15. प्रतिज्ञा का देश

आखर म्ह, इब वा बखत आ ग्या था के इस्राएली लोग वादे के देश, कनान म्ह प्रवेश करैं। उस देश म्ह यरीहो नाम का एक नगर था। उसकी सुरक्षा के खात्तर उसके च्यारु ओर मजबूत दीवारां थीं। यहोशू नै उस नगर म्ह दो भेदियां ताहीं भेज्या। उस नगर म्ह राहाब नाम की एक वेश्या रहवै थी। उसनै इन भेदियां ताहीं छुपाया, अर फेर बाद म्ह उसनै उन ताहीं नगर तै बच कर लिकड़ण म्ह मदद करी। उसनै इसा इस करकै करया क्यूकें वा परमेसवर म्ह बिशवास करै थी। जिस बखत इस्राएली लोग यरीहो ताहीं नाश करैंगे फेर उननै राहाब अर उसके परिवार की रक्षा करण का वादा करया था।

इस्राएली लोगां ताहीं वादा के देश म्ह प्रवेश करण के खात्तर यरदन नदी पार करणी थी। परमेसवर नै यहोशू तै कह्या, "याजकां ताहीं पैहले जाण दे।" जिब याजकां नै यरदन नदी म्ह अपणे कदमां ताहीं धरया तो पाणी की धारा का बहणा थम ग्या, जिसतै के इस्राएली लोग नदी की दूसरी ओर सूक्खी धरती पर पार जा सके।

उन लोगां नै यरदन नदी पार कर ली तो परमेसवर नै यहोशू तै कह्या के यरीहो पै हमला करण के खात्तर तैयार रहे, फेर भी वा भोत मजबूत नगर था। परमेसवर नै उन लोगां तै कह्या के उनके याजकां अर सैनिकां ताहीं छः दिनां ताहीं उस नगर के च्यारु ओर चक्कर लगाणा सै। आखर याजकां अर सैनिकां नै इसा ए करया।

फेर सातम्मे दिन, इस्राएलियां नै उस नगर के च्यारु ओर सात बार और चक्कर लगाए। उनके नगर के च्यारु ओर सातवीं बार चक्कर लगा लेण के बाद, याजकां नै अपणी तुरहियाँ फूँक्की अर सैनिकां नै जोरदार शब्द करया।

फेर यरीहो के च्यारु ओर की दीवारां गिर गईं! जिसा परमेसवर नै हुकम दिया था इस्राएलियां नै नगर की हर एक चीज ताहीं नाश कर दिया। उननै केवल राहाब अर उसके परिवार ताहीं छोड़ दिया, जो इस्राएलियां का हिस्सां बण गए थे। जिब कनान म्ह रहण आळे दुसरे लोगां नै सुण्या के इस्राएलियां नै यरीहो ताहीं नाश कर दिया सै, तो वे डरगे के इस्राएली लोग उन पै भी हमला करैंगे।

परमेसवर नै इस्राएलियां ताहीं हुकम दिया था के कनान म्ह रहण आळी किसे भी जात के गैल शान्तिसंधि न्ही करणी सै। पर गिबोनियां नामक एक कनानी जाति नै यहोशू तै झूठ बोल्या के वे कनान तै दूर एक जगहां के रहण आळे सैं। उननै यहोशू तै उनकै गैल शान्तिसंधि करण का अनुरोध करया। यहोशू अर दुसरे इस्राएली अगुव्यां नै परमेसवर तै न्ही पुछ्या के उन ताहीं के करणा चाहिए। इसके बजाए, उननै गिबोनियां के गैल शान्तिसंधि कर ली।

तीन दिन बाद, इस्राएलियां नै मालूम होया के गिबोनी लोग कनान म्ह ए रहवैं थे। वे गुस्सा होगे क्यूकें गिबोनियां नै उन ताहीं धोक्खा दिया था। पर उननै उनकै गैल करी गई उस शान्तिसंधि ताहीं बणाए राख्या क्यूकें वा परमेसवर के स्याम्ही करी गई थी। फेर कुछ बखत के बाद, कनान म्ह रहण आळी एक दुसरी जाति, एमोरियां के राजा नै सुण्या के गिबोनियां नै इस्राएलियां के गैल शान्तिसंधि कर ली सै, इस करकै उननै अपणी-अपणी सेना ताहीं एक करकै एक बड़ी सेना बणाई अर गिबोन पै हमला कर दिया। गिबोनियां नै उनकी मदद करण के खात्तर यहोशू के धोरै एक संदेश भेज्या।

आखर यहोशू नै इस्राएलियां की सेना ताहीं कट्ठा करया अर गिबोनियां के धोरै पोहचण के खात्तर वे पूरी रात चाल्ले। सबेरे भोर म्ह उननै एमोरियां की सेना ताहीं चकित कर दिया अर उन पै हमला कर दिया।

उस दिन परमेसवर इस्राएलियां के खात्तर लड़या। उसनै एमोरियां ताहीं घबरा दिया अर उसनै बड़े-बड़े ओळे गिराकै भोत से एमोरियां ताहीं मार डाल्या।

परमेसवर नै सूरज ताहीं भी अकास म्ह एक जगहां पै थमा दिया ताके इस्राएलियां ताहीं पुरा बखत मिल जावै के एमोरियां ताहीं पूरी तरह तै हरा दें। उस दिन, परमेसवर नै इस्राएलियां के खात्तर एक बड़ी जीत प्राप्त करी।

जिब परमेसवर नै उन सेना ताहीं हराण के बाद, भोत से कनानी जाति के लोग इस्राएल पै हमला करण के खात्तर कठ्ठे होये। यहोशू अर इस्राएलियां नै हमला करकै उनका सर्वनाश कर दिया।

इन युद्‌धां के बाद, परमेसवर नै इस्राएल के हरेक गोत्र ताहीं वादे के उस देश म्ह उनका हिस्सा दिया। फेर परमेसवर नै इस्राएल ताहीं उसकी सारी सीमा पै शान्ति प्रदान करी।

जिब यहोशू बूढ़ा हो ग्या तो उसनै इस्राएल के सारे लोगां ताहीं एक साथ बुलाया। फेर यहोशू नै उन लोगां ताहीं याद कराया के उननै उस करार का पालन करण का वादा करया था जो परमेसवर नै उनकै गैल सीनै पर्वत पै करया था। उन लोगां नै परमेसवर के प्रति वफादार रहण अर उसकी व्यवस्था का पालन करन का वादा करया।