50. यीशु वाप्पस लौटै सै

लगभग 2,000 साल्लां तै, संसार म्ह सारी जगहां पै भोत घणे लोग मसीह यीशु के बारै म्ह खुश खबरी ताहीं सुण रह्यें सैं। कलीसिया उन्नति कर रह्यी सै। यीशु नै वादा करया के वो संसार के आखर म्ह वाप्पस लौटैगा। तो भी वो इबे वाप्पस न्ही आया सै, तौभी वह अपने वादे ताहीं पूरा करैगा।

जिब के हम यीशु के वाप्पस बोहड़ण की बाट देख्खां सां, परमेसवर म्हारे तै इस तरियां तै जीवन जीण की इच्छा करै सै जो पवित्र सै अर जो उसका आदर करै सै। जिब यीशु धरती पै रह रह्या था फेर उसनै कह्या, "मेरे चेले संसार भर म्ह सारी जगहां के लोगां ताहीं परमेसवर के राज्य के बारै म्ह खुश खबरी प्रचार करैंगे, अर फेर अंत आ जावैगा।"

भोत सी जातियां नै इब ताहीं यीशु के बारै म्ह न्ही सुण्या सै। सुर्ग तै लौट जाण ते पैहल्या, यीशु ने मसीहियां तै उन लोगां ताहीं खुश खबरी सुनाण ताहीं कह्या जिन ताहीं इसनै कदे न्ही सुण्या सै। उसनै कह्या, "जाओ अर सारी जातियां के लोगां नै चेला बणाओ!" अर "कटाई करण खात्तर खेत पक्क चुके सैं!"

यीशु नै यो भी कह्या, "किसे माणस का सेवक अपणे स्वामी तै बड़ा न्ही होन्दा। इस संसार के खाश लोगां नै मेरे ताहीं नफरत करी, अर मेरे कारण वे थमनै भी सतावैंगे अर मार डालैंगे। इस संसार म्ह थम पीड़ित होओगे, पर मज़बूत बणो, क्यूकें मन्नै शैतान ताहीं हरा दिया सै जो इस संसार पै शासन करै सै। जै थम आखर ताहीं मेरे बिशवास लायक बणे रह्यो, तो परमेसवर थमनै बचावैगा!"

यीशु नै अपणे चेल्यां ताहीं यो समझाण के खात्तर एक कहाणी सुणाई के जिब संसार का अंत होवै सै तो लोगां के गैल के होवैगा। उसनै कह्या, "किसे माणस नै अपणे खेत म्ह आच्छा बीज बोया। जिब वो सो रह्या था तो उसका दुश्मन आया अर गेहूँ के बीजां के बीच म्ह जंगळी पौधे के बीजां ताहीं बो दिया, अर फेर वो चल्या गया।"

जिब पौधे अंकुरित होये तो सेवकां नै उस माणस तै कह्या, 'हे स्वामी, तन्नै तो अपणे खेत म्ह आच्छा बीज बोया था। तो फेर इस म्ह जंगळी पौधे क्यूं सै?' उस माणस नै जवाब दिया, 'केवल मेरे दुश्मन ए उन ताहीं बोणा चाहवैंगे। यो मेरा कोए दुश्मन सै जिसनै इसा करया सै।'

उन सेवकां नै अपणे स्वामी ताहीं जवाब दिया, 'के मान्नै जंगळी पौध्यां ताहीं उखाड़ देणा चाहिए?' उस स्वामी नै कह्या, 'न्ही। जै थम इसा करोगे तो थम कुछ गेहूँ ताहीं भी उखाड़ द्योगे। कटाई के बखत ताहीं इन्तजार करो। फेर जंगळी पौध्यां ताहीं गट्ठां म्ह कठ्ठा कर ल्यो ताके थम उन ताहीं जळा सको। पर कणक ताहीं मेरे खत्ते म्ह लेकै आओ।'

चेल्यां नै इस कहाणी के मतलब ताहीं न्ही समझ्या, ज्यातैं उननै यीशु तै उन ताहीं समझाण की बिनती करी। यीशु नै कह्या, "आच्छा बीज बोण आळा माणस मसीह का प्रतिनिधित्व करै सै। खेत संसार का प्रतिनिधित्व करै सै। आच्छा बीज परमेसवर के राज्य के लोगां का प्रतिनिधित्व करै सै।"

