6. परमेश्वर इसहाक खात्तर बन्धोबस्त करै सै

जिब अब्राहम भोत बूढ़ा हो ग्या था फेर उसका बेटा, इसहाक, एक माणस की आयु का हो ग्या था। इस करकै अब्राहम नै अपने एक सेवक ताहीं अपने बेटे इसहाक खात्तर उस देश तै एक पत्नी ल्याण खात्तर भेजा जित्त उसके रिश्तेदार रहया करदे।

जित्त अब्राहम के रिश्तेदार रह्या करदे उस देश म्ह जाण की एक बड़ी लंबी यात्रा कै बाद परमेश्वर ने उस सेवक का मुलाकात रिबका तै करवाया। वो अब्राहम के भाई की पोती थी।

रिबका अपणे परिवार नै छोड़ कै उस सेवक कै गैल वापिस जाण खात्तर मान गी। जिस तरियां ए वे पोहचे इसहाक नै उस तै ब्याह कर लिया।

एक लंबे बखत कै बाद, अब्राहम मर ग्या। फेर परमेश्वर नै अब्राहम के बेटे इसहाक ताहीं, अब्राहम कै गैल करे गये करार की वजह तै आशीष दी। उस करार म्ह परमेश्वर की एक प्रतिज्ञा थी के अब्राहम के अनगिनत वंशज होंगे। लेकिन इसहाक की पत्नी रिबका के बाळक पैदा ना होये।

इसहाक नै रिबका खात्तर प्रार्थना करी, अर परमेश्वर नै उस ताहीं जुड़वाँ बच्चों का गर्भ धारण करण म्ह सक्षम करया। जिस बखत वे बच्चे रिबका के गर्भ म्ह ए थे वे आपस म्ह लड़ण लागे, इस करकै जो कुछ हो रह्या था रिबका नै वो परमेश्वर ताहीं बता दिया।

परमेश्वर नै रिबका तै कह्या, "तू दो बाळका नै जन्म देगी। उनके वंशज दो अलग-अलग जातियाँ बणगें। वो एक दूसरे तै लड़ेंगे। ; लेकिन बड़े बेटे तै पैदा होण आळी जाति नै छोटे बेटे तै आण आळी जाति की आज्ञा मानणी होगी।"

जिब रिबका के बच्चों का जन्म होया, तो बड़ा बेटा लाल अर रोएँदार था, अर उन्होंने उसका नाम एसाव धरया। फेर छोटा बेटा एसाव की एड़ी नै पकड़े होए जन्मा, अर उन्होंने उसका नाम याकूब धरया।