44. पतरस अर यूहन्ना एक भिखारी ताहीं चंगा करै सैं

एक दिन, पतरस अर यूहन्ना मंदर म्ह गये। एक अपंग माणस भीख माँगण खात्तर फाटक पै बैठ्या होया था।

पतरस नै उस लंगड़े माणस की ओर देख्या अर कह्या, "मेरे धोरै तन्नै देण के खात्तर पैसा तो न्ही सै। पर जो मेरै धोरै सै वो मैं तन्नै देऊँ सूं। यीशु के नाम तै, उठ अर चाल-फिर!"

उसे बखत, परमेसवर नै उस लंगड़े माणस ताहीं चंगा कर दिया। उसनै आसै-पास्सै चालणा अर कूदणा, अर परमेसवर की स्तुति करणा शरु कर दिया। मंदर के आँगण म्ह मौजुद माणस हैरान थे।

तावळी ए लोगां की एक भीड़ उस माणस ताहीं देखण के खात्तर आई जो चंगा हो ग्या था। पतरस नै उनतै कह्या, "यो माणस ठीक सै, पर इस बात पै हैरान ना हो। मान्नै इस ताहीं अपणी शक्ति तै चंगा न्ही करया सै, या इस करकै न्ही के हम परमेसवर का आदर करां सां। बल्के, वो यीशु सै जिसनै इस माणस ताहीं अपणी शक्ति तै चंगा करया सै, क्यूकें हम यीशु पै भरोसा करां सां।"

"वो थम ए सो जिननै उस रोमी राज्यपाल ताहीं यीशु नै मार डालण के खात्तर कह्या था। थमनै उस ताहीं मार डाल्या जो सारयां नै जीवन देवै सै। पर परमेसवर नै उस ताहीं मरे होया म्ह तै जिन्दा करया। थमनै न्ही समझ्या के थम के कर रह्ये थे, पर जिब थम उन काम्मां ताहीं कर रह्ये थे, तो जो भविष्यद्वक्तावां नै कह्या था वो पूरा होया। उननै कह्या था के मसीह दुःख उठावैगा अर मर जावैगा। परमेसवर नै इसनै इस तरीयां तै होण दिया। इस करकै इब, पश्चाताप करो अर परमेसवर की ओर फिरो, ताके वो थारे पापां ताहीं धोकै साफ कर दे।"

जिब मंदर के अगुव्यां नै पतरस अर यूहन्ना ताहीं सुण्या, तो वे भोत घबरा गे। इस करकै उननै उन ताहीं गिरफ्तार करकै जेलखान्ने म्ह डाल दिया। पर जो पतरस नै कह्या था उस पै भोत से लोगां नै करया। यीशु पै बिसवास करण आळ्यां की गिणती बढ़कै लगभग 5,000 होगी।

अगले दिन, वे यहूदी अगुवे पतरस अर यूहन्ना ताहीं महायाजक अर दुसरे धार्मिक अगुव्यां के स्याम्ही लेकै आए। वे उस माणस ताहीं भी लेकै आए जो अपंग था। उननै पतरस अर यूहन्ना तै पूच्छ्या, "किस हक तै तन्नै उस अपंग माणस ताहीं चंगा करया?"

पतरस नै जवाब दिया, "यो माणस जो थारै स्याम्ही खड़ा सै उसनै यीशु मसीह की सामर्थ के जरिये चंगा करया गया सै। थमनै यीशु ताहीं क्रूस पै चढ़ा दिया, पर परमेसवर नै उस ताहीं फेर तै जिन्द कर दिया! थामनै उस ताहीं स्वीकार न्ही करया, पर यीशु के सामर्थ के माध्यम के इलावा उद्धार पाण का कोए दूसरा रास्ता न्ही सै!"

वे अगुवे हैरान थे के पतरस अर यूहन्ना नै भोत साहसी तरिका तै बात करी थी। उननै देख्या के ये साधारण माणस थे जो के अनपढ़ थे। पर फेर उन ताहीं याद आया के ये माणस यीशु के गैल रहे थे। ज्यातैं उननै उनतै कह्या, "हम थमनै भोत घणा दंड देंवांगे जै थम इस माणस यीशु के बारै म्ह लोगां ताहीं कोए और संदेस द्योगे।" इसी भोत सी बात्तां कहण के बाद, उननै पतरस अर यूहन्ना ताहीं जाण दिया।