36. रूपान्तरण

एक दिन, यीशु नै अपणे तीन्नु चेल्यां, पतरस, याकूब, अर यूहन्ना ताहीं अपणे गैल म्ह लिया। (यो यूहन्ना नाम का चेला वोए माणस न्ही सै जिस ताहीं यीशु नै बपतिस्मा दिया था।) वे प्रार्थना करण के खात्तर एक ऊँचे पहाड़ पै गए।

जिब यीशु प्रार्थना कर रह्या था तो उसका चेहरा सूरज के समान उज्जवल हो ग्या। उसके कपड़े उजियाळे के समान सफेद होगे, जिसा धरती पै कोए कर सकै उसतै भी बढ़कै सफेद।

फेर मूसा अर एलिय्याह भविष्यद्वक्ता प्रकट होये। ये माणस इस धरती पै इस बखत तै सैकड़ों साल पहले रह्या करैं थे। उननै यीशु तै उसकी मौत के बारै म्ह बात करी, क्यूकें वो जल्दी ए यरूशलेम म्ह मर जावैगा।

जिब मूसा अर एलिय्याह यीशु तै बात कर रह्ये थे फेर पतरस नै यीशु तै कह्या, "म्हारा उरै होणा भला सै। हम तीन मंडपां ताहीं बणाएँ, एक तेरै खात्तर, एक मूसा खात्तर, अर एक एलिय्याह खात्तर।" पर पतरस न्ही जाणै था के वो के कह रह्या सै।

जिब पतरस बात कर रह्या था, तो एक चमकदार बाद्दळ तळै आकै उन पै छा ग्या। फेर उननै बाद्दळ म्ह तै एक आवाज ताहीं आन्दे होये सुण्या। उसनै कह्या, "यो मेरा बेट्टा सै जिसतै मैं प्यार करुं सूं। मैं उसतै खुश सूं। उसकी सुणो।" वे तीन्नु चेले डरगे अर धरती पै लेटगे।

फेर यीशु नै उन ताहीं छुया अर कह्या, "डरो मत। उठ जाओ।" जिब उननै च्यारु ओर देख्या, तो जो भी ओड़ै था वह सिर्फ यीशु था।

यीशु अर वे तीन्नु चेले उस पहाड़ तै वापस तळै उतर आए। फेर यीशु नै उनतै कह्या, "इब जो उरै होया उसका जिक्र किसे तै ना करणा। मैं जल्दी ए मर जाऊँगा अर फेर जिन्दा हो जाऊँगा। उसके बाद, थम लोगां ताहीं बता सको सो।"