48. यीशु ए वादा करया होया मसीह सै

जिब परमेसवर नै संसार ताहीं बणाया तो सारा किमे आच्छा था। कोए पाप न्ही था। आदम अर हव्वा एक दूसरे ताहीं प्यार करै थे, अर वे परमेसवर तै प्यार करै थे। कोए बीमारी या मौत न्ही थी। परमेसवर इसे ए संसार ताहीं चाहवै था।

शैतान नै साँप के जरिये तै बाग म्ह हव्वा तै बात करी, क्यूकें वो उस ताहीं धोक्खा देणा चाहवै था। फेर हव्वा अर आदम नै परमेसवर के खिलाप पाप करया। क्यूकें उननै पाप करया था इस करकै धरती पै रहण आळे सारे माणस मरै सैं।

क्यूकें आदम अर हव्वा नै पाप करया था, इस करकै कुछ और भी बुरा होया। वे परमेसवर के दुश्मन बणगे। जिसके कारण, उस बखत तै हर एक माणस नै पाप करया सै। हर एक माणस जन्म तै ए परमेसवर का दुश्मन सै। परमेसवर अर लोगां के बिचाळै शान्ति न्ही थी। पर परमेसवर शान्ति स्थापित करणा चाहवै था।

परमेसवर नै वादा करया के हव्वा का एक वंशज शैतान के सर ताहीं कुचलैगा। उसनै यो भी कह्या के शैतान उसकी एड़ी नै डसैगा। दूसरे शब्दा म्ह, शैतान मसीह ताहीं मार डालैगा, पर परमेसवर उस ताहीं फेर तै जिन्दा कर देवैगा। इसके बाद, मसीह शैतान की शक्ति नै सदा के खात्तर खत्म कर देवैगा। कई साल्लां के बाद, परमेसवर नै जाहिर करया के वो मसीह यीशु सै।

परमेसवर नै उस बाढ़ तै अपणे परिवार नै बचाया जिसनै वो ल्याण आळा था। नूह तै एक किस्ती बणाण के खात्तर कह्या के वो इस तरियां परमेसवर नै उन लोगां ताहीं बचाया जो उस पै बिशवास करै थे। इसे तरियां, वे सारे के सारे परमेसवर के जरिये मार डाले जाण के लायक थे क्यूकें उननै पाप करया था। पर परमेसवर नै उन सारयां ताहीं बचाण के खात्तर यीशु ताहीं भेज्या जो उस पै बिशवास करैं सैं।

सैकड़ां साल्लां ताहीं, याजक परमेसवर के खात्तर बलिदान चढ़ान्दे रहे। यो बतावै सै के लोगां नै पाप करया, अर यो के वे परमेसवर के जरिये उन ताहीं दंडित करे जाण के लायक थे। पर वे बलिदान उनके पापां ताहीं माफ न्ही कर सकै थे। यीशु सबतै बड़ा महायाजक सै। उसनै वो करया जो कोए याजक न्ही कर सकै था। उसनै वो एकमात्र बलिदान होण के खात्तर खुद ताहीं दे दिया जो हर किसे के पापां नै मिटा सकै था। उसनै स्वीकार करया के परमेसवर उन सारे के पापां के खात्तर उसनै दंडित करै। इस करकै, यीशु सिद्ध महायाजक था।

परमेसवर नै अब्राहम तै कह्या, "मैं तेरे द्वारा संसार के सारे कुलां नै आशीष दयूगां।" यीशु इसे अब्राहम का वंशज था। परमेसवर अब्राहम के जरिये तै सारे कुलां नै आशीष देवै सै, क्यूकें जो यीशु पै बिशवास करै सैं परमेसवर उन सारयां नै पाप तै बचावै सै। जिब ये लोग यीशु पै बिशवास करैं सैं, तो परमेसवर उन ताहीं अब्राहम के वंशज मान्नै सै।

परमेसवर नै अब्राहम तै कह्या के वो अपणा निज बेट्टा, उसके खात्तर बलिदान कर दे। पर फेर परमेसवर नै इसहाक के बदले म्ह बलि करण के खात्तर एक मेमना दिया। हम सारे अपणे पापां के खात्तर मार डाले जाण के लायक थे! पर परमेसवर ने म्हारी जगहां पै मरण के खात्तर यीशु ताहीं बलिदान के रूप म्ह दिया। इसे कारण तै हम यीशु नै परमेसवर का मेमना कहवां सां।

जिब परमेसवर नै मिस्र पै आखरी विपत्ति भेज्जी तो उसनै हर एक इस्राएली परिवार तै कह्या के वे एक मेमने की बलि करैं। उस मेमने म्ह कोए दोष न्ही होणा चाहिए। फेर अपणे दरवाजे की चौखट के उप्पर अर बगलां म्ह उननै उसके लहू ताहीं लगाणा था। जिब परमेसवर नै उस लहू ताहीं देख्या तो वो उनके घरां तै आग्गै बढ़ ग्या अर उनके पहलौठ्या बेट्यां ताहीं न्ही मारा। जिब यो होया तो परमेसवर नै इसनै फसह का त्यौहार कह्या।

यीशु फसह के त्यौहार के एक मेमने की तरियां सै। उसनै कदे पाप न्ही करया, इस करकै उस म्ह कुछ भी गलत न्ही था। वो फसह के त्यौहार के बखत पै मरया। जिब कोए यीशु पै बिशवास करै सै, फेर यीशु का लहू उस माणस के पापां की कीमत चुकावै सै। यो इसा जिस तरियां के परमेसवर उस माणस के धोरै तै आग्गै बढ़ ग्या, क्यूकें वो उसनै दण्ड न्ही देवै सै।

परमेसवर नै इस्राएली लोगां के गैल एक करार करया, क्यूकें वे इसे लोग थे जिन ताहीं परमेसवर नै अपणा होण के खात्तर चुण्या था। पर इब परमेसवर नै एक इसा करार करया सै जो के सारयां खात्तर सै। जै किसे भी जाति का कोए भी माणस इस नये करार ताहीं स्वीकार करै सै, तो वो परमेसवर के लोगां म्ह शामिल हो जावै सै। वो इसा ज्यातैं करै सै क्यूके वो यीशु पै बिशवास करै सै।

मूसा एक इसा भविष्यद्वक्ता था जिसनै परमेसवर के वचन ताहीं बड़ी सामर्थ के गैल प्रचार करया था। पर यीशु सारे भविष्यद्वक्तावां म्ह सबतै बड़ा सै। वो परमेसवर सै, ज्यातैं जो किमे भी उसनै करया अर कह्या वो परमेसवर के काम अर वचन थे। इस करके पवित्र-शास्त्र यीशु ने परमेसवर का वचन कहवै सै।

परमेसवर नै राजा दाऊद तै वादा करया था के राजा के रूप म्ह उसका एक वंशज परमेसवर के लोगां पै सदा के खात्तर शासन करैगा। यीशु परमेसवर का बेट्टा अर मसीह सै, ज्यातैं वो राजा दाऊद का वंशज सै जो सदा के खात्तर राज्य कर सकै सै।

दाऊद तो इस्राएल का राजा था, पर यीशु सारे जगत का राजा सै! वो फिर तै आवैगा अर सदा खात्तर न्या अर शान्ति कै गैल अपणे राज्य पै राज करैगा।