28. अमीर यहुदि मनुष्‍य

एक दिन, एक अमीर यहुदि मनुष्‍य यीशु गै कनै आगे बिंगै कनु पुछेऔ, "हे उत्तम गुरु, अनन्त जीवन पाण खातिर मनै कै करणौ जरुरी है?" यीशु बिनै केऔ, "तू मनै 'उत्तम' क्यों केवै है? केवल एक ही उत्तम है अर बो परमेश्वर है। पर जे तू अनन्त जीवन पाणो चावै है तो परमेश्वर गी व्यवस्था गो पालन करै।"

"मनै कुण कुण सी आज्ञा गो पालन करण गी आवश्यकता है?" बणै पुछेऔ। यीशु बिनै जवाब दिऔ, "हत्या कोनि करनी। व्यभिचार कोनि करणो। चोरी कोनि करनि। झूठ कोनि बोलणो। आपणै पिता अर माता गो आदर करनौ, अर आपणै पड़ोसी सागै आपगै समान प्रेम करनो।"

पर बिं जवान आदमी केऔ, "मैं आपणै बालकपन मुँ ही आं सारी आज्ञावां गो पालन करतौ आयो हूँ। मनै सदा जीवित रेहण खातिर अब भी के करण गी आवश्यकता है?" यीशु बिंगै ऊपर दृष्टि करी अर बिमुं प्रेम करेऔ।

यीशु बिनै जवाब दिऔ, "जे तू सिद्ध होणौ चावै है तो जागे आपगौ सारो कुछ बेच दे अर बो धन गरीबां मैं बाँट दे, अर तनै स्वर्ग मैं धन मिलगो। फेर आगै मेरै पीछै हो ले।"

झिकौ यीशु केऔ जद बिं जवान आदमी सुणेऔ तो बो बहोत उदास हो गेऔ, क्योंकि बो बहोत धनी हो अर बणै आपगी सारी सम्पत्ति देणी ना चाई। बो मुड़गै यीशु गै कनुं जांतो रेऔ।

फेर यीशु आपणै चेलां नै केऔ, "परमेश्वर गै राज्य मैं धनी लोगां गो प्रवेश करनो बोहत ओखो है! हाँ, एक धनी आदमी गो परमेश्वर गै राज्य मैं प्रवेश करण गी तुलना मैं किं ऊँट गो सूई गै नाकै मुँ होगै निकल जाणौ आसान है।"

झिको यीशु केऔ जद चेलों सुणेऔ तो बे चकित होआ। बां केऔ, "जे औ हिसौ है तो परमेश्वर किनै बचावगौ?"

यीशु चेलां पर दृष्टि करी अर केऔ, "लोगां खातिर स्वयं गो उद्धार करनो असम्भव है। पर परमेश्वर खातिर कुछ भी करनो असम्भव कोनी।"

पतरस यीशु नै केऔ, "मैंह चेला आपणो सारो कुछ छोड गै तेरै पीछै हो गेआं हां। तो माहरो पुरस्कार के होवगौ?"

यीशु जवाब दिऔ, "हर एक जन झिकां मेरै कारण घर, भाई, बहन, पिता, माता, बच्‍चै, या सम्पत्ति नै छोडेऔ है, बो बिमुं 100 गुणा ज्‍यादा प्राप्त करगौ अर अनन्त जीवन भि पावगौ। पर बहोत सा झिका पेहला है बे पिछला होवगा, अर बहोत सा झिका पिछला है बे पेहला होवगा।"