जंगळी पौधे उस दुष्ट माणस, शैतान के लोगां का प्रतिनिधित्व करै सैं। उस माणस का दुश्मन शैतान का प्रतिनिधित्व करै सै, जिसनै जंगळी पौध्यां ताहीं बो दिया था। कटाई इस संसार के अंत का प्रतिनिधित्व करै सै, अर कटाई करण आळे परमेसवर के सुर्गदूत्तां का प्रतिनिधित्व करै सैं।

जिब संसार का अंत होवैगा फेर सुर्गदूत उन सारे लोगां ताहीं एक साथ कठ्ठ करैगा जो शैतान के सैं। वे सुर्गदूत उन ताहीं एक भोत ए गर्म आग म्ह फेंक देंवैगे। ओड़ै वे लोग भयंकर सताव म्ह रोवैंगे अर अपणे दाँत पीसैंगे। पर जो लोग धर्मी सैं, जिन ताहीं यीशु का अनुसरण करया सै, वे उनके परमेसवर पिता के राज्य म्ह सूरज के समान चमकैंगे।

यीशु नै यो भी कह्या के वो संसार का अंत होण तै पैहल्या धरती पै लौटैगा। वो उसे तरीका तै वाप्पस आवैगा जिस तरियां वो गया था। यानिके, उसके धोरै वास्तविक शरीर होवैगा, अर वो आकास म्ह बाद्दल पै सवार होकै आवैगा। जिब यीशु लौटै सै, तो हर एक मसीही जो मर चुके सैं मरे होयां म्ह तै जी उठैंगे अर उसतै आकास म्ह मिलैंगे।

फेर जो मसीही इब भी जिन्दा सै वे आकास म्ह उठा लिए जावैंगे अर उन दूसरे मसीहियां के गैल शामिल हो जावैंगे जो मरे होयां म्ह तै जी उठै सै। वे सारे ओड़ै यीशु के गैल होंवैंगे। उसके बाद, यीशु अपणे लोगां के गैल रहवैगा। जिब वे एक साथ रहवै सैं तो उनके धोरै सदा के खात्तर पूरी शान्ति होवैगी।

यीशु नै उस पै बिशवास करण आळे हर एक माणस ताहीं एक मुकुट देण का वादा करया सै। वे सदा के खात्तर परमेसवर के गैल हर एक चीज पे शासन करैंगे। उनके धोरै सिद्ध शान्ति होवैगी।

पर परमेसवर उन सारयां का न्याय करैगा जो यीशु पै बिशवास न्ही करै सैं। वो उन ताहीं नरक म्ह डाल देवैगा। ओड़ै वे रोवैंगे अर अपणे दाँत पीसैंगे, अर वे सदा पीड़ित होन्दे रहवैंगे। कदे ना बुझण आळी आग उन ताहीं लगातार जळादी रहवैगी, अर कीड़े उन ताहीं खाण तै कदे न्ही रुकैंगे।

जिब यीशु लौटै सै, तो वो पूरी तरियां तै शैतान ताहीं अर उसके राज्य ताहीं नष्ट कर देवैगा। वो शैतान ताहीं नरक म्ह डाल देवैगा। ओड़ै शैतान सदा के खात्तर जळदा रहवैगा, उन सारे के गैल जिन ताहीं परमेसवर की बात्तां ताहीं मानण के बजाए शैतान के पिच्छै चालण का चुनाव करया था।

क्यूकें आदम अर हव्वा नै परमेसवर की अनाज्ञाकारिता करी थी अर पाप ताहीं इस संसार म्ह लेकै आए थे, परमेसवर नै उस ताहीं श्राप दिया अर उसनै नाश करण का फैसला करया। पर किसे दिन परमेसवर एक नए सुर्ग अर एक नये धरती की रचना करैगा जो सिद्ध होंगे।

यीशु अर उसके लोग उस नई धरती पै रहवैंगे, अर वो सदा के खात्तर सारी चिज्जां पै राज करैगा। वो लोगां की आँख्यां तै हर एक आँसू ताहीं पोंछ देवैगा। इब कोए भी पीड़ित या दुःखी न्ही होवैगा। वे रोवैंगे न्ही। वे बीमार न्ही होंवैंगे या मरैंगे न्ही। अर ओड़ै कुछ भी बुराई न्ही होवैगी। यीशु अपणे राज्य पै न्यायपूर्वक, अर शान्ति के गैल राज करैगा। वो सदा के खात्तर अपणे लोगां के गैल रहवैगा।