17. दाऊद के गैल परमेसवर का करार

शाऊल इस्राएल का पैहला राजा था। वो लाम्बा अर सुथरा था, जिसा वे लोग चाहवै थे एकदम उसा। इस्राएल पै अपणे शासन के पहले कुछ साल्लां म्ह शाऊल एक आच्छा राजा था। पर बाद म्ह वो एक दुष्ट माणस बण ग्या जिसनै परमेसवर की बात्तां ताहीं ना मान्ना, ज्यातैं परमेसवर नै एक दुसरे माणस ताहीं चुण्या जो के एक दिन उसकी जगहां पै राजा बणैगा।

परमेसवर नै दाऊद नाम के एक जवान इस्राएली पुरुष ताहीं चणकै एक दिन शाऊल की जगहां पै राजा होण के खात्तर त्यार करणा शरु करया। दाऊद बैतलहम नगर का एक पाळी था। कई बखतां पै, दाऊद नै सिंह अर भालू दोन्नु ताहीं मार गेरया था क्यूकें दाऊद के जरिये रखवाळी करदे बखत उसके पिता की भेड़ां पै उननै हमला करया था। दाऊद एक नम्र अर धर्मी माणस था। उसनै परमेसवर पै भरोसा करया अर उसकी बात्तां ताहीं मान्या।

जिब दाऊद इब्बे जवान माणस ए था, उसनै लाम्बे-चौड़े गोलियत के खिलाफ लड़ाई करी। गोलियत एक भोत आच्छा सैनिक था। वो भोत मजबूत अर लगभग तीन मीटर लाम्बा था! पर परमेसवर नै गोलियत ताहीं मारण अर इस्राएल ताहीं बचाण म्ह दाऊद की मदद करी।इसकै बाद, दाऊद नै इस्राएल के दुश्मनां पै कई बार जीत हासिल करी। दाऊद एक बड़ा सैनिक बण ग्या, अर उसनै भोत से युध्दां म्ह इस्राएली सेना की अगुवाई करी। लोगां नै उसकी भोत तारिफ करी।

लोगां नै दाऊद तै इतना प्यार करया के शाऊल उसतै जळण लाग्या। आखिरकार शाऊल उसे ताहीं मार डालणा चाहवै था, ज्यातैं दाऊद उसतै अर उसके सैनिकां तै छिपण के खात्तर जंगळ म्ह भाज ग्या। एक दिन, जिब शाऊल अर उसके सैनिक दाऊद की टोह म्ह थे तो शाऊल एक गुफा म्ह गया। यो वोए गुफा थी जिस म्ह दाऊद छुप्या होया था, पर शाऊल नै उस ताहीं न्ही देख्या। दाऊद शाऊल के पाच्छै उसकै घणी लोवै चल्या गया अर उसके कपड़े तै एक टुकड़ा काट लिया। बाद म्ह, जिब शाऊल उस गुफा तै लिकड़या तो दाऊद नै उस ताहीं पुकारकै उस पकड़े होये कपड़े के टुकड़े ताहीं दिखाया। इस तरियां तै, शाऊल जाण ग्या के दाऊद नै राजा बणण के खात्तर उस ताहीं मार डालण तै इंकार कर दिया सै।

कुछ बखत पाच्छै, शाऊल युद्ध मैं मर ग्या, अर दाऊद इस्राएल का राजा बण ग्या। वो एक आच्छा राजा था, अर लोगां नै उसतै प्यार करया। परमेसवर नै दाऊद ताहीं आशीषित करया अर उस ताहीं सफल बणाया। दाऊद नै कई युद्ध लड़े, अर परमेसवर नै इस्राएल के दुश्मनां ताहीं हराण म्ह उसकी मदद करी। दाऊद नै यरूशलेम नगर ताहीं जीतकै उसनै अपणी राजधानी बणाया, जड़ै वो रह्या अर शासन करया। दाऊद चाळीस साल्लां ताहीं राजा रह्या। इस बखत के दौरान, इस्राएल सामर्थी अर धनवान बण ग्या।

दाऊद एक मंदर बणाणा चाहवै था जड़ै सारे इस्राएली परमेसवर की आराधना कर सकैं अर उसकै खात्तर बलिदान चढ़ा सकैं। लगभग 400 साल्लां तै, वे लोग मूसा के बणाए होये मिलाप आळे तंबू म्ह परमेसवर की आराधना कर रह्ये थे अर उसकै खात्तर बलिदान चढ़ा रह्ये थे।

