35. दयालु पिता की कहाणी

एक दिन, यीशु उन भोत से लोगां ताहीं शिक्षा दे रह्या था जो उसकी सुणन के खात्तर कठ्ठे होए थे। ये लोग चुंगी लेण आळे अर गैल ए दुसरे माणस भी थे जिन ताहीं मूसा के नियम-कायदे का पाळण करण की कोशिश कोनी करी थी।

कुछ धार्मिक अगुव्यां नै देख्या के यीशु इन लोगां तै एक दोस्त के समान बात कर रह्या था। इस करकै उननै एक दूसरे तै यो कहणा शरु कर दिया के वो गलत कर रह्या था। यीशु नै उन ताहीं बात्तां करदे सुण्या, ज्यातैं उसनै उन ताहीं या कहाणी बताई।

एक माणस था जिसकै दो बेट्टे थे। छोट्टे बेट्टे नै अपणे पिता तै कह्या, 'हे पिता, मन्नै इब्बे मेरा हिस्सा चाहिए!' आखर म्ह पिता नै अपणे दोन्नु बेट्यां के बिचाळै अपणी जायदाद का बँटवारा कर दिया।

तावळी ए छोट्टा बेट्टा अपणा सारा किमे कठ्ठा करकै दूर देश ताहीं चल्या गया अर पापी जीवन जीण म्ह अपणे सारे धन ताहीं बर्बाद कर दिया।

इसके बाद, जित्त छोटा बेट्टा था उस देश म्ह एक भयंकर काळ पड़या, अर उसकै धोरै खाणा खरीदण के खात्तर धन न्ही था। इस करकै उसनै जो काम मिल्या वा सूअरां नै चराण का था। वो इतना दुःखी अर भूक्खा था के वो सूअरां का खाणा खाणा चाहवै था।

आखिरकार, उस छोटे बेट्टे नै खुद तै कह्या, 'मैं के कर रह्या सूं? मेरे पिता के सारे नौकरां कै धोरै खाण के खात्तर भोत घणा सै, फेर भी मैं उरै भूक्खा मर रह्या सूं। मैं अपणे पिता के धोरै वापस जाऊँगा अर अपणे पिता का एक सेवक बणण के खात्तर उसतै बिनती करूँगा।'

आखर म्ह उस छोटे बेट्टे नै वापस अपणे पिता के घर की ओर जाणा शरु करया। जिब के वो इब्बे दूर ए था, उसके पिता नै उस ताहीं देख्या अर उस पै तरस खाया। वो दौड़कै अपणे बेट्टे कै धोरै गया अर उसनै गळे लगाकै चूम्या।

उस बेट्टे नै कह्या, 'हे पिता, मन्नै परमेसवर के अर तेरे खिलाप पाप करया सै। मैं तेरा बेट्टा कुहाण के लायक भी न्ही सूं।'

पर पिता नै अपणे एक सेवक तै कह्या, 'तावळी जाकै सबतै आच्छा कपड़ा लेकै आओ अर मेरे बेट्टे ताहीं पिराहो! उसकी आंगळी म्ह अंगूठी अर उसके पैरां म्ह जूते पिराहो। फेर सबतै आच्छा बाछड़ा मारो ताके हम खावां अर उत्सव मनावां, क्यूकें मेरा बेट्टा मर ग्या था, पर इब वो जिन्दा सै! वो खुग्या था, पर इब हमनै उस ताहीं पा लिया सै!'

इस करकै लोगां नै उत्सव मनाणा शरु करया। कुछ बखत बीतण पै, बड़ा बेट्टा खेत म्ह काम करकै घर आया। उसनै संगीत अर नाच की आवाज ताहीं सुण्या अर हैरान होया के यो के हो रह्या था।

जिब बड़े बेट्टे ताहीं मालूम होया के वे ज्यातैं उत्सव मना रह्ये थे क्यूकें उसका भाई घर आ ग्या था, तो वो भोत भोत होया अर घर म्ह दाखिल न्ही होया। उसके पिता नै बाहर आकै उसतै उनके गैल उत्सव मनाण का निवेदन करया, पर उसनै मना कर दिया।

उस बड़े बेट्टे नै अपणे पिता तै कह्या, 'इन सारे साल्लां म्ह मन्नै तेरै खात्तर इमानदारी तै काम करया! कदे भी तेरी बात ताहीं न्ही टाळ्या, पर तन्नै कदे मेरे ताहीं एक छोट्टी बकरी भी न्ही देई ताके मैं अपणे दोस्तां के गैल दावत कर सकूँ। पर तेरे इस बेट्टे नै तेरे धन ताहीं पापी काम करण म्ह बर्बाद कर दिया सै। अर इब जिब वो आया सै तो उसके खात्तर उत्सव मनाण ताहीं तन्नै सबतै आच्छे बाछड़े ताहीं मार डाल्या!'

पिता नै जवाब दिया, 'हे मेरे बेट्टे, तू सदा मेरे गैल सै, अर जो किमे मेरा सै वो सारा तेरा सै। पर म्हारा खात्तर उत्सव मनाणा ठिक सै क्यूकें तेरा भाई मर ग्या था, पर इब वो जिन्दा सै। वो खु ग्या था, पर इब हमनै उस ताहीं पा लिया सै!'