34. यीशु दूसरी कहानियां की शिक्षा देवै सै

यीशु नै परमेसवर के राज्य के बारै म्ह दुसरी भोत सी कहानियाँ सुणाई। उदाहरण के खात्तर, उसनै कह्या, "परमेसवर का राज्य एक राई के बीज के बराबर सै जिसनै किसे नै अपणे खेत म्ह बो दिया। थम जाणो सो के राई का बीज सारे बीजां म्ह सबतै छोट्टा होवै सै।"

पर जिब राई का बीज बढ़ जावै सै तो वह बाग के सारे दरखतां म्ह सबतै बड़ा हो जावै सै, इतना बड़ा के पंछी आकै उसकी टाहणियां पै आराम करैं सैं।

यीशु नै एक दुसरी कहाणी बताई, "परमेसवर का राज्य खमीर के बराबर सै जिसनै लेकै एक जनानी आटे के पिंड म्ह मिला देवै सै फेर वा सारे पिंड म्ह फैल जावै सै।"

सुर्ग का राज्य उस खजान्ने के बराबर सै जिसनै किसे नै खेत म्ह छिपा दिया। किसे दुसरे माणस ताहीं वा खजान्ना मिल ग्या अर उसनै उस ताहीं पाण की भोत चाह करी। इस करकै उसनै उस ताहीं फेर तै गाड़ दिया। वो खुशी तै इतना भरया होया था के उसनै जाकर अपणा सारा किमे बेच दिया ताके वो उस खेत ताहीं खरीद सकै जड़ै वो खजान्ना था।

सुर्ग का राज्य एक भोत कीमती शुद्ध मोती के बराबर भी सै। जिब कोए मोतियां का व्यापारी उसनै पा लेवै सै तो वो उसनै खरीदण के खात्तर अपणा सारा किमे बेच देवै सै।

ओड़ै कुछ माणस थे जो सोचै थे के परमेसवर उन ताहीं ज्यातैं स्वीकार करैगा क्यूकें वे भले काम करैं सैं। ये लोग इसे लोगां ताहीं तुच्छ मान्नै थे जो उन भले काम्मां ताहीं न्ही करैं थे। ज्यातैं यीशु नै उन ताहीं यो कहाणी बताईः "दो पुरुष थे अर दोन्नु ए प्रार्थना करण के खात्तर मंदर म्ह गये। उन म्ह तै एक चुंगी लेण आळा था, अर दूसरा एक धार्मिक अगुवा था।"

उस धार्मिक अगुवा नै इस तरियां तै प्रार्थना करी, 'हे परमेसवर, तेरा धन्यवाद हो के मैं दुसरे लोगां के बराबर – जिस तरियां के डाकू, अन्यायी मनुष्य, व्यभिचारी, या उरै ताहीं के उरै मौजुद उस चुंगी लेण आळे के बराबर एक पापी न्ही सूं।'

उदाहरण के खात्तर, मैं हर सप्ताह म्ह दो बार उपवास राक्खूं सूं, अर मैं मन्नै मिलण आळे धन अर बराबर का दसवाँ हिस्सा तन्नै देऊँ सूं।

पर वो चुंगी लेण आळा उस धार्मिक अगुवा तै भोत दूर खड़ा हो ग्या। उसनै ऊपर सुर्ग की ओर आँखां भी न्ही ठाईं। इसके बजाए, उसनै अपणी मुट्ठी तै अपणी छात्ती ताहीं पीट्या अर प्रार्थना करी, 'हे परमेसवर, कृपा करकै मेरे पै दया कर क्यूकें मैं एक पापी सूं।'

फेर यीशु नै कह्या, "मैं थमनै साच्ची कहू सूं, परमेसवर नै उस चुंगी लेण आळे की प्रार्थना ताहीं सुणी अर उस ताहीं धर्मी घोषित करया। पर उसनै उस धार्मिक अगुवे की प्रार्थना ताहीं पसंद न्ही करया। परमेसवर हर एक घमंडी के सिर ताहीं नीचा करैगा, पर वो हर उस जन ताहीं आदर देवैगा जो खुद नै नम्र करै सै।"