49. परमेसवर की नया करार

एक सुर्गदूत नै एक जवान जनानी मरियम तै कह्या के वा परमेसवर के बेट्टे ताहीं जन्म देवैगी। वा इब्बे कुँआरी थी, पर पवित्र आत्मा उसकै धोरै आया अर वा गर्भवती होई। उसनै एक बेट्टे ताहीं जन्म दिया जिसका नाम उसनै यीशु धरया। ज्यातैं, यीशु परमेसवर अर माणस दोन्नु सै।

यीशु नै भोत से चमत्कार करे जो दिखावैं सैं के वो परमेसवर सै। वो पाणी पै चाल्या अर आँध्धी ताहीं शान्त करया। उसनै भोत से बीमार लोगां ताहीं चंगा करया अर भोत से लोगां म्ह तै दुष्टात्मावां ताहीं लिकाड़या। उसनै मरे होया लोगां ताहीं जिन्दा कर दिया, अर उसनै पाँच रोट्टी अर दो मच्छी नै 5,000 लोगां ताहीं खुवाण के खात्तर पर्याप्त खाणा म्ह बदल दिया।

यीशु एक महान शिक्षक भी था। जो किमे भी उसनै सिखाया, वा उसनै सिद्धता के गैल सिखाया। जो वो लोगां तै करण खात्तर कहवै सै वा उननै करणा चाहिए क्यूकें वो परमेसवर का बेट्टा सै। उदाहरण के खात्तर, उसनै सिखाया के थमनै दुसरयां लोगां ताहीं उसे तरियां तै प्यार करण की जरुरत सै जिस तरियां थम खुद ताहीं प्यार करो सो।

उसनै यो भी सिखाया के थमनै सारी चिज्जां तै घणा अर अपणी संपत्ति तै भी घणा परमेसवर ताहीं प्यार करणा चाहिए।

यीशु नै कह्या के संसार म्ह किसे भी चीज ताहीं पाण तै घणा आच्छा सै परमेसवर के राज्य म्ह होणा। उसके राज्य म्ह थारे प्रवेश करण खात्तर जरुरी सै के परमेसवर थमनै थारे पापां तै बचावै।

यीशु नै कह्या के कुछ लोग उस ताहीं ग्रहण करैगे। परमेसवर उन लोगां ताहीं बचावैगा। पर दूसरे लोग उसनै ग्रहण न्ही करैंगे। उसनै यो भी कह्या के कुछ लोग आच्छी धरती के समान सैं, क्यूकें वे यीशु के बारै म्ह खुश खबरी ताहीं स्वीकार कर लेवैं सैं, अर परमेसवर उन ताहीं बचावै सै। पर कुछ लोग रास्ते की कठोर धरती के समान सैं। परमेसवर का वचन बीज के समान रास्ता पै गिरै सै, पर ओड़ै कुछ भी न्ही उगै सै। ये लोग यीशु के बारै म्ह संदेस ताहीं अस्वीकार कर देवै सैं। वे उसके राज्य म्ह प्रवेश करण तै इंकार कर देवै सैं।

यीशु नै सिखाया के परमेसवर पापियां तै भोत प्यार करै सै। वो उन ताहीं माफ करणा चाहवै सै अर उन ताहीं अपणी संतान बणाणा चाहवै सै।

यीशु नै यो भी बताया के परमेसवर पाप तै नफरत करै सै। क्यूकें आदम अर हव्वा नै पाप करया, ज्यातें उनके सारे वंशजां नै भी पाप करया। इस संसार म्ह रहण आळा हर एक माणस पाप करै सै अर परमेसवर तै दूर सै। हर एक माणस परमेसवर का दुश्मन सै।

पर परमेसवर नै इस संसार म्ह रहण आळे हर एक माणस तै इस तरियां तै प्यार करया: उसनै अपणे एकलौते बेट्टे ताहीं दे दिया ताके परमेसवर उन ताहीं दण्ड ना दे जो उस पै बिशवास करैं सैं। इसके बजाए, वे उसके गैल सदा खात्तर रहवैंगे।

थम मरण के लायक सो, क्यूकें थमनै पाप करया सै। थारे तै परमेसवर का गुस्सा होणा उचित ए सै, इसकी अपेक्षा, वो यीशु पै गुस्सा होया। उसनै यीशु ताहीं क्रूस की मौत देकै दण्ड दिया।

