) उनकी छावनी म्ह भेज्जे ताके उनकै धोरै खाण के खात्तर माँस हो। उस पूरे बखत, परमेसवर नै उनके कपड़या अर जूत्यां ताहीं पाटण तै बचाए राख्या।

उरै ताहीं के परमेसवर नै उनके पीणे के खात्तर चमत्कारी रूप तै चट्टान म्ह तै पाणी लिकाड़या। पर इन सारया के उपरान्त, इस्राएली लोगां नै परमेसवर के खिलाफ अर मूसा के खिलाफ शिकायत करी अर कुड़कुड़ाए। फेर भी, परमेसवर वफादार था। उसनै जो वादा करया था के वा अब्राहम, इसहाक, अर याकूब के वंशजां के खात्तर करैगा उसनै वा करया।

एक और बखत जिब उन लोगां के धोरै पाणी न्ही था, परमेसवर नै मूसा तै कह्या, "चट्टान तै बात्तां कर, अर उसतै पाणी लिकड़ैगा।" पर मूसा नै चट्टान तै बात न्ही करी। बजाए इसके, उसनै छड़ी तै चट्टान पै दो बार मारया। इस तरिया तै उसनै परमेसवर का निरादर करया। सारया के पीणे के खात्तर चट्टान म्ह तै पाणी तो लिकड़ आया, पर परमेसवर मूसा तै गुस्सा हो ग्या। उसनै कह्या, "क्यूकें तन्नै इसा करया सै,ज्यातैं तू वादे के देश म्ह जा न्ही करण पावैगा।"

जिब इस्राएली लोग चाळीस साल्लां ताहीं जंगळ म्ह भटक चुके थे, फेर जिन ताहीं परमेसवर के खिलाफ बलवा करया था वे सारे मरगे थे। फेर परमेसवर उन लोगां ताहीं फेर तै उस वादे के देश के सिवाने ताहीं ले ग्या। इब मूसा भोत बूढ़ा हो ग्या था, इस करकै परमेसवर नै लोगां की अगुवाई करण म्ह उसकी मदद करण के खात्तर यहोशू ताहीं चुण्या। परमेसवर नै मूसा तै ये वादा भी करया था के एक दिन वो उन लोगां के धोरै मूसा के जिसा एक भविष्यद्वक्ता भेजैगा।

फेर परमेसवर नै मूसा ताहीं एक पर्वत की चोट्टी पै जाण के खात्तर कह्या ताके वा वादा के देश ताहीं देख सकै। मूसा नै उस वादा के देश ताहीं देख्या पर परमेसवर नै उस ताहीं उस म्ह जाण की अनुमति न्ही दी। फेर मूसा मर ग्या, अर इस्राएलियां नै तीस दिन ताहीं शोक मनाया। यहोशू उनका नया अगुवा बण ग्या। यहोशू एक आच्छा अगुवा था क्यूकें उसनै परमेसवर पै भरोसा करया अर उसकी बात्तां ताहीं मान्ना।