37. यीशु लाज़र नै मरयां होयां म्ह तै जिवावै सै

लाज़र नाम का एक माणस था। उसकी दो भाण थीं जिनके नाम मरियम अर मार्था थे। वे सारे यीशु के खास दोस्त थे। एक दिन, किसे नै यीशु ताहीं बताया के लाज़र घणा बीमार था। जिब यीशु नै यो सुण्या तो उसनै कह्या, "यो बीमारी लाज़र के मरण के गैल खत्म न्ही होन्दी। इसके बजाए, या लोगां ताहीं परमेसवर का आदर करण के खात्तर प्रेरित करैगी।"

यीशु अपणे दोस्तां तै प्यार करै था, पर जड़ै वो था ओड़ै उसनै दो दिनां ताहीं बाट देख्खी। उन दो दिनां के बाद, उसनै अपणे चेल्यां तै कह्या, "आओ, वापस यहूदिया ताहीं चाल्लां।" चेल्यां नै जवाब दिया, "पर हे गुरु, इब कुछ ए बखत पैहल्या ओड़ै के लोग तन्नै मार डालणा चाहवै थे!" यीशु नै कह्या, "म्हारा दोस्त लाज़र सो ग्या सै, अर मन्नै उस ताहीं जगाणा सै।"

यीशु के चेल्यां नै जवाब दिया, "हे प्रभु, जै लाज़र सो रह्या सै, तो वो ठीक हो जावैगा।" फेर यीशु नै उनतै स्पष्ट रूप तै कह दिया, "लाज़र मर ग्या सै। मैं खुश सूं के मैं ओड़ै न्ही था, ताके थम मेरे पै बिसवास कर सको।"

जिब यीशु लाज़र के गाम पोहच्या तो लाज़र ताहीं मरे होये पैहल्या तै ए च्यार दिन हो चुके थे। मार्था यीशु तै मिलण के खात्तर बाहर आई अर कह्या, "हे प्रभु, जै तू उरै होन्दा तो मेरा भाई ना मरदा। पर मैं बिसवास करुँ सूं के जो किमे भी तू परमेसवर तै माँगै वो तन्नै देवैगा।"

यीशु नै जवाब दिया, "पुनरुत्थान अर जीवन मैं सूं। जो कोए मेरै पै बिसवास करै सै जै वो मर भी जावै तौभी जीवैगा। जो कोए मेरै पै बिसवास करै सै वो कदे न्ही मरैगा। के तू इस पै बिसवास करै सै?" मार्था नै जवाब दिया, "हे प्रभु, मैं बिसवास करुं सूं के तू परमेसवर का बेट्टा मसीह सै।"

फेर मरियम आई। उसनै यीशु के पैरां म्ह गिरकै कह्या, "हे प्रभु, जै तू उरै होन्दा तो मेरा भाई ना मरदा।" यीशु नै उसतै पूच्छ्या, "थमनै लाज़र ताहीं कित्त रख्या सै?" उननै उसतै बताया, "कब्र म्ह। आ अर देख ले।" फेर यीशु रोण लाग्या।

वा कब्र एक गुफा थी जिसके दरबाजे पै एक पत्थर ताहीं लुढ़काया गया था। जिब यीशु कब्र पै पोहच्या तो उसनै उनतै कह्या, "पत्थर नै हटा द्दो।" पर मार्था नै कह्या, "उसनै मरे होये च्यार दिन हो चुके सैं। उस म्ह तै बदबु आन्दी होगी।"

यीशु नै जवाब दिया, "के मन्नै तेरे ताहीं न्ही कह्या था के जै थम मेरै पै बिसवास करो तो परमेसवर के सामर्थ ताहीं देखोगे?" ज्यातैं उननै पत्थर ताहीं हटा दिया।

फेर यीशु नै उपर सुर्ग की ओर देखकै कह्या, "हे पिता, मेरी सुणन खात्तर मैं तेरा धन्यवाद करुं सूं। मैं जाणू सूं के तू सदा मेरी सुणै सै, पर मन्नै या उरै खड़े इन सारे लोगां की मदद करण के खात्तर कह्या ताके ये बिसवास करैं के तन्नै मेरे ताहीं भेज्या सै।" फेर यीशु नै आवाज लगाई, "हे लाज़र, बाहर लिकड़ आ!"

आखर लाज़र बाहर लिकड़ आया! वो इब भी कफन म्ह लिपट्या होया था। यीशु नै उसतै कह्या, "इस कफन ताहीं लिकाड़ण म्ह उसकी मदद करो अर उसनै आजाद करो।" इस चमत्कार के कारण भोत से यहूदियां नै यीशु पै बिसवास करया।

पर यहूदियां के धार्मिक अगुवे यीशु तै जळण लाग्गे, ज्यातैं वे योजना बणाण के खात्तर एक साथ कठ्ठे होये के किस तरियां यीशु अर लाज़र ताहीं मार डाल्या जावै।