यीशु नै कदे पाप न्ही करया, पर उसनै परमेसवर ताहीं उसनै दण्ड देण दिया। उसनै मर जाणा स्वीकार करया। इस तरियां तै, थारे पापां ताहीं अर इस संसार म्ह रहण आळे हर एक माणस के पापां ताहीं ठा ले जाण खात्तर वो एक सिद्ध बलिदान था। यीशु नै खुद ताहीं परमेसवर खात्तर बलिदान कर दिया, ज्यातै परमेसवर किसे भी पाप ताहीं, उरै ताहीं के भयंकर पापां ताहीं भी माफ करै सै।

भले ए जै थम भोत से आच्छे काम्मं ताहीं करो सो, तो इसके जरिये परमेसवर थमनै न्ही बचावैगा। उसका दोस्त बणण के खात्तर इसा कुछ भी न्ही सै जो थम कर सको सो। इसकी अपेक्षा, थमनै बिशवास करणा सै के यीशु परमेसवर का बेट्टा सै, अर वो थारे बदले म्ह क्रूस पै मर ग्या, अर यो भी के परमेसवर नै उसनै फेर तै जिन्दा कर दिया। जै थम इस पै बिशवास करो, तो परमेसवर थारे पापां की माफी देवैगा।

परमेसवर उस हर एक माणस ताहीं बचावैगा जो यीशु पै बिशवास करै सै अर उसनै अपणा प्रभु स्वीकार करै सै। पर वो उन ताहीं न्ही बचावैगा जो उस पै बिशवास न्ही करैं सैं। यो कोए मायने न्ही रखदा के थम धनी हो या गरीब हो, माणस हो या जनानी हो, बूढ़े हो या जवान हो, या थम कित्त रह्यो सो। परमेसवर थारै तै प्यार करै सै अर चाहवै सै के थम यीशु पै बिशवास करो के वो थारा दोस्त बण सकै।

यीशु थमनै बुला रह्या सै के उस पै बिशवास करो अर बपतिस्मा ल्यो। के थम बिशवास करो सो के परमेसवर का एकलौता बेट्टा, यीशु ए मसीह सै? के थम बिशवास करो सो के थम एक पापी हो अर यो के थम परमेसवर द्वारा थारे ताहीं दंडित किए जाण के लायक हो? के थम बिशवास करो सो के थारे पापां ताहीं मिटाण के खात्तर यीशु क्रूस पै मरया?

जै थम यीशु पै अर जो उसनै थारै खात्तर करया सै उस पै बिशवास करो सो, तो थम एक मसीही सो! शैतान अपणे अंधकार के राज्य म्ह इब थारै पै शासन न्ही करै सै। इब परमेसवर अपणे प्रकाश के राज्य म्ह थारै पै शासन करै सै। उसनै थारै ताहीं पाप करण तै रोक दिया सै, जिसनै थम करया करै थे। उसनै थारै ताहीं एक नया, उचित जीवन दिया सै।

जै थम एक मसीही सो तो जो यीशु नै करया सै उसके कारण परमेसवर नै थारे पापां ताहीं माफ कर दिया सै। इब, परमेसवर एक दुश्मन की अपेक्षा थमनै एक खाश दोस्त मान्नै सै।

जै थम परमेसवर के दोस्त हो अर प्रभु यीशु के सेवक हो तो थम उन बात्तां का पालन करण की इच्छा करोगे जो यीशु थमनै सिखावै सै। भले ए थम एक मसीही सो, शैतान इब भी पाप करण के खात्तर थारी परीक्षा करैगा। पर परमेसवर सदा वो करै सै जो वो कहवै सै के वो करैगा। वो कहवै सै के जै थम अपणे पापां ताहीं मान ल्यो, तो वो थारे ताहीं माफ कर देवैगा। वो थमनै पाप के खिलाप लड़ण का सामर्थ देवैगा।

परमेसवर थारे ताहीं प्रार्थना करण अर उसके वचन ताहीं पढ़ण खात्तर कहवै सै। वो थमनै दुसरे बिशवासियां के गैल मिलकै उसकी आराधना करण के खात्तर भी कहवै सै। थमनै दुसरे लोगां ताहीं भी बताणा सै के उसनै थारै खात्तर के करया सै। जै थम इन सारे काम्मां ताहीं करो, तो थम उसके एक पक्के दोस्त बण ज्योगे।