42. यीशु सुर्ग ताहीं लौट जावै सै

जिस दिन परमेसवर नै यीशु ताहीं मरयां होयां म्ह तै जिन्दा करया था, उसके दो चेले धोरै के गाम म्ह जा रहे थे। चलदे होये वे यीशु के गैल जो होया था। उसके बारे म्ह बात्तां कर रहे थे, उन ताहीं आशा थी के वो मसीह था, पर फेर भी वो मार डाल्या गया था। इब वे जनानियां कहवैं सैं के वो फेर तै जिन्दा हो ग्या सै। वे न्ही जाणै थे के किस बात पै बिसवास करणा सै।

यीशु नै उनकै धोरै आकै उनकै गैल चालणा शरु करया, पर वे उसनै पिच्छाण न्ही पाए। उसनै पूच्छ्या के वे किस बारे म्ह बात कर रहे थे। उननै उस ताहीं पाच्छले दिनां म्ह यीशु के गैल होई सारी घटना के बारै म्ह बताया। उननै सोच्या के वे किसे परदेशी तै बात्तां कर रहे थे जो न्ही जाणै था के यरूशलेम म्ह के होया था।

फेर यीशु नै उन ताहीं समझाया के परमेसवर का वचन मसीह के बारै म्ह के कहवै सै। भोत पैहल्या, भविष्यद्वक्तावां नै कह्या था के बुरे लोग मसीह ताहीं पीड़ित करैंगे अर मार डालैंगे। पर भविष्यद्वक्तावां नै यो भी कह्या था के वो तीसरे दिन जी उठैगा।

जिब वे उस नगर म्ह पोहचे जड़ै वे दो जन ठहरणा चाहवै थे, जिब ताहीं लगभग सांझ होगी थी। उननै यीशु ताहीं उनकै गैल ठहरण के खात्तर आमंत्रित करया, आखर म्ह वो उनकै गैल एक घर म्ह गया। अपणे सांझ के खाणे नै खाण के खात्तर वे बैठगे। यीशु ने एक रोट्टी नै लेकै उसके खात्तर परमेसवर का धन्यवाद दिया, अर फेर उस ताहीं तोड्या। अचानक तै, उननै जाण लिया के वो यीशु था। पर उसे बखत, वो उनकी आँख्यां तै ओझल हो ग्या।

उन दो माणसां नै एक दूसरे तै कह्या, "वो यीशु था! इस करकै जिब उसनै म्हारै ताहीं परमेसवर के वचन ताहीं समझाया था तो हम घणे उत्साहित थे!" उसे बखत ए, वे लिकड़ कै वापस यरूशलेम ताहीं गए। जिब वे पोहच्चे तो उननै चेल्यां ताहीं बताया, "यीशु जिन्दा सै! मान्नै उस ताहीं देख्या सै!"

जिब चेले बात कर रहे थे, यीशु अचानक तै उस कमरे म्ह उनके गैल जाहीर होया। उसनै कह्या, "थमनै शान्ति मिले!" चेल्यां नै सोच्या के वो कोए भूत था, पर यीशु नै कह्या, "थम क्यूं डरो सो? थम यो क्यूं न्ही सोचो सो के यो सचमुच म्ह मैं, यीशु सूं? मेरे हात्थां अर पैरां ताहीं देक्खो। भूतां के गैल इसा शरीर न्ही होन्दा जिसा मेरै धोरै सै।" यो दिखाण के खात्तर के वो कोए भूत न्ही था, उसनै खाण के खात्तर कुछ माँग्यां। उननै उस ताहीं मच्छी का एक टुकड़ा दिया, अर उसनै उस ताहीं खा लिया।

यीशु नै कह्या, "मेरे बारे म्ह परमेसवर का वचन जो कुछ भी कहवै सै वो पुरा होवैगा। मन्नै तेरे ताहीं बता दिया था के इसका होना जरुरी सै।" फेर यीशु नै उनक ताहीं परमेसवर का वचन आच्छे तै समझाया। उसनै कह्या, "भोत पैहल्या भविष्यद्वक्तावां नै लिख्या था के मन्नै, दुःख ठाणा होगा, मरणा होगा अर फेर तीसरे दिन मरयां होयां म्ह तै जी उठणा होवैगा।"

उन भविष्यद्वक्तावां नै यो भी लिख्या था के मेरे चेले परमेसवर के वचन की घोषणा करैंगे। वे हर एक ताहीं पश्चाताप करण के खात्तर बतावैंगे। जै वे इसा करै सैं तो परमेसवर उनके पापां ताहीं माफ करैगा। मेरे चेले इस सन्देस का प्रचार करणा यरूशलेम तै शरु करैंगे। फेर वे सारी जगहां सारी जात्तां म्ह जावैंगे। थम मेरी हर एक बात अर काम के गवाह हो जो मन्नै कह्या अर करया था, अर उस सारे के भी जो मेरे गैल होया।

आगले चाळीस दिनां के दौरान, यीशु अपणे चेल्यां पै कई बार जाहिर होया। एक बार तो वह एक ए बखत पै 500 तै ज्यादा लोगां पै जाहिर होया! उसनै अपणे चेल्यां पै कई तरियां तै साबित करया के वो जिन्दा था, अर उसनै उन ताहीं परमेसवर के राज्य के बारै म्ह शिक्षा देई।

यीशु नै अपणे चेल्यां तै कह्या, "परमेसवर नै मेरे ताहीं सुर्ग अर धरती के हर एक माणस पै शासन करण का हक दिया सै। इस करकै इब मैं थारै ताहीं कहूं सूं: जाकै सारी जात्तां के लोगां ताहीं चेला बणाओ। इसा करण के खात्तर, थमनै उननै पिता, बेट्टा, अर पवित्र आत्मा के नाम तै बपतिस्मा देणा सै। जो किमे भी मन्नै थारै ताहीं हुकम दिया सै उन सारी बात्तां ताहीं मानणा भी थमनै उन ताहीं सिखाणा सै। याद राक्खो, मैं सदा थारै गैल रहूँगा।"

यीशु के मरयां होयां म्ह तै जी उठण के चाळीस दिनां के पाच्छै, उसनै अपणे चेल्यां तै कह्या, "जिब ताहीं के मेरा पिता थमनै सामर्थ न्ही देन्दा तब ताहीं यरूशलेम म्ह ठहरे रहो। वो थारै पै पवित्र आत्मा भेजण के जरिये इसा करैगा।" फेर यीशु सुर्ग म्ह चल्या गया, अर एक बाद्दळ नै उस ताहीं उनकी नजर तै छुपा लिया। सुर्ग म्ह यीशु सारी चीज्जां पै शासन करण परमेसवर की दाहिनी ओर बैठ ग्या।