30. यीशु पाँच हजार लोगां ताहीं खाणा खुवावै सै

यीशु नै अपणे प्रेरितां ताहीं प्रचार करण अर लोगां नै शिक्षा देण के खात्तर भोत से न्यारे-न्यारे गाम्मा म्ह भेज्या। जिब वे ओड़ै लौटे जड़ै यीशु था तो उननै उस ताहीं बताया के उननै के करया था। फेर यीशु नै उन ताहीं झील के दूसरी तरफ उसके गैल एक शान्त जगहां पै जाकै कुछ बखत आराम करण के खात्तर आमंत्रित करया। आखर वे एक किस्ती पै चढ़गे अर झील के दूसरी तरफ चले गए।

पर ओड़ै भोत से इसे लोग थे जिननै यीशु अर चेल्यां ताहीं किस्ती म्ह जान्दे होये देख्या था। ये लोग उनतै आग्गै झील के दूसरे पास्सै जाण के खात्तर झील के किनारे-किनारे पै भाज्जे। आखर जिब यीशु अर चेले पोहचे तो लोगां का एक बड़ा टोळ उनकी बाट देखदा होया ओड़ै पैहले तै था।

उस भीड़ म्ह जनानियां अर बच्यां की गिणती के बिना 5,000 तै घणे माणस थे। यीशु नै उन लोगां पै बड़ा तरस खाया। यीशु के लिए वे लोग बिना पाळी की भेडां के बराबर थे। ज्यातैं उसनै उन ताहीं शिक्षा दी अर उनके बिचाळै जो लोग बीमार थे उन ताहीं चंगा करया।

दिन के आखर म्ह, चेल्यां नै यीशु तै कह्या, "इब देर होगी सै अर आसै-पास्सै कोए नगर न्ही सै। इन लोगां ताहीं विदा कर ताके वे जाकै खाण के खात्तर कुछ लेंवैं।"

पर यीशु नै चेल्यां तै कह्या, "थम उन ताहीं खाण के खात्तर कुछ द्दो!" उननै जवाब दिया, "हम इसा किस तरियां कर सकां सां? म्हारै धोरै सिर्फ पाँच रोट्टी अर दो छोट्टी मछलियाँ सैं।"

यीशु नै अपणे चेल्यां तै कह्या के वे भीड़ के लोगां पै घास पर पचास-पचास के टोळां म्ह बैठण के खात्तर कहवैं।

फेर यीशु नै पाँच रोट्टी अर दो मच्छीयां ताहीं लेकै सुर्ग की ओर देख्या, अर उस खाणे के खात्तर परमेसवर ताहीं धन्यवाद दिया।

फेर यीशु नै रोट्टी अर मच्छियां ताहीं टुकड़यां म्ह तोड़या। उसनै लोगां ताहीं देण के खात्तर अपणे चेल्यां ताहीं वे टुकड़े दे दिए। चेले उस खाणा ताहीं बाँटदे रह्ये, अर वा कदे खत्म न्ही होया! वे सारे लोग खाकै छिक्कगे।

उसके बाद, चेल्यां नै उस खाणे ताहीं कठ्ठा करया जिस ताहीं खाया न्ही गया था अर वा बाराह टोकरियां ताहीं भरण के खात्तर पुरा था! वा सारा खाणा उन पाँच रोट्टी अर दो मच्छियां तै आया था।