47. फिलिप्पी म्ह पौलुस अर सीलास

जिब शाऊल नै सम्पूर्ण रोमी साम्राज्य म्ह सफर करया तो उसनै अपणे रोमी नाम "पौलुस" का इस्तेमाल करणा शरु कर दिया। एक दिन, पौलुस अर उसका दोस्त सीलास फिलिप्पी नगर म्ह यीशु के बारै म्ह खुश खबरी सुणाण के खात्तर गए। वे नगर के बाहर नदी के किनारे एक जगहां पै गये जित्त लोग प्रार्थना करण के खात्तर कठ्ठे थे। ओड़ै वे लुदिया नाम की एक जनानी तै मिले जो एक व्यापारी थी। वा परमेसवर तै प्यार करै थी अर उसकी आराधना करै थी।

परमेसवर नै लुदिया ताहीं यीशु के बारै म्ह संदेस पै बिशवास करण के खात्तर सक्षम करया। पौलुस अर सीलास नै उस ताहीं अर उसके परिवार ताहीं बपतिस्मा दिया। उसनै पौलुस अर सीलास ताहीं अपणे घर ठहरण के खात्तर आमंत्रित करया, ज्यातैं वे ओड़ै ठहरगे।

पौलुस अर सीलास लोगां तै अक्सर उस जगहां पै मिलै थे जड़ै यहूदी लोग प्रार्थना करयां करै थे। हर रोज जिब वे ओड़ै जावैं थे तो एक दास्सी लड़की जो दुष्टात्मा के काब्बु म्ह थी उनका पिच्छा करया करै थी। इस दुष्टात्मा के जरिये तै वो लोगां का भविष्य बताया करै थी, इस करकै वा भविष्य बताण आळी के रूप म्ह अपणे स्वामियां के खात्तर घणा धन कमाया करै थी।

उनके जान्दे बखत यो दास्सी छोरी चिल्लाया करै थी, "ये माणस परम प्रधान परमेसवर के सेवक सैं। ये थमनै उद्धार पाण का रास्ता बता रह्ये सैं!" वा रोज इसा ए करया करै थी जिसतै के पौलुस नाराज़ हो ग्या।

आखर म्ह, एक दिन जिब उस दास्सी छोरी नै चिल्लाणा शरु करया, तो पौलुस नै उसकी ओर मुड़कै उसके भित्तर की दुष्टात्मा तै कह्या, "यीशु के नाम तै इस म्ह तै लिकड़ जा।" उसे बखत उस दुष्टात्मा नै उस ताहीं छोड़ दिया।

उस दास्सी छोरी के स्वामी भोत गुस्सा होगे। उन ताहीं पता लग्या के बिना उस दुष्टात्मा के वा दास्सी छोरी लोगां के भविष्य न्ही बता सकै थी। इसका मतलब था के लोग इब उसके स्वामियां नै पैसा न्ही देंगे के वा उन ताहीं भविष्य बताए के उनके गैल के होवैगा।

इस करकै उस दास्सी छोरी के स्वामी पौलुस अर सीलास ताहीं रोमी अधिकारियां के धोरै लेगे। उननै पौलुस अर सीलास ताहीं पीट्या, अर फेर उन ताहीं जेळखान्ने म्ह डाल दिया।

उननै पौलुस अर सीलास ताहीं जेळखान्ने के इसे हिस्से म्ह रख्या जड़ै सबतै घणे सिपाही थे। उरै ताहीं के उननै उनके पैरां नै लाकड़ी के बड़े टुकड़यां म्ह जोड़ दिया। पर पौलुस अर सीलास आध्धी रात के बखत, परमेसवर की स्तुति के गीत गा रह्ये थे।

अचानक तै, एक भयानक भूकम्प होया! जेळखान्ने के सारे दरबाजे खुलगे, अर सारे कैदियां की जंजीरां खुलकै गिरगी।

फेर दरोगा जाग ग्या। उसनै देख्या के जेळखान्ने के दरबाजे खुले होये थे। उसनै सोच्या के सारे कैदी बचकै भाजगे थे। वो डर ग्या के उनके भाग जाण के कारण रोमी अधिकारी उस ताहीं मार डालैगे, इस करकै वो खुद ताहीं मार डालण के खात्तर तैयार हो ग्या! पर पौलुस उसनै देखकै चिल्लाया, "रुक जा! खुद ताहीं नुकसान ना पोहचा। हम सारे उरै ए सां।"

उस दरोगा नै काँम्बदे होये पौलुस अर सीलास के धोरै आकै पूच्छ्या, "उद्धार पाण के खात्तर मैं के करूँ?" पौलुस नै जवाब दिया, "प्रभु यीशु पै बिशवास कर, तो तू अर तेरा घराणा उद्धार पावैगा।" फेर वो दरोगा पौलुस अर सीलास ताहीं अपणे घर ले ग्या अर उनके घावां ताहीं धोया। पौलुस नै उसके घर के सारे लोगां ताहीं यीशु के बारै म्ह खुश खबरी सुणाई।

दरोगा अर उसके पूरे परिवार नै यीशु पै बिशवास करया, ज्यातैं पौलुस अर सीलास नै उन ताहीं बपतिस्मा दिया। फेर दरोगा नै पौलुस अर सीलास ताहीं भोजन करवाया, अर वे एक साथ आनन्दित होये।

आगले दिन नगर के अगुव्यां नै पौलुस अर सीलास ताहीं जेळखान्ने तै आजाद कर दिया अर फिलिप्पी तै चले जाण के खात्तर कह्या। पौलुस अर सीलास लुदिया अर कुछ दोस्तां तै मिले अर उसके बाद नगर तै लिकड़गे। यीशु के बारे म्ह खुश खबरी फैलदी गई, अर कलीसिया बढ़दी गई।

पौलुस अर मसीही अगुव्यां नै भोत से नगरां म्ह सफर करया। उननै लोगां ताहीं यीशु के बारै म्ह खुश खबरी सुणाई। उननै कलीसियां के बिशवासियां ताहीं उत्साहित करण अर शिक्षा देण के खात्तर कई चिट्ठी भी लिख्खी। इन म्ह तै कुछ चिट्ठी बाइबल की पुस्तकां बणगी।