8. परमेसवर यूसुफ अर उसके परिवार ताहीं बचावै सै

कई साल्लां के बाद, जिब याकूब बूढ़ा हो यग्या था, तो उसनै अपणे प्यारे बेट्टे यूसुफ ताहीं उसके भाइयां की जाँच करण के खात्तर भेज्या जो जानवरां के झुंडां की देखभाल कर रह्ये थे।

यूसुफ के भाई उसतै नफ़रत करै थे क्यूकें उनका पिता उसतै घणा प्यार करै था अर ज्यातैं भी के यूसुफ नै सपना देख्या था के वो उनका शासक हो जावैगा। जिब यूसुफ अपणे भाइयां के धोरै आया तो उननै उस ताहीं बंधक बणा लिया अर उस ताहीं दास्सां का व्यापार करण आळां ताहीं बेच दिया।

घर वापस लौटण तै पैहल्या यूसुफ के भाइयां नै यूसुफ के कपडया ताहीं फाड़ कै बकरी के लहू म्ह भिगो दिया। फेर उनानै वा कपड़ा अपणे पिता ताहीं दिखाया ताके वो यो सोचैगा के किसे जंगळी जानवर नै यूसुफ ताहीं मार डाल्या सै। याकूब भोत उदास था।

दास्सां का व्यापार करण आळे वे माणस यूसुफ ताहीं मिस्र लेगे। नील नदी के किनारे पै बस्या होया मिस्र एक विशाल अर शक्तिशाली देश था। उन दास्सां का व्यापार करण आळ्यां नै यूसुफ ताहीं एक धनी सरकारी अधिकारी ताहीं दास के रूप म्ह बेच दिया। यूसुफ नै अपणे स्वामी की आच्छी तरह तै सेवा करी, अर परमेसवर नै यूसुफ ताहीं आशीष देई।

उसके स्वामी की घरआळी नै यूसुफ के गैल सोने की कोशिश करी, पर यूसुफ नै इस रीति तै परमेसवर के खिलाफ पाप करण तै इंकार कर दिया। वो गुस्सा होगी अर यूसुफ पै झूठा आरोप लगा दिया, इस करकै उसनै गिरफ्तार करकै जेलखान्ने भेज दिया गया। उरै ताहीं के जेलखान्ने म्ह भी, यूसुफ परमेसवर के प्रति सच्चा रह्या, अर परमेसवर नै उस ताहीं आशीष दी।

दो साल्लां के बाद, यूसुफ इब भी जेलखान्ने म्ह था, भले ए वो बेकसूर था। एक रात, फिरौन, जिसा के मिस्री लोग अपणे राजयां ताहीं पुकारै थे, नै दो सपने देखे जिननै उस ताहीं घणा विचलित कर दिया। उसका कोए भी सलाहकार उसनै उन सपन्या का मतलब न्ही बता पाया।

परमेसवर नै यूसुफ ताहीं सपन्या का मतलब बताण की क्षमता प्रदान करी थी, ज्यातैं फिरौन नै यूसुफ ताहीं जेलखान्ने तै अपणे धोरै बुलाया। यूसुफ नै उसनै उन सपन्या का मतलब बताया अर कह्या, "परमेसवर भरपूरी की फसलां आळे सात साल्लां के बाद अकाळ के सात साल भेजण आळा सै।"

फिरौन यूसुफ तै इतना प्रभावित होया के उसनै उस ताहीं मिस्र का दूसरा सबतै शक्तिशाली पुरुष नियुक्त कर दिया।

यूसुफ नै माणसा तै आच्छी फसलां आळे सात साल्लां के दौरान बड़ी मात्रा म्ह भोजन नै जमा करण के खात्तर कह्या। जिब सात साल्लां का अकाळ आया फेर यूसुफ ने माणसां ताहिं वो भोजन बेच्या के उनकै धोरै खाण के खात्तर पर्याप्त हो।

वा अकाळ केवल मिस्र म्ह ए न्ही, पर कनान म्ह भी भयंकर था जड़ै याकूब अर उसका परिवार रहवै था।

इस करकै याकूब नै अपणे सबतै बड़े बेट्यां ताहीं भोजन खरीदनण के खात्तर मिस्र ताहीं भेज्या। जिब वे भोजन खरीदण के खात्तर यूसुफ के स्याम्ही खड़े होये तो उन भाइयां नै यूसुफ ताहीं न्ही पहचाण्या। पर यूसुफ नै उन ताहीं पहचाण लिया।

यो पता करण के खात्तर के के वे बदल गे सै उनकी जाँच करण के बाद, यूसुफ नै उनते कह्या, "मैं थारा भाई यूसुफ सूं! डरो ना। जिब थमनै मेरे ताहीं दास के रूप म्ह बेच्या था तो थमनै बुरा करण की ठानी थी, पर परमेसवर ने उस बुराई ताहीं भलाई के खात्तर इस्तेमाल करया! आओ अर मिस्र म्ह रह्यो ताके मैं थारे अर थारे परिवारां केखात्तर भोजन का प्रबंध कर सकूँ।"

जिब यूसुफ के भाई घर वापस लौट्टे अर अपणे पिता याकूब ताहीं बताया के यूसुफ इब भी जिन्दा सै तो वो भोत खुश होया था।

हालाँकि याकूब एक बूढ़ा व्यक्ति था तौभी वो अपणे पूरे परिवार कै गैल मिस्र नै चल्या गया, अर वे ओड़ै बस गे। याकूब के मरण तै पैहल्या, उसनै अपणे हरेक बेट्टे ताहीं आशीषित करया।

करार के वो वादे जो परमेसवर नै अब्राहम तै करे थे वे इसहाक पै अर उसके बाद याकूब, अर उसके बाद उसके बारह बेट्यां अर उनके परिवारां पर आ ग्ये थे। उन बारह बेट्यां के वंशज इस्राएल के बारह गोत्र बणगे।