22. यूहन्ना का जन्म

अतीत म्ह, परमेसवर नै अपणे भविष्यद्वक्तावां तै बात करी थी ज्यातै वे लोगां तै बात कर सकै थे। पर उस बखत तै लेकै फेर 400 साल्लां के बीत्तण ताहीं उसनै उनतै बात न्ही करी। फेर परमेसवर नै जकर्याह नाम के भविष्यद्वक्ता कै धोरै एक सुर्गदूत ताहीं भेज्या। जकर्याह अर उसकी घरआळी एलीशिबा परमेसवर का आदर करैं थे। वे घणे बूढ्ढे होगे थे, अर उसकै कोए ऊलाद पैदा न्ही होई थी।

उस सुर्गदूत नै जकर्याह तै कह्या, "तेरी घरआळी के एक बेट्टा पैदा होवैगा। तू उसका नाम यूहन्ना रखणा। परमेसवर उसनै पवित्र आत्मा तै परिपूर्ण करैगा, अर यूहन्ना लोगां नै मसीह ताहीं ग्रहण करण के खात्तर त्यार करैगा।" जकर्याह ने जवाब दिया, "मैं अर मेरी घरआळी ऊलाद पैदा करण के खात्तर घणे बूढ्ढे सां! मैं किस तरियां जाणूं के आप मन्नै सच कह रह्ये सों?"

उस सुर्गदूत नै जकर्याह ताहीं जवाब दिया, "तेरै धोरै इस शुभ संदेश नै ल्याण के खात्तर मैं परमेसवर के द्वारा भेज्या गया सूं। क्यूकें तन्नै मेरे पै बिसवास न्ही करया, ज्यातै बच्चे के जामण ताहीं तू बोलण म्ह सक्षम न्ही होवैगा।" उसे बखत ए, जकर्याह बोलण म्ह असमर्थ था। फेर वो सुर्गदूत जकर्याह के धोरै तै चल्या गया। इसके बाद, जकर्याह घर लौट आया अर उसकी घरआळी गर्भवती होई।

जिब एलीशिबा छः महीन्ने की गर्भवती थी, तो वोए सुर्गदूत अचानक तै एलीशिबा की रिश्तेदार पै प्रकट होया, जिसका नाम मरियम था। मरियम कुँआरी थी अर ब्याह होण के खात्तर यूसुफ नाम के माणस के गैल उसकी मंगनी हो चुकी थी। सुर्गदूत नै कह्या, "तू गर्भवती होवैगी अर एक बेट्टे नै जन्म देवैगी। तन्नै उसका नाम यीशु रखणा सै। वो सर्व-शक्तिमान परमेसवर का बेट्टा होवैगा अर सदा के खात्तर शासन करैगा।"

मरियम नै जवाब दिया, "यो किस तरियां होवैगा, क्यूकें मैं तो कुँआरी सूं?" उस सुर्गदूत नै समझाया, "पवित्र आत्मा तेरे पै आवैगा, अर परमेसवर की सामर्थ तेरे पै छाया करैगी। ज्यातैं वो शिशु पवित्र होवैगा, अर वो परमेसवर का बेट्टा होवैगा।" जो उस सुर्गदूत नै कह्या उस पै मरियम नै बिसवास करया।

यो होण के तुरन्त बाद, मरियम नै जाकै एलीशिबा तै मुलाकात करी। जिब मरियम नै उस ताहीं नमस्कार करया, एलीशिबा का शिशु उसकै भीत्तर उछळ्या। उनकै खात्तर परमेसवर नै जो करया था उसके बारे म्ह वे जनानियां एक साथ खुश होईं। एलीशिबा के गैल तीन महीन्ने रहण के बाद, मरियम घर लौटगी।

इसके बाद, एलीशिबा नै अपणे बाळक ताहीं जन्म दिया। जकर्याह अर एलीशिबा नै उस बाळक का नाम यूहन्ना धरया, जिसा के उस सुर्गदूत नै आदेश दिया था। फेर परमेसवर नै जकर्याह ताहीं बोल्लण म्ह सक्षम करया। जकर्याह नै कह्या, "परमेसवर की स्तुति हो, क्यूकें उसनै अपणे लोगां की मदद करण ताहीं याद राख्या सै! हे मेरे बेट्टे, तू सर्व-शक्तिमान परमेसवर का भविष्यद्वक्ता होवैगा। तू लोगां ताहीं बतावैगा के वे किस तरियां अपणे पापां के खात्तर माफी प्राप्त कर सकैं सैं! "