21. परमेसवर मसीह का वादा करै सै

जिब परमेसवर नै संसार की सृष्टि करी थी, वो जाणै था के उसे ताहीं बाद म्ह किसे दिन मसीह नै भेजणा होगा। उसनै आदम अर हव्वा तै वादा करया के वो इसा करैगा। उसनै कह्या के हव्वा तै एक वंशज जन्म लेवैगा जो साँप के सिर ताहीं कुचलैगा। जिस साँप नै हव्वा नै धोक्खा दिया वो निसन्देह शैतान था। परमेसवर का मतलब था के मसीह पूरी तरह तै शैतान ताहीं हरा देवैगा।

परमेसवर नै अब्राहम तै वादा करया था के उसके द्वारा संसार की सारी जात्तां आशीष पावैंगी। परमेसवर बाद म्ह किसे बखत पै मसीह नै भेजण के जरिये इस वादा नै पूरा करैगा। वो मसीह संसार की हर एक जात्ति म्ह तै लोगां नै उनके पाप तै छुड़ावैगा।

परमेसवर नै मूसा तै वादा करया था के भविष्य म्ह वो मूसा के समान एक दुसरे भविष्यद्वक्ता ताहीं भेजैगा। यो भविष्यद्वक्ता मसीह होवैगा। इस तरियां तै, परमेसवर नै फेर तै वादा करया के वो मसीह नै भेजैगा।

परमेसवर नै राजा दाऊद तै वादा करया था के उसका एक वंशज मसीह होवैगा। वो राजा होगा अर परमेसवर के लोगां पै सदा के खात्तर राज करैगा।

परमेसवर नै यिर्मयाह भविष्यद्वक्ता तै बात करी अर कह्या के एक दिन वो एक नया करार बाँधैगा। वा नया करार इस्राएल के गैल सीनै पै बाध्यां गया पुराणा करार के जिसा न्ही होवैगा। जिब लोगां के गैल वो अपणा नया करार नै बाँधैगा, तो वो उन पै खुद ताहीं व्यक्तिगत रूप तै जाहिर करैगा। हर एक माणस उसतै प्रीति राखैगा अर उसके नियम कायदे का पाळण करण की इच्छा राखैगा। परमेसवर नै कह्या के यो उसके नियम कायदे का उनके दिलां पै लिख देण के जिसा होगा। वे उसके लोग होंगे, अर परमेसवर उनके पापां ताहीं माफ करैगा। वो मसीह होगा जो उनके गैल उस नया करार ताहीं बाँधैगा।

परमेसवर के भविष्यद्वक्तावां नै यो भी कह्या के मसीह एक भविष्यद्वक्ता होवैगा। एक भविष्यद्वक्ता वो माणस सै जो परमेसवर के वचनां नै सुणै सै अर फेर लोगां पै परमेसवर के संदेसां की घोषणा करै सै। जिसनै भेज्जण का परमेसवर नै वादा करया था वो मसीह एक सिद्ध भविष्यद्वक्ता होवैगा। यानिके वो मसीह परमेसवर के संदेसां ताहीं आच्छी तरियां तै सुणैगा, अर वो लोगां ताहीं उन संदेसां नै आच्छी तरियां तै सिखावैगा।

इस्राएली याजकां नै लोगां के खात्तर परमेसवर के आग्गै बलिदान चढ़ाणा जारी राख्या। यो बलिदान लोगां के पापां के खात्तर उन ताहीं परमेसवर द्वारा दंडित किए जाण की जगहां पै चढ़ाए गए थे। याजकां नै लोगां के खात्तर प्रार्थना भी करी। पर, वो मसीह सिद्ध महायाजक होवैगा जो परमेसवर ताहीं देण के खात्तर एक सिद्ध बलि के रूप म्ह खुद नै चढ़ा देवैगा। यानिके, वो कदे पाप न्ही करैगा, अर जिब वो खुद ताहीं बलि होण के खात्तर देवैगा, तो संसार की कोए भी अन्य बलि जरुरी न्ही होवैगा।

