18. विभाजित राज्य

दाऊद राजा नै चाळीस साल्लां ताहीं शासन करया। फेर वो मर ग्या, अर उसके बेट्टे सुलैमान नै इस्राएल पै शासन करणा शरु करया। परमेसवर नै सुलैमान तै बात करी अर उसतै पुच्छ्या के वो सबतै घणा के चाहवै सै के परमेसवर उसकै खात्तर करै। सुलैमान नै परमेसवर तै माँग्यां के वो उसनै घणा बुद्धिमान बणा दे। इस बात नै परमेसवर ताहीं प्रसन्न करया, ज्यातै परमेसवर नै सुलैमान ताहीं संसार का सबतै बुद्धिमान पुरुष बणा दिया। सुलैमान नै भोत सी बात्तां ताहीं सीख्या अर वो एक बुद्धिमान शासक था। परमेसवर नै उस ताहीं भोत धनवान भी बणा दिया था।

यरूशलेम म्ह सुलैमान नै उस मंदर ताहीं बणाया जिसके खात्तर उसके पिता नै योजना बणाई थी अर सामान ताहीं कठ्ठा करया था। इब लोग मिलाप आळे तंबू के बजाए मंदर म्ह परमेसवर की आराधना करैं थे अर उसकै खात्तर बलि चढ़ावैं थे। परमेसवर आकै मंदर म्ह मौजुद रह्या करै था, अर औड़ै वो अपणे लोगां के गैल वास करै था।

पर सुलैमान नै दूसरे देशां की जनानियां तै प्यार करया। उसनै भोत सी, कम तै कम 1,000 जनानियां तै ब्याह करकै परमेसवर की अवज्ञा करी! इन म्ह तै भोत सी जनानियां पराए देशां तै आईं अर अपणे गैल अपणे देवत्यां ताहीं ल्याई अर उनकी उपासना करणा जारी राख्या। जिब सुलैमान बूढ़ा हो ग्या तो उसने भी उनके देवत्यां की उपासना करी।

इस वजह तै परमेसवर सुलैमान तै गुस्सा था। उसनै कह्या के वो इस्राएल देश ताहीं दो राज्य म्ह विभाजित करण के जरिये उस ताहीं दंड देवैगा। वो सुलैमान के मरण के बाद इसा करैगा।

सुलैमान के मरण के बाद, रहबाम राजा बण्या। इस्राएल देश के सारे लोग उस ताहीं अपणे राजा के रूप म्ह स्वीकार करण के खात्तर एक साथ कठ्ठे होये। उननै रहबाम तै शिकायत करी के सुलैमान नै उनतै भोत कठिन परिश्रम करवाया था अर भोत से कर वसूले थे। उननै रहबाम तै बिनती करी के उनतै कम काम करवावै।

पर रहबाम नै उन ताहीं बड़ी ए मूर्खता तै जवाब दिया, "थम कह्यो सो के मेरे पिता सुलैमान नै थारै ताहीं कठिन परिश्रम करवाया। पर मैं थारै तै उसतै भी अधिक कठिन परिश्रम करवाऊँगा, अर मैं थारै तै उसतै भी घणा पीड़ित करूँगा।"

जिब लोगां नै उस ताहीं इसा कहन्दे सुण्या तो उन म्ह ते कइयां नै उसके विरुद्ध बलवा करया। दस गोत्रां नै उस ताहीं छोड़ दिया; उसकै गैल इब केवल दो गोत्र ए बचे। इन दो गोत्रां नै खुद ताहीं यहूदा का राज्य कह्या।

बाकी के दस गोत्रां नै यारोबाम नाम के एक माणस ताहीं अपणा राजा बणा लिया। ये गोत्र देश के उत्तर-पूर्वी हिस्से म्ह थे। उननै खुद ताहीं इस्राएल का राज्य कह्या।

पर यारोबाम नै परमेसवर के खिलाफ बलवा करया अर लोगां तै पाप करवाया। उसनै अपणे लोगां के द्वारा उपासना करण के खात्तर दो मूर्तियां ताहीं बणाया। वे इब यहूदा के राज्य म्ह यरूशलेम म्ह परमेसवर के मंदर म्ह उसकी आराधना करण के खात्तर न्ही गये।

यहूदा अर इस्राएल के राज्य दुश्मन बणगे अर अक्सर एक दूसरे के खिलाफ लड़ण लाग्गे।

इस्राएल के नए राज्य म्ह, सारे ए राजा दुष्ट थे। इन म्ह तै कई राजा उनकी जगहां पै राजा बणण की चाह राखण आळे दुसरे इस्राएलियां के द्वारा मारे गए थे।

इस्राएल राज्य के सारे ए राजयां नै अर अधिकतर लोगां नै मूर्तियां की उपासना करी। जिब उननै इसा करया, तो वे अक्सर वेश्या के गैल सोए अर उरै ताहीं के कई बार मूर्तियां के आग्गै बच्यां ताहीं बलि भी करया।

यहूदा राज्य के राजा, दाऊद के वंशज थे। इन राजयां म्ह तै कई भले माणस थे जिन ताहीं न्यायपूर्वक शासन करया अर परमेसवर की आराधना करी। पर यहूदा के ज्यादातर राजा दुष्ट थे। उननै दुष्टता तै शासन करया, अर मूर्तियां की उपासना करी। उरै ताहीं के इन म्ह तै कुछ राजयां नै झूठे देवत्यां के आग्गै अपणे बच्यां ताहीं भी बलि कर दिया। यहूदा के अधिकतर लोगां नै भी परमेसवर के खिलाफ बलवा करया अर दुसरे देवत्यां की उपासना करी।