39. यीशु पर मुकद्दमो चालै है

अब ओ आधी रात गो समय हो। बो सैनिक यीशु नै महायाजक गै घर ले आया, क्योंकि बे यीशु साग सवाल करना चान्‍ता हा। पतरस दूर मुँ बिंगो पीछो करण लागरेओ हो। जद सैनिक यीशु नै घर मै ले गेआ, तो पतरस बाहर रुक गे आप नै आग मु गर्म करण लाग गैओ।

घर गै भीतर, यहूदी अगुवां यीशु पर मुकद्दमो चलायो। बे बिंग विरुद्ध झूठी बातां नै बोलंण खातिर बहुत सा झूठै गवाहाँ नै लेगे आया। फेर भी, बांगीं बातां एक दूसर मुँ सहमत कोनी ही, ईखाति यहूदी अगुवां ओ साबित कोनी कर सकेआ के बो कोईं बात म दोषी हो। यीशु कुछ भी कोनी केओ।

आखिर मै, महायाजक सीधो यीशु कानि देखगे केओ, "मानै बता के तू ही जीवित परमेश्वर गो पुत्र मसीह है?"

यीशु केओ, "मैं हूँ, अर थे मनं परमेश्वर गै सागै बैठेओ होयो अर स्वर्ग मुँ आन्‍तो होयो भी देखोगा।" महायाजक आपगै कपड़ा फाड़ लिया क्योंकि झीको कि यीशु केओ बि बात पर बहुत गुसा हो। बो अन्य परधानां पर चिल्लायो, "मानै ओ बताण खातिर कोईं और गवाह गी जरुरत कोनी है के ईं आदमी के करेओ है! थे आप ही बिंन ओ केन्‍तो सुण लियो है के बो परमेश्वर गो पुत्र है। बिंगै खातिर थारो के फेंसलो है?"

सारा यहूदी अगुवां महायाजक नै जवाब दिओ, "बो मरण गै लायक है!" जद बै यीशु गी आँखां पर पट्टी बाँध दी, बिंग पर थूकेओ, बिंन मारेओ, अर बिंगो मजाक उड़ाओ।

अर पतरस, जद बो घर ग बाहर ईंन्‍तजार करण लागरेओ हो। जद एक दासी लड़की बिंन देखेओ। बण बिंन केओ, "तू भी यीशु ग सागै हो!" पतरस ईनकार कर दिओ। बाद मै, कोईं अन्य लड़की ईं बात न केओ, अर पतरस फेर ईनकार कर दिओ। आखिर मै कुछ लोगां केओ, "मानै पतो हैं के तू यीशु ग सागै हो क्योंकि थे दोनु गलील गा हो।"

जद पतरस केओ, "जै म ईं आदमी न जाणतो हूँ तो परमेश्वर मनं श्राप देव!" पतरस ग ईं तरा शपथ खाण ग बाद, एक मुर्गे बाँग देईं। यीशु पीछे मुड़गे पतरस न देखेओ।

पतरस बठु जान्‍तो रेओ अर फूट-फूट गे रोओ। बिं समय, यीशु न पकड़ाण आलो यहूदा देखेओ के यहूदी अगुवां यीशु नै मृत्युदंड दियो है। यहूदा बहुत दुःखी हो गेओ अर जागे आप न मार दिओ।

अब बिं देश गो राज्यपाल पिलातुस हो। बो रोम ग खातिर काम करतो हो। यहूदी अगुवा यीशु न बिंग कनं लेगे आया। बे चान्‍ता हा के पिलातुस बिंन मृत्युदंड देव अर बिंन मार देव। जद पिलातुस यीशु न पूछेओ, "के तू यहूदियां गो राजा है?"

यीशु जवाब दिओ, "तू सच ही केओ है। पर मेरो राज्य हठ पृथ्वी गो कोनि है। जै होन्‍तो तो मेरा दास मेरा खातिर युद्ध करतौ। म पृथ्वी पर परमेश्वर ग बारे म सच बताण ग खातिर आयो हूँ। हर एक जन झीको सच सागै प्रेम करै है बो मेरी सुणै है।" पिलातुस केओ, "तो सच के है?"

यीशु सागै बात करण गै बाद, पिलातुस बाहर भीड़ ग कनं जागै केओ, "म ईसो कोई कारण कोनी पाऊं के ओ आदमी मरण ग लायक है।" पर यहूदी अगुवां अर भीड़ चिल्लागे केओ, "बिंन क्रूस पर चढ़ा देओ!" पिलातुस जवाब दिओ, "बो कुछ भी गलत करण गो दोषी कोनी है।" पर बे और भी ऊँची आवाज म चिल्लाण लागेआ। जद पिलातुस तीसरी बार केओ, "बो दोषी कोनी है!"

पिलातुस डर गेओ के भीड़ दंगौ शुरु कर देवगी, ईंखातिर बो आपग सैनिकां ग द्वारा यीशु न क्रूस पर चढ़ाण खातिर मान गेओ। रोमी सैनिकां यीशु न कोड़ा लगवाया, अर बिंन राजा आला कपड़ा पहनाया, अर बिंग सिर पर काँटां मु बणेओ मुकुट राखेओ। जद बे ओ केगे बिंगो मजाक उड़ाण लागेआ, "देखो, यहूदियां गो राजा!"