24. यूहन्ना यीशु नै बपतिस्मा देवै सै

एलीशिबा अर जकर्याह का बेट्टा यूहन्ना, बड़ा होकै एक भविष्यद्वक्ता बण ग्या। वो जंगळ म्ह रह्या करै था, अर जंगळी शहद अर टिड्डियाँ खाया करै था, अर ऊँट के रोम तै बणे कपड़े पैहरया करै था।

भोत से लोग यूहन्ना की बात्तं सुणण के खात्तर जंगळ म्ह लिकड़ आए। उसनै यो कहकै उन ताहीं प्रचार करया, "पश्चाताप करो, क्यूकें सुर्ग का राज ए धोरै सै!"

जिब लोगां नै यूहन्ना के संदेस ताहीं सुण्या, तो उन म्ह तै घण्या नै अपणे पापां तै पश्चाताप करया, अर यूहन्ना नै उन ताहीं बपतिस्मा दिया। यूहन्ना नै देखण खात्तर भोत से धार्मिक अगुवे भी आए, पर उननै अपणे पापां का पश्चाताप या अंगीकार न्ही करया।

यूहन्ना नै धार्मिक अगुव्यां तै कह्या, "हे जहरीले साँपों! पश्चाताप करो अर अपणे बरताव नै बदलो। परमेसवर हर उस पेड़ नै काट डालैगा जो आच्छा फळ न्ही ल्यान्दा, अर वो उन ताहीं आग म्ह झोंक देवैगा।" जो भविष्यद्वक्तावां नै कह्या था यूहन्ना नै उसनै पूरा करया, "देख, तावळी ए मैं तेरै आग्गै अपणे संदेशवाहक ताहीं भेज्जूंगा जो तेरै खात्तर रास्ता नै त्यार करैगा।"

कुछ धार्मिक अगुव्यां नै यूहन्ना तै पूछ्या के के वो मसीह सै। यूहन्ना नै जवाब दिया, "मैं मसीह न्ही सूं, पर वो मेरै बाद आ रह्या सै। वो इतना महान सै के मैं उसके जूत्यां के फीत्ते खोल्लण के भी लायक न्ही सूं।"

आगले दिन, यीशु बपतिस्मा लेण के खात्तर यूहन्ना के धोरै आया। जिब यूहन्ना नै उस ताहीं देख्या, तो उसनै कह्या, "देक्खो! परमेसवर का मेमणा जो संसार के पापां ताहीं ठाकै ले जावैगा।"

यूहन्ना नै यीशु तै कह्या, "मैं तन्नै बपतिस्मा देण के लायक न्ही सूं। बजाए इसके जरुरी सै के तू मन्नै बपतिस्मा दे।" पर यीशु नै कह्या, "तन्नै मेरे ताहीं बपतिस्मा देणा चाहिए, क्यूकें करण के खात्तर सही काम योए सै।" आखर म्ह यूहन्ना नै उस ताहीं बपतिस्मा दिया, जिब के यीशु नै कदे पाप न्ही करया था।

बपतिस्मा दिए जाण के बाद जिब यीशु पाणी तै लिकड़कै बाहर आया, तो परमेसवर का आत्मा कबूतर के रूप म्ह प्रकट होया अर तळै आकै उस पै ठहर ग्या। उसे बखत, परमेसवर नै सुर्ग तै बात करी। उसनै कह्या, "तू मेरा बेट्टा सै। मैं तन्नै प्यार करुँ सूं, अर मैं तेरे तै भोत खुश सूं।"

परमेसवर नै यूहन्ना तै कह्या था, "पवित्र आत्मा तळै आकै किसे पै ठहर जावैगा जिसनै तू बपतिस्मा देवैगा।" वोए परमेसवर का बेट्टा सै परमेसवर एक ए सै। पर जिब यूहन्ना नै यीशु ताहीं बपतिस्मा दिया, तो उसनै परमेसवर पिता ताहीं बात्तां करदे सुण्या, बेट्टा परमेसवर ताहीं देख्या, जो के यीशु सै, अर उसनै पवित्र आत्मा ताहीं देख्या।