38. यीशु नै पकड़वायो जावै है

हर साल, यहूदी लोग फसह गो त्‍योहार मनानता हा।औ ईं बारै मैं एक उत्सव हो के कई शताब्दियां पेलां परमेश्वर बांगै पूर्वजां नै मिस्र गै दासत्व मुं छुडायो हो। लगभग तीन साल बाद यीशु सारै लोगां मै प्रचार करनो अर शिक्षा देणी शुरु करी। यीशु आपणै चेलां नै बताओ के बो बांगै सागै यरूशलेम मैं फसह गो त्‍योहार मनाणो चावै है, अर औ भी के बो भठै मारेयो जावैगो।

यीशु गै चेलां मै एक यहूदा नाम गो आदमी हो। यहूदा प्रेरितां गै धन गी थैली राखणै गो जीमेवार हो, पर अक्सर बो बिं थैली मुं पिसा काढ़े करतो हो। यीशु अर चेलां गै यरूशलेम पहुँचण गै बाद यहूदा यहूदी अगुवां गै कनै गेयो। बणै धन गै बदलै यीशु नै बांगै हाथ पकड़वाण गो प्रस्ताव राखेयो।बो जाणै हो के यहूदी अगुवा स्वीकार कोनी करता हा के यीशु ही मसीह है। बो जाणै हो के बै बिनै मारनो चावै है।

महायाजक गै केण पर यहूदी अगुवां यीशु नै बांगै हाथां मैं पकड़वाण खातिर यहूदा नै तीस चाँदी गा सिक्‍का दिया।औ बिं प्रकार हि होयो जियां भविष्यद्वक्‍तां केयो हो के होवगौ। यहूदा मान गेयौ अर धन लेगै जांतो रेयो।बो यीशु नै गिरफ्तार करणै मै बांगी सहायता करणै खातिर कोई मोकै गी खोज करणै लागगेयो।

यरूशलेम मैं, यीशु आपणां चेलां सागै फसह गो त्‍योहर मनायो। फसह गै भोज दौरान, यीशु रोटी लेगै तोड़ी। बणै केयो, "ईनै लेयो अर खाओ। औ मेरौ शरीर है झिको मैं थारै खातिर देऊँ हूँ। ईयाँ मेरी याद मै करियो।" ईं प्रकार, यीशु केयो के बो बांगै खातिर मर जावगो, अर्थात बांगै खातिर बो आपगो शरीर बलि चढ़ा देवगो।

फैर यीशु एक दाखरस गो प्यालो लियो अर केयो, "ईंनै पी लेयो। औ नई वाचा गो मेरो लहू है झिको मैं उंडेलूँगा ताकै परमेश्वर थारै पापाँ नै क्षमा करै। हर बार ईनै पिंतां समय मेरी याद मै करो झिको मैं अभी करै आऊँ हूँ।"

फैर यीशु आपणै चेलां नै केयो, "थारै मुं एक जन मनै पकड़वावगो।" चेला चौंक गेया, अर पूछण लागगेया के कुण हिसौ काम करगो। यीशु केयो, "मनै पकड़वाण आलो आदमी बो है झिकै नै मैं औ रोटी गो टुकड़ो देऊं हूँ।" फेर बणै बा रोटी यहूदा नै देई।

बिं रोटी नै लेण गै बाद, यहूदा मै शैतान समा गेयो। यहूदा निकल गै यीशु नै गिरफ्तार करवाणै खातिर यहूदी अगुवां गी सहायता करणै खातिर चलेयो गेयो। औ रात गो समय हो।

भोजन गै बाद, यीशु अर बिंगा चेला जैतून पहाड़ कानी चलेया गेया। यीशु केयो, "थे सारा आज रात मनै छोड दोओगा।औ लिखेयो होयो है, 'मैं चरवाहै नै मारूँगा अर सारी भेडा तितर-बितर हो जावगी।'"

पतरस जवाब दियो, "भलां ही बाकी सारा तनै छोड़ देऐ, मैं कोनी छोडु!" फेर यीशु पतरस नै केयो, "शैतान थानै सारां नै लेणौ चावै है, पर हे पतरस, मै तेरै खातिर प्रार्थना करी है के तू विश्वास मुं चुक ना जावै। फेर भी, आज गी रात, मुरगै गी बाँग देणै मुं पेहलां तू तीन बारी इंकार करगो के तू मनै जाणै भी कोनी।"

पतरस फेर यीशु नै केयौ, "भलां ही मैं मर भी जाऊँ, मैं कदै भी तेरो इंकार कोनी करूँ!" बाकी सारां चेलां भी औही केयो।

फेर यीशु आपणै चेलां सागै गतसमनी नाम गै स्थान पर गेयो। यीशु आपणै चेलां नै प्रार्थना करणै खातिर केयो ताकै शैतान बांगी परीक्षा ना करै। फेर यीशु आप प्रार्थना करणै खातिर चलेयो गेयो।

यीशु तीन बार प्रार्थना करी, "हे मेरा पिता, जे सम्भव होवै तो कृपा करगै औ दुःख गो प्यालो पीणै खातिर ना देयो। पर जे लोगां गा पाप क्षमा करणै खातिर कोई और मार्ग कोनी है, तो तेरी ही इच्छा पूरी होवै।" यीशु बहोत व्याकुल हो अर बिंगो पसीनो लहू गी बूँदां गै समान हो। बिनै सामर्थ देणै खातिर परमेश्वर एक स्वर्गदूत भेजेयो।

हर बारी प्रार्थना गै बाद, यीशु आपणै चेलां कनै वापिस आयो, पर बे सो गेया हा। जद यीशु तीसरी बार लौटेयो तो यीशु केयो, "जाग जाओ! मेरो पकड़वाण आलो हठै है।"

यहूदी अगुवां, सैनिकां, अर एक बड़ी भीड़ सागै यहूदा आयो।बां तलवारां अर लाठियाँ लेई होई हिं। यहूदा यीशु गै कनै आगै केयो, "हे गुरु, नमस्कार,"अर बिनै चूम लियो। बणै गिरफ्तार करेया जाणै आलै आदमी नै यहूदी अगुवां पर प्रकट करणै खातिर ईंयां करेयो। फेर यीशु केयौ, "हे यहूदा, के तू एक चुम्बन मुँ मनै पकड़वाए आवै है?"

जद बे सैनिक यीशु नै पकड़े आवै हा, तो पतरस आपगी तलवार काडी अर महायाजक गै एक सेवक गौ कान काट दियो। यीशु केयो, "तलवार दूर कर! मैं आपणै पिता नै मेरौ बचाव करणै खातिर स्वर्गदूतां गी एक सेना खातिर विनती कर सकुं हूँ। पर मै मेरै पिता गी बात मानणी है। "फेर यीशु बिं आदमी गो कान ठीक कर दियो। फेर सारा चेला भाजै गेया।