20. बंधुआई और लौटना

इस्राएल के राज्य अर यहूदा के राज्य दोन्नु नै परमेसवर के खिलाफ पाप करया। उननै उस करार ताहीं तोड़ दिया जो परमेसवर नै उनकै गैल सीनै पै बाँध्या था। परमेसवर नै उन ताहीं पश्चाताप करण अर फेर तै उसकी आराधना करण के खात्तर चेतावनी देण नै अपणे भविष्यद्वक्तावां ताहीं भेज्या, पर उननै उनकी बात्तां नै मानण तै इंकार कर दिया।

आखर म्ह परमेसवर नै उनके दुश्मनां ताहीं उननै नाश करण म्ह सक्षम करण के जरिये दोन्नु राज्यां ताहीं दंडित करया। अश्शूर एक अन्य देश था जो भोत शक्तिशाली हो ग्या था। वे दूसरे देशां के प्रति भोत निर्दयी भी थे। उननै आकै इस्राएल के राज्य ताहीं नाश कर दिया। अश्शूरियां नै आकै इस्राएल के राज्य म्ह घण्या ताहीं मार गेरया, जो चाया उस ताहीं लूट लिया, अर देश के कई हिस्यां ताहीं जळा दिया।

अश्शूरियां नै सारे अगुव्यां, धनवान लोगां, अर इसे लोगां ताहीं जो कीमती चिज्जां बणा सकै थे एक साथ कठ्ठा करया अर वे उन ताहीं अश्शूर देश लेगे। इस्राएल म्ह सिर्फ कुछ गरीब इस्राएली ए बचे।

फेर अश्शूरी लोग उस देश म्ह रहण के खात्तर विदेशियां ताहीं लेकै आए। उन विदेशियां नै उन नगरां ताहीं फेर तै बणाया। जो इस्राएली ओड़ै बचे थे उनतै उननै ब्याह करया। इन लोगां के वंशज सामरी कहलाए।

यहूदा के राज्य के लोगां नै देख्या के किस तरियां परमेसवर नै उस पै बिसवास ना करण अर उसकी बात्तां ताहीं ना मानण के कारण इस्राएल के राज्य के लोगां ताहीं दंडित करया था। पर तब पर भी उननै कनानियां के देवत्यां की मूर्तियां की उपासना करी। परमेसवर नै उन ताहीं चेतावनी देण के खात्तर भविष्यद्वक्तावां नै भेज्या, पर उननै सुणण तै इंकार कर दिया।

लगभग 100 साल्लां के बाद अश्शूरियां ने इस्राएल के राज्य ताहीं नाश कर दिया। परमेसवर नै बेबीलोन के राजा, नबूकदनेस्सर नै यहूदा के राज्य पै हमला करण के खात्तर भेज्या। बेबीलोन एक शक्तिशाली देश था। यहूदा का राजा नबूकदनेस्सर का दास बणन अर हर साल उस ताहीं भोत सारे धन का भुगतान करण खात्तर राज्जी हो ग्या।

पर कुछ साल्लां के बाद, यहूदा के राजा नै बेबीलोन के खिलाप बलवा करया। आखर म्ह बेबीलोनियां नै वापस आकै यहूदा के राज्य पै हमला कर दिया। उननै यरूशलेम नगर पै कब्जा कर लिया, मंदर ताहीं नाश कर दिया, अर नगर अर मंदर के खजाने ताहीं लूट लेगे।

बलवा करण के कारण यहूदा के राजा ताहीं दंडित करण के खात्तर, नबूकदनेस्सर के सैनिकां नै राजा के बेट्टे ताहीं उसके स्याम्ही मार गेरया अर फेर उस ताहीं आंधा कर दिया। इसके बाद, वे राजा ताहीं ले गए ताके वो बेबीलोन के जेळखान्ने म्ह मर जावै।

नबूकदनेस्सर अर उसकी सेना यहूदा के राज्य के लगभग सारे ए लोगां ताहीं बेबीलोन लेगी, केवल सबतै गरीब लोगां ताहीं पाच्छै छोड़कै ताके वे खेतां म्ह फसल उगावैं। बखत के इस काळ ताहीं बंधुआई कह्या गया सै जिस म्ह परमेसवर के लोगां ताहीं वादे के देश तै लिकड़ जाण के खात्तर मजबुर करया गया था।

भले ए परमेसवर नै अपणे लोगां ताहीं उनके पाप के खात्तर बंधुआई म्ह ले जाण के जरिये दंडित करया, फेर भी वो उन ताहीं या अपणे वादे ताहीं न्ही भूल्या था। परमेसवर नै अपणे लोगां की निगरानी करणा जारी रख्या अर अपणे भविष्यद्वक्तावां के जरिये उनतै बात्तां करदा रह्या। उसनै वादा करया के सत्तर साल्लां के बाद, वे फेर तै वादे के देश म्ह बोहड़ैगे।

लगभग सत्तर साल्लां के बाद, फारस के राजा कुस्रू नै बेबीलोन ताहीं हरा दिया, इस करकै बेबीलोन के साम्राज्य के बजाए फारस के साम्राज्य नै कई देशां पै शासन करया। इस्राएली लोग इब यहूदी कुह्यावैं थे। उन म्ह तै भोत्तां नै अपना पूरा जीवन बेबीलोन म्ह बिता दिया था। सिरफ भोत कम बूढ़े यहूदियां नै ए यहूदा का देश याद था।

फारसी माणस घणे सामर्थी थे, पर उननै अपणे जीत्ते होये लोगां पै दया करी थी। फारसी लोगां का राजा बणण के थोड़े बखत के बाद, कुस्रू नै एक हुकम दिया के कोए भी यहूदी जो यहूदा ताहीं लौटणा चाहवै था, वो फारस तै लिकड़ कै वापस यहूदा ताहीं जा सकै सै। उरै ताहीं के उसनै उन ताहीं मंदर नै फेर तै बणाण के खात्तर धन भी दिया। आखर म्ह बंधुआई के सत्तर साल्लां के बाद, यहूदियां का एक छोटा समूह यहूदा म्ह यरूशलेम नगर ताहीं लौट आया।

जिब वे लोग यरूशलेम पोहचे तो उननै मंदिर ताहीं अर नगर के च्यारु ओर की दीवार ताहीं फेर तै बणाया। फारसी लोग इब भी उन पै शासन करैं थे पर एक बै फेर तै वे वादे के देश म्ह रह रह्ये थे अर मंदर म्ह आराधना कर रह्ये थे।