40. यीशु ताहीं क्रूस पै चढ़ाया जावै सै

यीशु का मजाक करण के बाद, सैनिक उसनै क्रूस पै चढ़ाण के खात्तर लेगे। उननै उस क्रूस ताहीं उसे तै उठवाया जिस पै वो मरैगा।

वे सैनिक यीशु नै उस जगहां पै लेकै आए जो "खोपड़ी" कुहवावै सै अर उसके हात्थां अर पैरां ताहीं क्रूस पै ठोक दिया। पर यीशु नै कह्या, "हे पिता, इन ताहीं माफ कर, क्यूकें ये न्ही जाणदे के ये के कर रह्ये सैं।" उननै एक तख्ती ताहीं भी उसके सर के उपर टांग दिया। उस पै लिख्या था, "यहूदियां का राजा।" पिलातुस नै उनतै योए लिखण के खात्तर कह्या था।

फेर सैनिकां नै यीशु के कपड़यां के खात्तर चिट्ठियाँ डाल्ली। जिब उननै इसा करया तो उननै उस भविष्यद्वाणी ताहीं पूरा करया जो कहवै थी, "उननै मेरे कपड़यां ताहीं आप्पस म्ह बाँट लिया, अर मेरे कपड़यां के खात्तर चिट्ठियाँ डाल्ली।"

ओड़ै दो डाकू भी थे, जिन ताहीं सैनिकां नै उसे बखत पै क्रूस पै चढ़ाया था। उननै उन ताहीं यीशु की दोन्नु तरफ रख्या था। उन म्ह तै एक डाकू नै यीशु का मजाक उड़ाया, पर दूसरे नै कह्या, "के तू न्ही डरदा के परमेसवर तन्नै दंड देवैगा? हम भोत से बुरे काम्मां ताहीं करण के दोषी सां, पर यो मनुष्य बेकसुर सै।" फेर उसनै यीशु तै कह्या, "जिब तू अपणे राज्य म्ह आवै तो कृपया मन्नै याद रखिये।" यीशु नै जवाब दिया, "आज ए तू मेरे गैल सुर्गलोक म्ह होवैगा।"

यहूदी अगुव्यां अर भीड़ के दुसरे लोगां नै यीशु का मजाक उड़ाया। उननै उसतै कह्या, "जै तू परमेसवर का बेट्टा सै, तो क्रूस तै तळै उतर आ अर खुद ताहीं बचा ले! फेर हम तेरे पै बिसवास करांगे।"

फेर उस सारे देश का अकास पूरी तरियां तै काळा हो ग्या, भले ए वा दिन के बीच का बखत था। यो दोपहर के बखत काळा होया था अर तीन घंटे ताहीं इसा ए रह्या था।

फेर यीशु नै पुकारकै कह्या, "पूरा होया! हे पिता, मैं अपणी आत्मा तेरे हात्थां म्ह सौंपूं सूं।" फेर उसनै अपणे सर ताहीं झुकाया अर अपणे प्राण ताहीं त्याग दिया। जिब वो मरया तो एक भूकम्प आया। वा बड़ा पड़दा जो परमेसवर की उपस्थिति तै लोगां ताहीं न्यारा करै था उपर तै नीचे की ओर पाटकै दो हिस्से हो ग्या।

अपणी मौत के जरिये, यीशु नै लोगां के खात्तर परमेसवर के धोरै आण का रास्ता खोल दिया। जिब यीशु की निगरान्नी करण आळे एक सैनिक नै जो कुछ होया था या सारा देख्या तो उसनै कह्या, "पक्का, यो माणस बेकसूर था। यो परमेसवर का बेट्टा सै।"

फेर यूसुफ अर नीकुदेमुस नाम के दो यहूदी अगुवे आए। वे बिसवास करै थे के यीशु ए मसीह था। उननै पिलातुस तै यीशु के शरीर ताहीं माँग्यां। उननै उसके शरीर ताहीं कपड़े म्ह लपेटया। फेर वे उसनै एक चट्टान म्ह तै काटकै बणाई गई कब्र म्ह लेगे अर उसके भीत्तर रक्ख दिया। फेर उननै उस कब्र के द्वार ताहीं बंद करण के खात्तर एक बड़े पत्थर ताहीं लुढ़का दिया।