पर औड़ै नातान नाम का एक भविष्यद्वक्ता था। परमेसवर नै उस ताहीं दाऊद तै यो कहण के खात्तर भेज्या: "तन्नै भोत से युद्ध लड़े सैं, इस करकै तू मेरै खात्तर इस मंदर ताहीं न्ही बणावैगा। तेरा बेट्टा इसनै बणावैगा। तौभी, मैं तन्नै बहुतायत तै आशीषित करूँगा। तेरा एक वंशज सदा के खात्तर मेरे लोगां पै राजा के रूप म्ह शासन करैगा।" सदा के खात्तर शासन करण आळा वो दाऊद का एकमात्र वंशज मसीह था। मसीह परमेसवर का चुण्या होया जन था जो संसार के लोगां ताहीं उनके पापां तै बचावैगा।

जिब दाऊद नै नातान के संदेस ताहीं सुण्या तो उसनै परमेसवर का धन्यवाद करया अर उसकी स्तुति करी। परमेसवर उसकी प्रतिष्ठा ताहीं बढ़ा रह्या था अर उसनै भोत सी आशीष दे रह्या था। बेशक, दाऊद न्ही जाणै था के परमेसवर इन बात्तां ताहीं कब करैगा। इस बखत हम जाणा सां के इस्राएलियां ताहीं एक लाम्बे बखत ताहीं, लगभग 1,000 साल्लां ताहीं मसीह के आण की बाट देखणी पड़ैगी।

दाऊद नै कई साल्लां ताहीं न्यायपूर्वक अपणे लोगां पै शासन करया। उसनै बड़ी निष्ठा तै परमेसवर की बात्तां ताहीं मान्ना अर परमेसवर नै उस ताहीं आशीषित करया। हालाँकि, अपणे जीवन के आखर म्ह उसनै परमेसवर के खिलाफ भयानक पाप करया था।

एक दिन दाऊद नै अपणे महल तै बाहर झाँक्या अर एक सुथरी जनानी ताहीं नान्दे होये देख्या। वो उसनै न्ही जाणै था, पर उसनै पता कर लिया के उसका नाम बतशेबा था।

अपणी नजर ताहीं फेर लेण के बजाए, दाऊद नै उसनै अपणे धोरै ल्याण खात्तर किसे नै भेज्या। वो उसके गैल सोया अर उस ताहीं वापस घर भेज दिया। थोड़े बखत के बाद बतशेबा नै यो कहकै दाऊद के धोरै संदेस भेज्या के वो गर्भवती सै।

बतशेबा का धणी ऊरिय्याह नाम का एक माणस था। वो दाऊद के खास सैनिकां म्ह तै एक था। इस बखत वो युद्ध करण के खात्तर बाहर गया होया था। दाऊद नै ऊरिय्याह ताहीं युद्ध तै वापस बुलाकै उसनै अपणी घरआळी के गैल रहण के खात्तर कह्या। पर दुसरे सैनिक युद्ध म्ह थे ज्यातैं ऊरिय्याह नै घर जाण तै मना कर दिया। आखर म्ह दाऊद नै ऊरिय्याह ताहीं वापस युद्ध म्ह भेज दिया अर सेनापति तै उस ताहीं युद्ध म्ह इसी जगहां पै रखण के खात्तर कह्या जड़ै दुश्मन सबतै शक्तिशाली हो ताके वो मारया जावै। तो इसा होया के ऊरिय्याह युद्ध म्ह मारया गया।

ऊरिय्याह के युद्ध म्ह मर जाण के बाद दाऊद नै बतशेबा तै ब्याह कर लिया। बाद म्ह, उसनै दाऊद के बेट्टे ताहीं जन्म दिया। दाऊद नै जो करया उसतै परमेसवर भोत गुस्सा था, ज्यातैं उसनै नातान भविष्यद्वक्ता ताहीं दाऊद ताहीं यो बताण के खात्तर भेज्या के उसका पाप कितना बुरा था। दाऊद नै अपणे पाप का पश्चाताप करया अर परमेसवर नै उस ताहीं माफ कर दिया। अपणे बाकी जीवन म्ह, अपणे कठिन बखत म्ह भी दाऊद परमेसवर के पाच्छै-पाच्छै चाल्या अर उसकी बात्तां ताहीं मान्ना।

पर दाऊद का बच्चा मर ग्या। इस तरियां तै परमेसवर नै दाऊद ताहीं दंडित करया। इसके अलावा, दाऊद के मरण ताहीं, उसके अपणे परिवार के किमे लोगां नै उसके विरुद्ध लड़ाई करी, अर दाऊद की अपणी शक्ति कम होगी थी। पर परमेसवर विश्वासयोग्य था अर इब भी उसनै वा करया जो उसनै दाऊद तै करण का वादा करया था के वो करैगा, भले ए दाऊद नै उसकी अवज्ञा करी थी। बाद म्ह, दाऊद अर बतशेबा के दूसरी संतान पैदा होई, अर उननै उसका नाम सुलैमान धरया।