लोगां के झूडां पै राजा अर प्रधान राज करै सैं, अर कदे-कदे वे गलतियाँ करैं सैं। राजा दाऊद नै सिर्फ इस्राएलियां पै शासन करया, पर राजा दाऊद का वंशज मसीह पूरे संसार पै शासन करैगा, अर वो सदा के खात्तर शासन करैगा। इसके अलावा, वो सदा न्यायपूर्ण रीति तै शासन करैगा, अर सही फैसले लेवैगा।

परमेसवर के भविष्यद्वक्तावां नै मसीह के बारै म्ह भोत सी बात्तां कह्यी। उदाहरण के खात्तर, मलाकी नै कह्या के मसीह के आण तै पैहले एक दुसरा भविष्यद्वक्ता आवैगा। वो भविष्यद्वक्ता भोत महत्वपूर्ण होवैगा। इसके अलावा, यशायाह भविष्यद्वक्ता नै लिख्या के मसीह एक कुँआरी तै जन्म लेवैगा। अर मीका भविष्यद्वक्ता नै कह्या के मसीह बैतलहम नगर म्ह जन्म लेवैगा।

यशायाह भविष्यद्वक्ता नै कह्या के मसीह गलील के क्षेत्र म्ह वास करैगा। जो माणस घणे दुःखी सैं मसीह उन ताहीं शान्ति देवैगा। वो कैदियां ताहीं भी आजाद करैगा। मसीह बीमारां नै अर जो सुण न्ही सकदे, देख न्ही सकदे, बोल न्ही सकदे, या चल न्ही सकदे उन ताहीं भी चंगा करैगा।

यशायाह भविष्यद्वक्ता नै यो भी कह्या के लोग मसीह तै नफरत करैंगे अर उसनै स्वीकार करण तै इंकार कर देंगे। दुसरे भविष्यद्वक्तावां नै कह्या के मसीह का एक साथी उसके खिलाप उठैगा। जकर्याह भविष्यद्वक्ता नै कह्या के उसका यो साथी इसा करण के खात्तर दूसरे लोगां तै चाँदी के तीस सिक्के लेवैगा। इसके अलावा, कुछ भविष्यद्वक्तावां नै कह्या के लोग मसीह ताहीं मार डालैंगे, अर यो के वे उसके कपड़यां के खात्तर जुआ खेलैंगे।

भविष्यद्वक्तावां नै यो भी बताया के मसीह किस तरियां मरैगा। यशायाह नै भविष्यद्वाणी करी के लोग मसीह पै थूकैंगे, उसका मजाक उड़ावैंगे, अर उसनै पीटैंगे। वे उसनै छेद देंगे अर वो बड़ी पीड़ा अर यातना म्ह मर जावैगा, जबकि उसनै कुछ भी गलत न्ही करया होगा।

भविष्यद्वक्तावां नै यो भी बताया के मसीह पाप न्ही करैगा। वो सिद्ध होगा। पर वो इस करकै मरैगा परमेसवर उसनै दुसरे लोगां के पापां के कारण दंडित करैगा। उसके मरण तै लोग परमेसवर के गैल मेल करण म्ह सक्षम होंवैंगे। ज्यातैं परमेसवर चाहवै सै के मसीह मरै।

भविष्यद्वक्तावां नै यो भी बताया के परमेसवर मसीह ताहीं मरे होयां म्ह तै जिन्दा करैगा। यो दर्शावै सै के यो सारी नया करार ताहीं बाँध्धण की परमेसवर की योजना थी, ताके वो उन लोगां ताहीं बचा सकै जिननै उसके खिलाप पाप करया सै।

परमेसवर नै भविष्यद्वक्तावां पै मसीह के बारै म्ह भोत सी बात्तां ताहीं प्रकट करया, पर मसीह उन भविष्यद्वक्तावां म्ह तै किसे के भी जीवनकाल म्ह न्ही आया था। इन भविष्यद्वाणियां के दिए जाण के 400 से ज्यादा साल्लां के बाद, सही बखत पै, परमेसवर मसीह नै इस संसार म्ह भेजैगा।