38. यीशु ताहीं पकड़वाया जावै सै

हर साल, यहूदी लोग फसह का त्यौहार मनावै थे। यो इस बारै म्ह एक उत्सव था के कई शताब्दियां पैहल्या परमेसवर नै उनके पूर्वजां ताहीं मिस्र के दासत्व तै छुड़ाया था। लगभग तीन साल के बाद यीशु नै सार्वजनिक रूप तै प्रचार करणा अर शिक्षा देणा शरु करया। यीशु नै अपणे चेल्यां ताहीं बताया के वो उनकै गैल यरूशलेम म्ह फसह के त्यौहार ताहीं मनाणा चाहवै सै, अर यो भी के वो ओड़ै मार डाल्या जावैगा।

यीशु के चेल्यां म्ह एक यहूदा नाम का माणस था। यहूदा प्रेरितां के धन की थैली रखण का प्रभारी था, पर अक्सर वो उस थैली म्ह तै पैसे लिकाड़ लिया करै था। यीशु अर चेल्यां के यरूशलेम म्ह पोहचण के बाद यहूदा यहूदी अगुव्यां के धोरै गया। उसने धन के बदलै म्ह यीशु ताहीं उनके हाथ पकड़वाण का प्रस्ताव रख्या। वो जाणै था के यहूदी अगुवे स्वीकार न्ही करै थे के यीशु ए मसीह था। वो जाणै था के वे उसनै मार डालणा चाहवै थे।

महायाजक के कहण पै यहूदी अगुव्यां नै यीशु ताहीं उनके हात्थां म्ह पकड़वाण के खात्तर यहूदा ताहीं तीस चाँदी के सिक्के दिए। यो उसे तरियां तै होया जिसा के भविष्यद्वक्ता नै कह्या था के होवैगा। यहूदा मान ग्या अर धन लेकै चला गया। वो यीशु ताहीं गिरफ्तार करण म्ह उनकी मदद करण के खात्तर किसे अवसर की खोज करण लाग्या।

यरूशलेम म्ह, यीशु नै अपणे चेल्यां के गैल फसह का त्यौहार मनाया। फसह के भोज के दौरान, यीशु नै रोट्टी लेकै तोड़ी। उसनै कह्या, "इसनै ल्यो अर खाओ। यो मेरा बदन सै जो मैं थारै खात्तर देऊं सूं। इसनै मेरी याद म्ह करणा।" इस तरियां तै, यीशु नै कह्या के वो उनकै खात्तर मर जावैगा, यानिके उनकै खात्तर वो अपणे शरीर ताहीं बलि चढ़ा देवैगा।

फेर यीशु नै एक दाखरस का प्याला लिया अर कह्या, "इसनै पी ल्यो। यो नये करार का मेरा लहू सै जो के मैं उंडेलूँगा ताके परमेसवर थारे पापां ताहीं माफ करै। हर बार इसनै पीन्दे बखत मेरी याद म्ह इसनै करो जो मैं इब कर रह्या सूं।"

फेर यीशु नै अपणे चेल्यां तै कह्या, "थारै म्ह तै एक माणस मन्नै पकड़वावैगा।" चेले चौंकगे, अर पूछण लाग्गे के कौण इसा काम करैगा। यीशु नै कह्या, "मेरा पकड़वाण आळा माणस वो सै जिसनै मैं यो रोट्टी का टुकड़ा देऊँ सूं।" फेर उसनै वो रोट्टी यहूदा ताहीं दी।

उस रोट्टी नै लेण के बाद, यहूदा म्ह शैतान समा ग्या। यहूदा लिकड़ कै यीशु ताहीं गिरफ्तार करण के खात्तर यहूदी अगुव्यां की मदद करण ताहीं चल्या गया। यो रात का बखत था।

खाणा के बाद, यीशु अर उसके चेले जैतून पर्वत ताहीं चले गए। यीशु नै कह्या, "थम सारे आज रात मन्नै छोड़ द्दोगे। यो लिख्या होया सै, 'मैं पाळी ताहीं मारूँगा अर सारी भेड़ां तितर-बितर हो जावैगी।'"

पतरस नै जवाब दिया, "भले ए बाकी के सारे तन्नै छोड़ दें, मैं न्ही छोड़ूँगा!" फेर यीशु नै पतरस तै कह्या, "शैतान थम सारे ताहीं ले लेणा चाहवै सै, पर हे पतरस, मन्नै तेरै खात्तर प्रार्थना करी सै के तू बिसवास तै चुक ना जावै। फेर भी, आज की रात, मुर्गे के बाँग देण ते पैहल्या तू तीन बार इंकार करैगा के तू मन्नै जानणा भी कोनी।"

पतरस नै फेर यीशु तै कह्या, "भले ए मैं मर भी जाऊँ, मैं कदे भी तेरा इंकार न्ही करूँगा!" बाकी के सारे चेल्यां नै भी यो कह्या।

फेर यीशु अपणे चेल्यां के गैल गतसमनी नाम की जगहां पै गया। यीशु नै अपणे चेल्यां तै प्रार्थना करण के खात्तर कह्या ताके शैतान उनकी परीक्षा ना करे। फेर यीशु खुद प्रार्थना करण के खात्तर चल्या गया।

यीशु नै तीन बार प्रार्थना करी, "हे मेरे पिता, जै सम्भव हो तो दया करकै यो दुःख का प्याला पीण के खात्तर मन्नै ना द्दो। पर जै लोगां के पाप माफ करण जाण के खात्तर कोए अर रास्ता न्ही सै, तो तेरी ए मर्जी पूरी हो।" यीशु भोत व्याकुल था अर उसका पसीना लहू की बूँदों के समान था। उसनै सामर्थ देण के खात्तर परमेसवर नै एक सुर्गदूत ताहीं भेज्या।

हर बार प्रार्थना के बाद, यीशु अपणे चेल्यां के धोरै वापस आया, पर वे सो गे थे। जिब यीशु तीसरी बार लौट्या तो यीशु नै कह्या, "जाग ज्यो! मेरा पकड़वाण आळा उरै सै।"

यहूदी अगुव्यां, सैनिकां, अर एक बड़ी भीड़ के गैल यहूदा आया। उननै तलवारां अर लाठियाँ ली होई थीं। यहूदा नै यीशु के धोरै आकै उसतै कह्या, "हे गुरु, नमस्कार," अर उसनै चूम लिया। उसनै गिरफ्तार करे जाण आळे माणस ताहीं यहूदी अगुव्यां पै प्रकट करण के खात्तर इसा करया था। फेर यीशु नै कह्या, "हे यहूदा, के तू एक चुम्बा तै मन्नै पकड़वा रह्या सै?"

जिब वे सैनिक यीशु ताहीं पकड़ रहे थे, तो पतरस नै अपणी तलवार काड्डी अर महायाजक के एक सेवक का कान काट दिया। यीशु नै कह्या, "तलवार ताहीं दूर कर! मैं अपणे पिता तै मेरा बचाव करण के खात्तर सुर्गदूत्तां की एक सेना के खात्तर विनती कर सकूं सूं। पर मन्नै मेरे पिता की बात मानणी सै।" फेर यीशु नै उस माणस के कान ताहीं ठीक कर दिया। फेर सारे चेले भाजगे।