19. भविष्यद्वक्ता

परमेसवर सदा इस्राएलियां कै धोरै भविष्यद्वक्तावां ताहीं भेजदा रहवै था। भविष्यद्वक्ता परमेसवर तै संदेसा ताहीं सुणै थे अर फेर उस ताहीं लोगां ताहीं बतावै थे।

जिब अहाब इस्राएल राज्य पै राजा था तो उस बखत एलिय्याह भविष्यद्वक्ता था। अहाब एक बुरा माणस था। उसनै झूठे बाल देवता की उपासना करवाण के खात्तर लोगां ताहीं विवश करया था। ज्यातैं एलिय्याह नै अहाब तै कह्या के परमेसवर उन लोगां ताहीं दंडित करण जा रह्या था। उसनै उसतै कह्या, "जिब ताहीं मैं फेर तै बारिश होण के खात्तर ना कहूँ जिब ताहीं इस्राएल के राज्य म्ह ना बारिश होवैगी अर ना ए ओस गिरैगी।" इस बात नै अहाब ताहीं इतना गुस्सा कर दिया के उसनै एलिय्याह ताहीं मार डालण का फैसला करया।

इस करकै परमेसवर नै एलिय्याह तै कह्या के वो जंगळ म्ह जाकै अहाब तै छिप जावै। एलिय्याह जंगळ म्ह उस सोते कै धोरै गया जड़ै जाण के खात्तर परमेसवर नै उस ताहीं बताया था। हर सुबेरे अर हर सांझ, पंछी एलिय्याह के खात्तर रोट्टी अर माँस लेकै आवैं थे। इस पुरे बखत, अहाब अर उसकी सेना एलिय्याह की खोज करदे रहे, पर वे उस ताहीं खोज ना पावै।

बारिश ना होण तै कुछ बखत के बाद वा सोता सूख ग्या। ज्यातैं एलिय्याह धोरै ए के एक देश म्ह चल्या गया। उस देश म्ह एक गरीब विधवा थी जिसकै एक बेट्टा था। उनकै धोरै खाणा लगभग खत्म हो चुक्या था क्यूकें औड़ै कोए फसल ना होई थी। पर फेर भी, उस जनानी नै एलिय्याह की देखभाळ करी, ज्यातै परमेसवर नै उसकी अर उसके बेट्टे की जरुरतां ताहीं पूरा करया, इस कारण तै उसके आटे का बरतन अर उसके तेल की कुप्पी कदे खाल्ली ना होई। उस पूरे अकाळ के दौरान उनकै धोरै खाणा था। एलिय्याह कुछ साल्लां ताहीं ओड़ै रह्या।

साढ़े तीन साल्लां के बाद, परमेसवर नै एलिय्याह तै कह्या के वो फेर तै बारिश करैगा। उसनै एलिय्याह तै वापस इस्राएल के राज्य म्ह जाकै अहाब तै बात्तां करण के खात्तर कह्या। ज्यातैं एलिय्याह अहाब कै धोरै गया। जिब अहाब नै उस ताहीं देख्या तो उसनै कह्या, "आच्छा तू सै, मुसीबत पैदा करण आळा!" एलिय्याह नै जवाब दिया, "मुसीबत पैदा करण आळा तो तू सै! तन्नै यहोवा ताहीं त्याग दिया सै। वोए सच्चा परमेसवर सै, पर तू बाल की उपासना कर रह्या सै। इब तन्नै इस्राएल राज्य के सारे लोगां ताहीं कर्मेल पर्वत पै लेकै आणा सै।"

आखर म्ह सारे लोग कर्मेल पर्वत ताहीं गए। वे माणस भी आए जो कहवैं थे के वे बाल के संदेसा ताहीं बोल्ल सैं। ये बाल के भविष्यद्वक्ता थे। वे सारे 450 थे। एलिय्याह नै लोगां तै कह्या, "कब ताहीं थम अपणे मनां ताहीं फिराए रखोगे? जै यहोवा परमेसवर सै तो उसकी आराधना करो! जै बाल परमेसवर सै तो उसकी उपासना करो!"

फेर एलिय्याह नै बाल के भविष्यद्वक्तावां तै कह्या, "एक बळद बलि करकै उसके माँस ताहीं बलिदान होण ताहीं एक वेदी पै रक्खो, पर आग ना लगाणा। उसके बाद मैं भी उसा ए करूँगा, अर एक अलग वेदी पै मैं उस माँस ताहीं रखूँगा। फेर जै परमेसवर वेदी पै आग गिरावै सै तो थम जाण लोगे के वो सच्चा परमेसवर सै।" फेर बाल के भविष्यद्वक्तावां नै एक बलि ताहीं त्यार करया पर आग न्ही लगाई।

फेर बाल के भविष्यद्वक्तावां नै बाल तै प्रार्थना करी, "हे बाल, म्हारी सुण!" पूरे दिन उननै प्रार्थना करी अर चिल्लाए अर उरै ताहीं के खुद ताहीं चाकुवां तै काट लिया, पर बाल नै जवाब न्ही दिया, अर उसनै कोए आग न्ही गिराई।

