41. परमेसवर यीशु ताहीं मरयां होयां म्ह तै जुवावै सै

सैनिकां के जरिये यीशु ताहीं क्रूस पै चढ़ाण बाद, यहूदी अगुव्यां नै पिलातुस तै कह्या, "उस झूठे, यीशु नै कह्या था के वो तीन दिनां पाच्छै मरयां होयां म्ह तै जी उठैगा। किसे नै यो पक्का करण के खात्तर कब्र की निगरान्नी करणी होगी के उसके चेले उसके शरीर ताहीं चुराकै ना ले जावैं। जै वे इसा करै सैं तो वे कहवैगे के वो मरयां होयां म्ह तै जी उठ्या सै।"

पिलातुस नै कह्या, "कुछ सैनिकां ताहीं ले जाओ, अर जिस तरियां थम कर सको उसे तरियां कब्र की निगरान्नी करो।" ज्यातैं उननै उस कब्र के प्रवेशद्वार के पत्थर पै एक मोहर लगा दी। उननै यो पक्का करण के खात्तर ओड़ै सैनिकां ताहीं भी बैठा दिया के कोए भी उसके शरीर ताहीं चुरा ना सकै।

यीशु के मरण के बाद का दिन सब्त का दिन था। कोए भी सब्त के दिन काम न्ही कर सकै था, इस करकै यीशु का कोए भी दोस्त कब्र पै न्ही आया था। पर सब्त के बाद के दिन, सुबह घणी सबेरे नै, कुछ जनानियां यीशु की कब्र पै जाण के खात्तर तैयार होई। वे उसके शरीर पै और भी मसालां ताहीं लगाणा चाहवै थीं।

उन जनानियां के पोहचण तै पैहल्या, कब्र पै एक बड़ा भूकम्प होया। सुर्ग तै एक सुर्गदूत नै आकै उस पत्थर ताहीं लुढ़का दिया जो कब्र के प्रवेशद्वार ताहीं ढाँप्पे होये था अर उस पै बैठ ग्या। यो सु्र्गदूत उजियाळे के समान चमक रह्या था। कब्र पै जो सैनिक थे उननै उस ताहीं देख्या। वे इतना डर गए थे के मरयां होयां की तरियां धरती पै गिर पड़े।

जिब वे जनानियां कब्र पै पोहची तो उस सु्र्गदूत नै उनतै कह्या, "मत डरो। यीशु उरै कोनी सै। वो मरयां होयां म्ह तै जी उठ्या सै, जिसा के उसनै कह्या था के वो जी उठैगा! कब्र म्ह खोजो अर देक्खो।" उन जनानियां नै कब्र के भीत्तर अर जड़ै यीशु का शरीर रख्या होया था ओड़ै खोज करी अर देख्या के उसका शरीर ओड़ै न्ही था!

फेर उस सुर्गदूत नै उन जनानीयां तै कह्या, "जाकै उसके चेल्यां ताहीं बताओ, 'यीशु मरयां होया म्ह तै जी उठ्या सै अर वो थारै आग्गै-आग्गै गलील म्ह जावैगा।'"

वे जनानियां हैरान होई अर भोत खुश होई। वे चेल्यां ताहीं यो खुश खबरी सुणाण के खात्तर दौड़ीं।

जिब वे जनानियां चेल्यां ताहीं यो खुश खबरी बताण के खात्तर अपणे रास्ता पै थीं, तो यीशु उन पै जाहिर होया। वे उसके पैरां पै गिर पड़ीं। फेर यीशु नै कह्या, "मत डरो। जाकै मेरे चेल्यां तै गलील जाण ताहीं कहो। वे ओड़ै मन्नै देखैंगे।"