32. यीशु दुष्टात्मा तै ग्रस्त माणस ताहीं अर एक बीमार जनानी ताहीं चंगा करै सै

यीशु अर उसके चेले अपणी किस्ती म्ह उस क्षेत्र ताहीं गये जड़ै गिरासेनी माणस रहवैं थे। वे उस क्षेत्र म्ह पोहचकै किस्ती तै उतरगे।

ओड़ै एक माणस था जो दुष्टात्मा तै ग्रस्त था।

यो माणस इतना ताकतबर था के कोए भी उस ताहीं काबू न्ही कर सकै था। कई बार लोगां नै उसके हात्थां अर पैरां ताहीं जंजीरां तै भी बाँध्या, पर वो उन ताहीं तोड़ देवै था।

वो माणस उस क्षेत्र म्ह कब्रां म्ह रह्या करै था। यो माणस पूरे दिन अर पूरी रात चिल्लाया करै था। वो कपड़े न्ही परै था अर अक्सर खुद नै पत्थरां तै घायल करया करै था।

वो माणस दौड़ कै यीशु के धोरै आया अर उसके स्याम्ही घुटणे टेक दिए। फेर यीशु ने उस माणस के अंदर की दुष्टात्मा तै बात करी अर कह्या, "इस माणस म्ह तै बाहर लिकड़ आ!"

वा दुष्टात्मा ऊँची आवाज म्ह चिल्लाई, "हे यीशु, परम प्रधान परमेसवर के बेट्टे, तेरा मेरे ताहीं के काम? दया करकै मन्नै ना सता!" फेर यीशु नै उस दुष्टात्मा तै पुच्छ्या, "तेरा नाम के सै?" उसनै जवाब दिया, "मेरा नाम सेना सै, क्यूकें हम घणे सां।" (रोमी सेना म्ह कई हजार सैनिकां का एक टोळ एक "सेना" होवै थी।)

उन दुष्टात्मावां नै यीशु तै बिनती करी, "दया करकै मान्नै इस क्षेत्र तै बाहर ना भेज!" ओड़ै धोरै के पहाड़ पै सूअरां का एक झुंड चर रह्या था। ज्यातैं उन दुष्टात्मावां नै यीशु तै बिनती करी, "दया करकै मान्नै उन सूअरां म्ह भेज दे!" यीशु नै कह्या, "ठीक सै, उन म्ह चले जाओ!"

आखर म्ह वे दुष्टात्माएँ उस माणस म्ह तै लिकड़कै उन सूअरां म्ह प्रवेश करगी। वे सूअर दौड़ कै एक खड़े टीले पै तै झील म्ह कूदगे अर डूब मरे। उस झुंड म्ह लगभग 2,000 सूअर थे।

ओड़ै उन सूअरां की देखभाळ करण आळे लोग थे। जो कुछ होया था जिब उननै देख्या तो वे नगर म्ह भाजगे। यीशु नै जो करया था ओड़ै उननै सारयां ताहीं बताया। उस नगर के माणस लिकड़ आए अर उस माणस ताहीं देख्या जिस म्ह दुष्टात्माएँ थीं। वो शान्ति तै, कपड़े पैहरे होये, अर एक सामान्य माणस की तरियां बरताव करदे होये बैठा था।

वे लोग भोत डरे होये थे अर उननै यीशु तै चले जाण के खात्तर कह्या। आखर म्ह यीशु किस्ती पै चढ़ ग्या। वो माणस जिस म्ह दुष्टात्मा थीं उसनै यीशु के गैल जाण की बिनती करी।

पर यीशु नै उसतै कह्या, "ना। मैं चाऊँ सूं के तू घर जाकै सारयां ताहीं बतावै के परमेसवर नै तेरै खात्तर के करया सै। उन ताहीं बता के किस तरियां परमेसवर नै तेरे पै दया करी थी।"

इस करकै वो माणस चल्या गया अर सारयां ताहीं इस बारे म्ह बताया जो यीशु नै उसकै खात्तर करया था। उसकी कहानी ताहीं सुणन आळा हर एक माणस हैरान होया था।

यीशु झील के दूसरे पास्सै लौट आया। उसके ओड़ै पोहचण के बाद, एक बड़ी भीड़ उसके आसै-पास्सै कठ्ठी होई अर उसनै दबाण लाग्गी। उस भीड़ म्ह एक जनानी थी जो बाराह साल्लां तै लहू बहण की समस्या तै पीड़ित थी। उसनै अपणा सारा धन चिकित्सकां ताहीं दे दिया था ताके वे उसनै ठीक कर सकैं, पर उसका रोग और भी बिगड़ ग्या था।

उसनै सुण्या था के यीशु नै कई बीमार लोगां ताहीं ठीक करया था अर उसनै सोच्या, "मैं पक्की सूं के जै मैं सिर्फ यीशु के कपड़े हे ताहीं छू ल्यूं, तो मैं भी ठीक हो जाऊँगी!" इस करकै वा यीशु के पाच्छै तै आई अर उसके कपड़े नै छू लिया। जिस तरियां ए उसनै उन ताहीं छुया, लहू का बहणा बंद हो ग्या।

तुरन्त ए, यीशु नै जाण लिया के उस म्ह तै शक्ति लिकड़ी सै। इस करकै उसनै पाच्छै मुड़कै पूच्छ्या, "मेरे ताहीं किसनै छुया?" चेल्यां नै जवाब दिया, "उरै इतने सारे लोगां नै तेरे च्यारु ओर भीड़ लगाई होई सै, अर तन्नै धकेल रह्ये सैं। तो तन्नै क्यूं पूच्छ्या के मेरे ताहीं किसने छुया सै?"

वा जनानी यीशु के स्याम्ही काँम्बदी होई अर भोत डरी होई अपणे घुटन्यां पै बैठगी। फेर उसनै उस ताहीं बता दिया के उसनै के करया सै, अर यो भी के वा ठीक होगी सै। यीशु नै उसतै कह्या, "तेरे बिशवास नै तेरे ताहीं चंगा करया सै। शान्ति तै जा।"