39. यीशु पै मुकद्दमा चालै सै

इब यो आध्धी रात का बखत था। वे सैनिक यीशु नै महायाजक के घर ले आए, क्यूकें वो यीशु तै सवाल करणा चाहवै था। पतरस दूर तै उनका पिच्छा कर रह्या था। जिब सैनिक यीशु नै घर म्ह लेगे, तो पतरस बाहर रुककै खुद नै आग तै गर्म करण लाग्या।

घर के भीत्तर, यहूदी अगुव्यां नै यीशु पै मुकद्दमा चलाया। वे उसके खिलाप झूठी बात्तां ताहीं बोल्लण के खात्तर भोत से झूठे गवाह ताहीं लेकै आए। हालाँकि, उनकी बात्तां एक दूसरे तै सहमत न्ही थीं, इस करकै यहूदी अगुवे यो साबित न्ही कर पाये के वो किसे बात का दोषी था। यीशु नै कुछ न्ही कह्या।

आखर म्ह, महायाजक नै सीधे यीशु की ओर देखकै कह्या, "मान्नै बता के के तू ए जिन्दा परमेसवर का बेट्टा मसीह सै?"

यीशु नै कह्या, "मैं सूं, अर थम मन्नै परमेसवर के गैल बैठा होया अर सुर्ग तै आन्दा होया भी देखोगे।" महायाजक नै अपणे कपड़े फाड़ लिए क्यूकें जो यीशु नै कह्या वो उस बात पै भोत गुस्सा था। वो दुसरे अगुव्यां पै चिल्लाया, "मान्नै यो बताण के खात्तर किसे और गवाह की जरुरत न्ही सै के इस मनुष्य ने के करया सै! थमनै खुद ए उसनै यो कहन्दे होये सुण लिया सै के वो परमेसवर का बेट्टा सै। उसके बारे म्ह थारा के फैसला सै?"

सारे यहूदी अगुव्यां नै महायाजक ताहीं जवाब दिया, "वो मरण के लायक सै!" फेर उननै यीशु की आँख्या पै पट्टी बाँध दी, उस पै थूक्या, उसनै मारया, अर उसका मजाक उड़ाया।

अर पतरस, जिब वो घर के बाहर इन्तजार कर रह्या था। फेर एक दास्सी छोरी नै उसनै देख्या। उसनै उसतै कह्या, "तू भी यीशु के गैल था!" पतरस नै मना कर दिया। बाद म्ह, किसे दुसरी छोरी नै इसे बात ताहीं कह्या, अर पतरस नै फेर तै मना कर दिया। आखर म्ह, कुछ लोगां नै कह्या, "हम जाणा सां के तू यीशु के गैल था क्यूकें थम दोन्नु गलील तै हो।"

फेर पतरस नै कह्या, "जै मैं इस माणस ताहीं जाणु सूं तो परमेसवर मन्नै श्राप दे!" उसे बखत ए पतरस के इस तरियां कसम खाण के बाद, एक मुर्गे नै बाँग दी। यीशु नै पिच्छै मुड़कै पतरस ताहीं देख्या।

पतरस ओड़ै तै चल्या गया अर फूट-फूट कै रोया। उसे बखत, यीशु ताहीं पकड़वाण आळे यहूदा नै देख्या के यहूदी अगुव्यां नै यीशु ताहीं मृत्युदंड दिया सै। यहूदा भोत दुःखी हो ग्या अर जाकै खुद ताहीं मार डाल्या।

इब उस देश का राज्यपाल पिलातुस था। वो रोम के खात्तर काम करया करै था। यहूदी अगुवे यीशु ताहीं उसकै धोरै लेकै आए। वे चाहवै थे कै पिलातुस उसनै मौत की सजा देवै अर उसनै मार डालै। फेर पिलातुस नै यीशु तै पुच्छ्या, "के तू यहूदियां का राजा सै?"

यीशु नै जवाब दिया, "तन्नै साच्ची ए कह्या सै। पर मेरा राज्य उरै धरती का न्ही सै। जै होन्दा तो मेरे दास मेरै खात्तर लड़ाई करदे। मैं धरती पै परमेसवर के बारै म्ह साच्ची बताण के खात्तर आया सूं। हर एक माणस जो सच तै प्यार करै सै वो मेरी सुणै सै।" पिलातुस नै कह्या, "तो सच के सै?"

यीशु के गैल बात करण के बाद, पिलातुस नै बाहर भीड़ के धोरै जाकै कह्या, "मैं इसा कोए कारण न्ही पान्दा के यो माणस मार डाले जाण के लायक हो।" पर यहूदी अगुव्यां अर भीड़ नै चिल्ला कै कह्या, "उसनै क्रूस पै चढ़ा द्यो!" पिलातुस नै जवाब दिया, "वो कुछ भी गलत करण का दोषी न्ही सै।" पर वे और भी ऊँची आवाज म्ह चिल्लाण लाग्गे। फेर पिलातुस नै तीसरी बार कह्या, "वो दोषी न्ही सै!"

पिलातुस डर ग्या के वो भीड़ दंगे शरु कर देगी, इस करकै वो अपणे सैनिकां जरिये यीशु नै क्रूस पै चढ़ाण के खात्तर मान ग्या। रोमी सैनिकां नै यीशु ताहीं कोड़े लगाए, अर उस ताहीं राजसी कपड़ा पिराया, अर उसके सर पै काँट्या तै बणा मुकुट रख्या। फेर वे यो कहकै उसका मजाक उड़ाण लाग्गे, "देक्खो, यहूदियां का राजा!"