43. कलीसिया की शरुआत होवै सै

यीशु के सुर्ग लौट जाण के बाद, चेले यरूशलेम म्ह ए रुके जिसा के यीशु नै उन ताहीं करण का हुकम दिया था। ओड़ै के बिशवासी लोग लगातार एक साथ प्रार्थना करण के खात्तर कठ्ठे होयां करै थे।

हर साल, फसह के त्यौहार के 50 दिनां के बाद, यहूदी लोग पिन्तेकुस्त नाम के एक खाश दिन ताहीं मनाया करैं थे। पिन्तेकुस्त वा बखत था जिब यहूदी लोग कणक की कटाई ताहीं मनाया करैं थे। सारे संसार तै यहूदी लोग पिन्तेकुस्त के दिन नै एक साथ मनाण के खात्तर यरूशलेम म्ह आए थे। इस साल, पिन्तेकुस्त मनाण का बखत यीशु के सुर्ग म्ह चले जाण के लगभग एक सप्ताह के बाद आया था।

जिस बखत सारे बिशवासी लोग एक साथ कठ्ठे थे, तो जिस घर म्ह वे थे अचानक तै वा तेज हवा की आवाज तै भर ग्या। फेर आग की लपट्यां के जिसा दिखण आळा किमे सारे बिशवासिय़ां के सिरां के ऊपर जाहिर होया। वे सारे पवित्र आत्मा तै भर गए अर उननै अन्य भाषा म्ह परमेसवर की स्तुति करी। ये वा भाषाएँ थीं जिन ताहीं बोलण के खात्तर उन ताहीं पवित्र आत्मा नै सक्षम करया था।

जिब यरूशलेम म्ह रहण आळे लोगां नै उस शोर ताहीं सुण्या, तो वे भीड़ के रूप म्ह यो देखण के खात्तर एक साथ आए के के हो रह्या था। उननै बिशवासियां ताहीं परमेसवर द्वारा करे गए बड़े-बड़े काम्मां की घोषणा करदे होये सुण्या। वे हैरान थे क्यूकें वे उन काम्मां नै अपणी ए भाषा म्ह सुण रह्ये थे।

इन म्ह तै कुछ लोगां नै कह्या के वे चेले नशे म्ह थे। पर पतरस खड़या होया अर उनतै बोल्या, "मेरी बात सुणो! ये लोग नशे म्ह न्ही सैं! इसके बजाए, जो थम देख्खो सो वा वोए सै जो योएल भविष्यद्वक्ता नै कह्या था के होवैगा: परमेसवर नै कह्या, 'अंत के दिनां म्ह, मैं अपणा आत्मा उंडेलूँगा।'"

"हे इस्राएली माणसों, यीशु एक इसा मनुष्य था जिसनै यो दिखाण के खात्तर के वो कौण था भोत से अनोखे काम करे थे। उसनै परमेसवर के सामर्थ तै भोत से अद्भुत काम्मां ताहीं करया था। थम यो जाणो सौ, क्यूकें थमनै इन काम्मां ताहीं देख्या सै। पर थमनै उस ताहीं क्रूस पै चढ़ा दिया!"

"यीशु मर गया पर परमेसवर नै उस ताहीं मरे होयां म्ह तै जिन्दा कर दिया। इसनै उस बात ताहीं पूरा कर दिया जिसनै एक भविष्यद्वक्ता नै लिख्या था: 'तू अपणे पवित्र जन ताहीं कब्र म्ह सड़ण न्ही देवैगा।' हम गवाह सां के परमेसवर नै यीशु ताहीं फेर तै जिन्दा कर दिया।"

"परमेसवर पिता नै इब यीशु ताहीं अपणी दाहिनी ओर बैठा कै उस ताहीं आदर दिया सै। अर यीशु नै म्हारे खात्तर पवित्र आत्मा भेज्या सै जिसी के उसनै वादा करया था के वो भेजैगा। पवित्र आत्मा ए उन काम्मां ताहीं होण दे रह्या सै जिन ताहीं थम देख रहे अर सुण रहे सो।"

"थमनै उस माणस, यीशु ताहीं क्रूस पै चढ़ा दिया। पर पुरी तौर तै जाण ल्यो के परमेसवर नै यीशु ताहीं सारी चिज्जां पै प्रभु अर मसीह दोन्नु ठहराया सै!"

पतरस की सुणण आळे लोग उसके द्वारा कही गई बात्तां तै अंदर ताहीं हिल गए थे। ज्यातैं उननै पतरस अर चेल्यां तै पूच्छ्या, "हे भाइयों, हमनै के करणा चाहिए?"

पतरस नै उन ताहीं जवाब दिया, "थारै म्ह तै हर एक अपणे पापां के खात्तर पश्चाताप करे ताके परमेसवर थारे पापां ताहीं माफ करे, अर यीशु मसीह के नाम तै बपतिस्मा ले। फेर वो थमनै वरदान के रुप म्ह पवित्र आत्मा भी देवैगा।"

पतरस नै जो कह्या उस पै लगभग 3,000 लोगां नै बिशवास करया अर यीशु के चेले बण गए। उननै बपतिस्मा लिया अर यरूशलेम की कलीसिया का हिस्सा बणगे।

जिब प्रेरितां नै उन ताहीं शिक्षाएँ दीं तो बिसवासियां नै लगातार सुण्या। वे अक्सर मिला करैं थे अर एक साथ खाणा खाया करैं थे, अर उननै अक्सर एक दूसरे कै खात्तर प्रार्थना करी। उननै मिल कै परमेसवर की स्तुति करी अर जो किमे भी उनकै धोरै था उननै एक दूसरे के गैल साझा करया। नगर का हर एक माणस उनके खात्तर आच्छा विचार राखै था। हर रोज, अधिक तै अधिक लोग बिशवासी बणदे गये।