बाल के भविष्यद्वक्तावां नै बाल तै प्रार्थना करण म्ह लगभग पूरा दिन बिता दिया। आखर म्ह उननै प्रार्थना करणा बंद कर दिया। फेर एलिय्याह नै दूसरे बळद के माँस ताहीं परमेसवर की वेदी पै रख दिया। उसके बाद, उसनै लोगां तै पाणी के विशाल बरतनां ताहीं उस बलिदान पै तब ताहीं उंडेलण के खात्तर कह्या जिब ताहीं के माँस, लकड़ियाँ, अर उरै ताहीं के वेदी के आसपास की धरती पूरी तरह तै गीली ना होगी।

फेर एलिय्याह नै प्रार्थना करी, "हे यहोवा, अब्राहम, इसहाक, अर याकूब के परमेसवर, मान्नै दिखाओ के आप इस्राएल के परमेसवर सैं अर यो के मैं आपका दास सूं। मन्नै जवाब दे जिसतै के ये लोग जाण लेंगे के आप ए सच्चे परमेसवर सों।"

उसे बखत ए, अकास तै आग गिरी अर उसनै माँस, लाकड़ियाँ, चट्टानां, माट्टी, अर उरै ताहीं के वेदी के आसपास के पाणी ताहीं भी जळा दिया। जिब लोगां नै यो देख्या, वे भूमि पै गिर पड़े अर बोल्ले, "यहोवा ए परमेसवर सै! यहोवा ए परमेसवर सै!"

फेर एलिय्याह नै कह्या, "बाल का एक भी भविष्यद्वक्ता बचकै ना जाण पावै!" ज्यातै लोगां नै बाल के भविष्यद्वक्तावां ताहीं पकड़ लिया अर उन ताहीं ओड़ै तै न्यारा लेगे अर उन ताहीं मार डाल्या।

फेर एलिय्याह नै अहाब राजा तै कह्या, "तावळी सी अपणे घर म्ह भाग जा, क्यूकें बारिश होण आळी सै।" तावळी ए बाद्दळ घने होगे, अर भारी बारिश शरु होगी। यहोवा उस सूक्खे ताहीं खत्म कर रह्या था। इसतै साबित होया के यहोवा ए सच्चा परमेसवर सै।

जिब एलिय्याह नै अपणे काम ताहीं खत्म कर दिया, तो परमेसवर नै एलीशा नाम के एक माणस ताहीं अपणा भविष्यद्वक्ता होण के खात्तर चुण्या। परमेसवर नै एलीशा के जरिये भोत से चमत्कार करे। एक चमत्कार नामान के गैल होया। वो एक दुश्मन की सेना का सरदार था, पर उसनै चमड़ी का एक बुरा रोग हो ग्या था। नामान नै एलीशा के बारै म्ह सुण्या था, ज्यातै वो एलीशा कै धोरै आया अर उसतै उस ताहीं ठीक करण के खात्तर बिनती करी। एलीशा नै नामान तै कह्या के जाकै यरदन नदी के पाणी म्ह सात बै डुबकी लगा ले।

नामान गुस्सा हो ग्या। उसनै इसा करण तै इंकार कर दिया, क्यूकें यो उसनै मुर्खता का काम लागै था। पर बाद म्ह उसनै अपणा मन बदल लिया अर जाकै यरदन नदी के पाणी म्ह सात बै डुबकी लगाई। जिब आखरी बै वो पाणी तै बाहर लिकड़या तो परमेसवर नै उस ताहीं ठीक कर दिया।

परमेसवर नै इस्राएल के लोगां कै धोरै दुसरे भोत से भविष्यद्वक्तावां ताहीं भेज्या। उन सारे नै लोगां तै मूर्तियां की उपासना करणा बंद कर देण के खात्तर कह्या। इसके बजाए, उन ताहीं एक दूसरे के गैल न्यायपूर्वक बरताव करणा चाहिए अर एक दूसरे पै दया करणी चाहिए। उन भविष्यद्वक्तावां नै लोगां ताहीं चेतावनी दी के उन ताहीं बुरे काम्मां नै करणा बंद कर देणा सै अर इसके बजाए परमेसवर की बात्तां का पाळण करणा सै। जै उन लोगां नै इसा न्ही करया तो परमेसवर उन ताहीं दोषी मानकै उनका न्याय करैगा, अर उन ताहीं दंडित करैगा।

ज्यादातर बखत, उन लोगां नै परमेसवर की आज्ञा का पाळण न्ही करया। अक्सर उननै भविष्यद्वक्तावां के गैल बुरा व्यवहार करया अर उरै ताहीं के कदे कदे उन ताहीं मार गेरया। एक बार, उननै यिर्मयाह भविष्यद्वक्ता ताहीं सूखे कुएँ म्ह डाल दिया अर उस ताहीं ओड़ै मरण के खात्तर छोड़ दिया। वो कुएँ के तल म्ह कीचड़ म्ह धँस ग्या। पर उस बखत राजा ताहीं उस पै दया आई अर उसनै अपणे सैनिकां ताहीं हुकम दिया के यिर्मयाह के मरण तै पैहले उस ताहीं कुएँ तै बाहर खींच ले।

भविष्यद्वक्तावां नै परमेसवर की ओर तै बोलणा जारी रख्या भले ए लोगां नै उनतै नफरत करी। उननै लोगां ताहीं चेतावनी दी के जै उननै पश्चाताप न्ही करया तो परमेसवर उन ताहीं नाश कर देवैगा। उननै लोगां ताहीं यो भी याद कराया के परमेसवर नै उनकै धोरै मसीह नै भेज्जण का वादा करया सै।