7. परमेसवर याकूब ताहीं आशीष देवै सै

जिब वे बच्चे बड़े होये तो याकूब नै घर पै रहणा आच्छा लाग्या, पर एसाव ताहीं जानवरां नै शिकार करणा भाया। रिबका नै याकूब तै प्यार करया, पर इसहाक नै एसाव तै प्रीति राक्खी।

एक दिन, जिब एसाव शिकार करकै वापस आया तो वो भोत भुक्खा था। एसाव नै याकूब तै कह्या, "जो तन्नै पकाया सै उस म्ह तै थोड़ा खाणा मन्नै दे।" याकूब नै जवाब दिया, "पहले मेरे ताहीं यो वादा कर के पहलौठा होण के कारण तै हर एक चीज जो मन्नै मिलनी चाहिए, वो सारी तू मन्नै देवैगा।" आखर एसाव नै उन सारी चिज्जां ताहीं याकूब तै देण का वादा कर दिया। फेर याकूब नै उसतै किमे खाणा दिया।

इसहाक एसाव ताहीं आशीष देणा चाहवै था। पर इसतै पैहला के उसनै इसा करया, रिबका अर याकूब नै याकूब के एसाव होण को ढोंग करकै उसके गैल धोक्खा करया। इसहाक बूढ़ा था अर इब देख न्ही पावै था। ज्यातैं याकूब नै एसाव के कपड़े पहणे अर बकरी की खाल ताहीं अपणे गळे अर हात्थां पै लपेट लिया।

याकूब इसहाक कै धोरै आया अर कह्या, "मैं एसाव सूं। मैं इस करकै आया सूं के तू मन्नै आशीष देवै।" जिब इसहाक नै बकरी के बाळ ताहीं महसूस करया अर कपडया ताहीं सूँघ्या, तो उसनै सोच्या के वो एसाव सै अर उसनै आशीष देई।

एसाव नै याकूब तै नफरत करी क्यूकें याकूब नै उसके पैहले बेट्टे के हक ताहीं अर गैल ए उसकी आशीषां ताहीं भी चुरा लिया था। आखर उसनै उनके पिता के मरण के बाद याकूब ताहीं मार डालण की योजना बणाई।

पर रिबका नै एसाव की योजना ताहीं सुण लिया। ज्यातैं उसनै अर इसहाक नै याकूब ताहीं उसके रिश्तेदारां के गैल रहण के खात्तर भोत दूर भेज दिया।

याकूब कई साल्लां ताहीं रिबका के रिश्तेदारां के गैल रह्या। उस बखत के दौरान उसनै ब्याह करया अर बाराह बेट्यां ताहीं अर एक बेट्टी ताहीं जन्माया। परमेसवर नै उस ताहीं घणा धणी बणा दिया।

बीस साल्लां ताहीं कनान म्ह अपणे घर तै दूर रहण के बाद, याकूब अपणे परिवार, अपणे सेवकां, अर अपणे जानवरां के सारे झुंडां के गैल ओड़ै वापस लौट्या।

याकूब इस करकै घणा डरया होया था क्यूकें उसनै सोच्या के एसाव इब भी उसे मार डालणा चाहवै था। ज्यातैं उसनै उपहार स्वरूप जानवरां के झुंडां ताहीं एसाव के धोरै भेज्या। जो सेवक उन झुंड्यां ताहीं लेकै गए थे उननै कह्या, "तेरा दास याकूब, इन जानवरां ताहीं तन्नै देवै सै। वो जल्दी ए आ रह्या सै।"

पर एसाव इब याकूब ताहीं नुकसान पोहचाणा न्ही चाहवै था। इसके बजाए, वो उसनै एक बार फेर तै देखकै भोत खुश था। उसके बाद याकूब कनान म्ह शान्तिपूर्वक रह्या। फेर इसहाक मर ग्या अर याकूब अर एसाव नै उस ताहीं दफनाया। करार के वायदे जो परमेसवर नै अब्राहम तै करे थे वे इब इसहाक तै याकूब पै आ ग्ये थे।