31. यीशु पाणी पै आळै सै

पाँच हजार लोगां नै खाणा खुवाण के बाद, यीशु नै अपणे चेल्यां तै नाव म्ह जाण के खात्तर कह्या। उसनै उन ताहीं झील के दूसरी तरफ चले जाण के खात्तर कह्या जिब के वो थोड़े बखत खात्तर ओड़ै ए ठहर ग्या। आखर म्ह चेले चले गए अर यीशु नै भीड़ ताहीं विदा करया के वे अपणे घर जावैं। इसके बाद, यीशु प्रार्थना करण के खात्तर एक पर्वत पै चल्या गया। ओड़ै वो एक्ला था, अर उसनै देर रात ताहीं प्रार्थना करी।

उस बखत, चेले अपणी नाव ताहीं खेन्दे होये जावैं थे, पर हवा उनके खिलाप बड़ी जोर तै बह रही थी। घणी रात हो जाण पै भी वे सिर्फ झील के बीच म्ह ए पोहचे थे।

उस बखत यीशु नै प्रार्थना करणा खत्म करया अर अपणे चेल्यां कै धोरै वापस जाणा शरु करया। वो नाव की तरफ जाण के खात्तर पाणी के ऊपर चाल्लण लाग्गण।

फेर चेल्यां नै उस ताहीं देख्या। वे भोत डरगे क्यूकें उननै सोच्या था के वो कोए भूत सै। यीशु जाणै था के वे डर गे थे, इस करकै उसनै उन ताहीं आवाज देकै कह्या, "डरो ना, यो मैं सूं!"

फेर पतरस नै यीशु तै कह्या, "हे प्रभु, जै यो तू सै तो मन्नै पाणी पै चालकै तेरै धोरै आण का हुकम दे।" यीशु नै पतरस तै कह्या, "आ!"

आखर म्ह पतरस नाव तै उतर ग्या अर यीशु कै धोरै जाण के खात्तर पाणी की सतह पै चालणा शरु करया। पर थोड़ी दूर जाकै, उसनै अपणी आँख्यां ताहीं यीशु तै फेर लिया अर लहरां ताहीं देखणा अर तेज हवा ताहीं महसूस करणा शरु कर दिया।

फेर पतरस डर ग्या अर पाणी म्ह डूबण लाग्या। वो चिल्लाया, "हे प्रभु, मन्नै बचा!" यीशु नै उस बखत हाथ बढ़ा कै उस ताहीं पकड़ लिया। फेर उसनै पतरस तै कह्या, "तेरा बिसवास भोत कम सै! तन्नै सुरक्षित रखण के खात्तर तन्नै मेरे पै भरोसा क्यूं न्ही करया?"

फेर यीशु अर पतरस नाव पै चढ़गे, अर उसे बखत हवा का बहणा बंद हो ग्या। पाणी शान्त हो ग्या। चेल्यां नै चकित होकै यीशु के आग्गै घुटने टेक दिए। उननै उसकी आराधना करी अर उसतै कह्या, "सचमुच तू परमेसवर का बेट्टा सै।"