25. शैतान यीशु की परीक्षा करै सै

यीशु का बपतिस्मा होण के तुरन्त बाद ए, पवित्र आत्मा उसनै जंगळ म्ह ले ग्या। यीशु ओड़ै चाळीस दिन अर चाळीस रात था। उस बखत उसनै उपवास करया, अर शैतान नै यीशु के धोरै आकै पाप करवाण के खात्तर उसकी परीक्षा करी।

पैहले, शैतान नै यीशु तै कह्या, "जै तू परमेसवर का बेट्टा सै तो इन पत्थरां ताहीं रोट्टी बणा दे ताके तू खा सकै!"

पर यीशु नै शैतान तै कह्या, "परमेसवर के वचन म्ह यो लिख्या सै, 'जिन्दा रहण खात्तर माणस ताहीं सिर्फ रोट्टी की जरुरत न्ही सै, बल्के उन ताहीं हर उस बात की जरुरत सै जो परमेसवर उनतै कहवै सै!'"

फेर शैतान यीशुनै मंदर के सबतै ऊँचे सिरे पै ले ग्या। उसनै उसतै क ह्या, "जै तू परमेसवर का बेट्टा सै तो उरै तै तळै कूद जा, क्यूकें लिख्या सै, 'परमेसवर तन्नै ठाण के खात्तर अपणे सुर्गदूत्तां नै हुकम देवैगा के तेरे पैरां पै पत्थर तै ठेस ना लाग्गै।'"

पर यीशु नै वा न्ही करया जो शैतान नै उसतै करण के खात्तर कह्या था। इसके बजाए, उसनै कह्या, "परमेसवर हर एक तै कहवै सै, 'तू प्रभु अपणे परमेसवर की परीक्षा ना करणा।'"

फेर शैतान नै उस ताहीं संसार के सारे राज्य दिखाए। उसनै उस ताहीं दिखाया के वे कितने शक्तिशाली थे, अर वे कितने सम्पन्न थे। उसनै यीशु तै कह्या, "मैं तन्नै यो सारा दयूंगा जै तू घुटणे टेककै मेरी उपासना करै।"

यीशु नै जवाब दिया, "हे शैतान, मेरै धोरै तै चल्या जा! परमेसवर के वचन म्ह वो लोगां नै हुकम देवै सै, 'सिर्फ अपणे प्रभु परमेसवर की आराधना करो। परमेसवर के रूप म्ह सिर्फ उसे का आदर करो।'"

यीशु नै शैतान की परीक्षा तै हार न्ही मान्नी, इस करकै शैतान उसकै धोरै तै चल्या गया। फेर सुर्गदूत आकै यीशु की सेवाटहल करण लाग्गे।