45. स्तिफनुस अर फिलिप्पुस

प्रथम मसीही अगुव्यां के बीच म्ह स्तिफनुस नाम का एक माणस था। सारे लोग उसका आदर करैं थे। पवित्र आत्मा नै उस ताहीं भोत सामर्थ अर बुद्धि प्रदान करी थी। स्तिफनुस नै भोत से चमत्कार करे थे। जिब उसनै यीशु पै भरोसा करण के बारै म्ह उन ताहीं शिक्षा दी तो भोत से लोगां नै उस पै बिसवास करया।

एक दिन, स्तिफनुस यीशु के बारै म्ह शिक्षा दे रह्या था, अर कुछ इसे यहूदी आए जिन ताहीं यीशु पै बिसवास न्ही करया था अर उसके गैल लड़ाई-झगड़ा करणा शरु कर दिया। वे भोत गुस्सा होगे, ज्यातैं वे धार्मिक अगुव्यां के धोरै गए अर उसके बारै म्ह झूठ बोल्या। उन ताहीं कह्या, "हमनै स्तिफनुस ताहीं मूसा अर परमेसवर के बारै म्ह बुरी बात्तां बोलदे सुण्या सै!" इस करकै धार्मिक अगुव्यां नै स्तिफनुस ताहीं गिरफ्तार कर लिया अर उसनै महायाजक अर यहूदियां के दुसरे अगुव्यां के स्याम्ही लेकै आए। और भी झूठे गवाह आए अर उननै स्तिफनुस के बारै म्ह झूठ बोल्या।

महायाजक नै स्तिफनुस तै पूच्छ्या, "के ये लोग तेरै बारै म्ह सच कह रह्ये सैं?" स्तिफनुस नै महायाजक ताहीं जवाब देण के खात्तर भोत सी बात्तां ताहीं बोलणा शरु कर दिया। उसनै कह्या के अब्राहम के बखत तै यीशु के बखत ताहीं परमेसवर नै इस्राएल के लोगां के खात्तर भोत से अनोखे काम करें सैं। पर लोगां नै सदा परमेसवर की अनाज्ञाकारिता करी थी। स्तिफनुस नै कह्या, "थम परमेसवर के खिलाप हठीले अर बलवा करण आळे सो। थमनै सदा पवित्र आत्मा नै अस्वीकार करया, जि तरियां के म्हारे पूर्वजां नै सदा पवित्र आत्मा ताहीं अस्वीकार करया था अर सदा उसके भविष्यद्वक्तावां ताहीं मार डाल्या था। पर जो उननै करया था उसकी बराबर म्ह थमनै और भी बुरा करया सै! थमनै मसीह ताहीं मार डाल्या!"

जिब उन धार्मिक अगव्यां नै यो सुण्या, तो वे इतने गुस्सा होगे के उननै अपणे कानां ताहीं बंद कर लिया अर ऊँची आवाज म्ह चिल्लाए। वे स्तिफनुस नै घसीट कै नगर तै बाहर लेगे अर उस ताहीं मार डालण के खात्तर उस ताहीं पत्थर मारे।

जिब स्तिफनुस मर रह्या था, वो पुकार उठ्या, "हे यीशु, मेरी आत्मा नै ग्रहण कर!" फेर वो अपणे घुटन्यां पै गिर पड़या अर फेर तै पुकार उठ्या, "हे प्रभु, यो पाप उन पै ना लगाणा।" फेर वो मर ग्या।

उस दिन, यरूशलेम म्ह रहण आळे भोत से लोगां नै यीशु के अनुयायियां ताहीं सताणा शरु कर दिया, इस करकै बिसवासी लोग दुसरी जगहां पै भाजगे। पर इसके बावजूद भी, जड़ै किते भी वे गये उननै यीशु के बारै म्ह प्रचार करया।

फिलिप्पुस नाम का यीशु का एक बिसवासी था। जिसा के दुसरे भोत से बिसवासियां नै करया था वो भी यरूशलेम तै भाज ग्या। वो सामरिया के क्षेत्र म्ह चल्या गया। ओड़ै उसनै लोगां म्ह यीशु के बारै म्ह प्रचार करया। भोत से लोगां नै उस पै बिसवास करया अर उद्धार पाया। एक दिन, फिलिप्पुस कै धोरै परमेसवर की ओर तै एक सूर्गदूत आया अर उसनै जंगळ म्ह जाण के खात्तर, अर एक सड़क पै चालण के खात्तर कह्या। फिलिप्पुस ओड़ै चल्या गया। जिब वो उस सड़क पै चाल रह्या था, तो उसनै एक माणस ताहीं अपणे रथ म्ह जान्दे होये देख्या। यो माणस कूश देश का एक महत्वपूर्ण अधिकारी था। पवित्र आत्मा नै फिलिप्पुस तै कह्या के जाकै उस माणस के गैल-गैल चाल्लै।

इस करकै फिलिप्पुस रथ कै धोरै गया। उसनै सुण्या के वो कूशी परमेसवर के वचन नै पढ़ रह्या था। जो यशायाह भविष्यद्वक्ता नै लिख्या था वो उसनै पढ़ रह्या था। वो पढ़ रह्या था, "वे उसनै वध की जाण आळी भेड़ के समान लेगे, अर जिस तरियां एक मेमना शान्त होवै सै, उसने भी एक शब्द न्ही कह्या। उननै उसकै गैल अनुचित व्यवहार करया अर उसका आदर न्ही करया। उननै उसका प्राण ले लिया।"

फिलिप्पुस नै उस कूशी तै पूच्छ्या, "जो तू पढ़ रह्या सै के तू उस ताहीं समझै भी सै?" उस कूशी नै जवाब दिया, "न्ही। जिब ताहीं कोए इसनै मेरे ताहीं ना समझावै, तब ताहीं मैं इसनै न्ही समझ सकदा। कृपा करकै मेरे धोरै आकै बैठ। यशायाह यो अपणे बारै म्ह लिख रह्या था या किसे और के?"

फिलिप्पुस रथ पै चढ़कै बैठ ग्या। फेर उसनै उस कूशी माणस ताहीं वो बताया जो यशायाह नै यीशु के बारै म्ह लिख्या था। फिलिप्पुस नै परमेसवर के वचन के भोत से दुसरे हिस्यां की भी चर्चा करी। इस तरियां तै, उसनै उस माणस ताहीं यीशु के बारै म्ह खुश खबरी सुणाया।

फिलिप्पुस अर वो कूशी चालदे होये पाणी के धोरै आए। उस कूशी नै कह्या, "देख! उरै पाणी सै! के मैं बपतिस्मा ले सकूं सूं?" अर उसनै सारथी तै रथ ताहीं रोकण के खात्तर कह्या।

आखर म्ह वे पाणी म्ह चले गए, अर फिलिप्पुस नै उस कूशी ताहीं बपतिस्मा दिया। जिब वे पाणी तै बाहर आए, तो पवित्र आत्मा अचानक ए फिलिप्पुस ताहीं ठाकै किसे दुसरी जगहां म्ह ले ग्या। ओड़ै फिलिप्पुस नै लोगां ताहीं यीशु के बारै म्ह बताणा जारी राख्या।

वो कूशी अपणे घर के सफर पै आग्गै बढ़ ग्या। वो खुश था के वो इब यीशु ताहीं जाणै था।